ଫେକ୍ ଭୋଟରଙ୍କୁ ରାଜ୍ୟ ନିର୍ବାଚନ କମିଶନଙ୍କ ସତର୍କବାଣୀ : ଧରାପଡ଼ିଲେ ଦିଆଯିବ ପୋଲିସ ଜିମା

ଫେକ ଭୋଟର ସାବଧାନ ! ନିର୍ବାଚନ ସମୟରେ ରାଜନୀତି ସରଗରମ ଥିବା ବେଳେ ନକଲି ମତଦାତାଙ୍କୁ ସତର୍କବାଣୀ ଶୁଣାଇଛନ୍ତି ରାଜ୍ୟ ନିର୍ବାଚନ କମିଶନ । କେହି ଫେକ୍ ଭୋଟର ବୋଲି ଜଣାପଡ଼ିଲେ, ତାକୁ ତୁରନ୍ତ ପୋଲିସ ଜିମା ଦିଆଯିବ ।

ପରିଚୟ ଉପରେ ଆପତ୍ତି ହେଲେ ଏଜେଣ୍ଟ ଚ୍ୟାଲେଞ୍ଜ କରିପାରିବେ । ୨ ଟଙ୍କା ଦେଇ ଭୋଟରଙ୍କ ପରିଚୟକୁ ଚାଲେଞ୍ଜ କରିପାରିବେ ଏଜେଣ୍ଟ । ଏହାସହ ପ୍ରିଜାଇଡିଂ ଅଫିସରମାନେ ସ୍ପଟ୍ ଉପରେ ଯାଞ୍ଚ କରିପାରିବେ । ଅଭିଯୋଗ ସତ୍ୟ ପ୍ରମାଣିତ ହେଲେ ଭୋଟରଙ୍କୁ ପୋଲିସ ନିକଟରେ ଜିମା ଦିଆଯିବ । ସେହିପରି ଅଭିଯୋଗ ମିଛ ପ୍ରମାଣିତ ହେଲେ ସେ ଭୋଟ ଦେଇପାରିବେ ।

ଜଣଙ୍କ ସ୍ଥାନରେ ଅନ୍ୟ ଜଣେ ଭୋଟ ଦେଇଥିଲେ ତାକୁ କାଉଣ୍ଟ କରାଯିବନି । ସେ କ୍ଷେତ୍ରରେ ସେହି ବ୍ୟକ୍ତିଙ୍କୁ ଟେଣ୍ଡଡ୍ ଭୋଟ ପାଇଁ ଅନୁମତି ମିଳିବ । ଅନ୍ୟପଟେ ଭୋଟ ଦେଇଥିବା ସେହି ବାଲାଟ ପେପରକୁ ଅଲଗା ରଖାଯିବ । ପୋଲିଂ ଅଫିସରମାନଙ୍କ ପାଇଁ ଭୋଟ ଦେବା ବ୍ୟବସ୍ଥା ରହିବ ନାହିଁ ବୋଲି ମଧ୍ୟ ନିର୍ବାଚନ କମିଶନ କହିଛନ୍ତି ।