କଂଗ୍ରେସରେ ଯୋଗ ଦେବାକୁ ମନା କଲେ ପ୍ରଶାନ୍ତ କିଶୋର

ଅନେକ ଚର୍ଚ୍ଚା ଉପରେ ଲାଗିଲା ବିରାମ । କଂଗ୍ରେସରେ ଯୋଗ ଦେବେନି ରାଜନୀତିର ଚାଣକ୍ୟ କୁହାଯାଉଥିବା ପ୍ରଶାନ୍ତ କିଶୋର । ଏନେଇ ସେ ନିଜେ ଟ୍ୱିଟ୍ କରି ସୂଚନା ଦେଇଛନ୍ତି । କଂଗ୍ରେସରେ ଯୋଗଦେବେ ନାହିଁ ବୋଲି ସେ ସିଧା ସିଧା ମନା କରିଦେଇଛନ୍ତି । ଗତ କିଛି ଦିନ ହେବ ପ୍ରଶାନ୍ତ କିଶୋର କଂଗ୍ରେସରେ ଯୋଗଦେବେ ବୋଲି ଚର୍ଚ୍ଚା ଜୋର ଧରିଥିଲା । ପ୍ରଶାନ୍ତଙ୍କୁ ନେଇ ଅନେକ କଳ୍ପନା ଜଳ୍ପନା ଚାଲିଥିଲା ।

ତେବେ ସବୁ କଳ୍ପନା ଜଳ୍ପନା ଓ ଚର୍ଚ୍ଚାର ଅନ୍ତ ଘଟାଇ, ନିଜ ଟ୍ୱିଟ୍‌ ହ୍ୟାଣ୍ଡେଲରେ ସେ ସ୍ପଷ୍ଟ ଭାବେ କଂଗ୍ରେସରେ ଯୋଗ ଦେବେ ନାହିଁ ବୋଲି କହିଛନ୍ତି । ସେ କହିଛନ୍ତି, ‘କଂଗ୍ରେସ ଦଳ ମୋ ଅପେକ୍ଷା ଭଲ ନେତୃତ୍ୱ ଆବଶ୍ୟକ କରୁଛି । ମିଳିତ ଇଚ୍ଛାଶକ୍ତି ଓ ତୃଣମୂଳ ସ୍ତରରେ ସଂଗଠନ ମଜଭୁତ ହେବା ଆବଶ୍ୟକ କରୁଛି ଦଳ ।’ ସେ ଆହୁରି କହିଛନ୍ତି, କଂଗ୍ରେସରେ ସାମିଲ୍ ହେବା ନେଇ କଂଗ୍ରେସ ମୁଖିଆ ସୋନିଆ ଗାନ୍ଧି ତାଙ୍କୁ ପ୍ରସ୍ତାବ ଦେଇଥିଲେ । ହେଲେ ସେ ଏହାକୁ ଗ୍ରହଣ କରିନାହାନ୍ତି ।

ପ୍ରଶାନ୍ତ କହିଛନ୍ତି ମୁଁ EAG ସହ ସାମିଲ ଅଛି । ମୋତେ ଅନେକ ନିର୍ବାଚନ ବେଳେ ବଡ଼ ଦୟିତ୍ୱ ତୁଲାଇବାକୁ ପଡ଼ୁଛି । ତେଣୁ ମୁଁ ସେଥିରେ ବ୍ୟସ୍ତ ରହିବି । କଂଗ୍ରେସରେ ଯୋଗଦେବାର ଏବେ କୌଣସି ଯୋଜନା ନାହିଁ ।