ବିରୋଧ କରିଛି ତ ପ୍ରମାଣ ଦିଅ, ନହେଲେ ବିତର୍କକୁ ଆସ: ଅପରାଜିତା

ଲିଙ୍ଗରାଜ ମନ୍ଦିର ବିକାଶକୁ ବିରୋଧ ପ୍ରସଙ୍ଗରେ ମିଛ କହୁଛନ୍ତି ମୁଖ୍ୟମନ୍ତ୍ରୀ । ଆଜି ପ୍ରେସମିଟ୍ କରି ଏଭଳି ଅଭିଯୋଗ କରିଛନ୍ତି ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ । ଯଦି ବିରୋଧ କରିଛି ତେବେ ପ୍ରମାଣ ଦିଅ ବୋଲି ମୁଖ୍ୟମନ୍ତ୍ରୀଙ୍କୁ ଖୋଲା ଚ୍ୟାଲେଞ୍ଜ କରିଛନ୍ତି ଅପରାଜିତା ।

ଏଥିପାଇଁ ପୂର୍ବରୁ ୭୨ ଘଣ୍ଟା ସମୟ ଦେଇଥିଲି, କିନ୍ତୁ ଏପର୍ଯ୍ୟନ୍ତ ମୁଖ୍ୟମନ୍ତ୍ରୀ ଏହାର ଉତ୍ତର ରଖିଲେ ନାହିଁ । ଭୁବନେଶ୍ୱରରେ କରିଥିବା ବିକାଶ ପ୍ରସଙ୍ଗରେ ମୁଖ୍ୟମନ୍ତ୍ରୀଙ୍କୁ ବିତର୍କ ପାଇଁ ଆହ୍ୱାନ କରିଛନ୍ତି ଅପରାଜିତା ଷଡ଼ଙ୍ଗୀ । ତାଙ୍କ ଅଭିଯୋଗ ନେଇ ବିଜେଡି କିମ୍ବା ରାଜ୍ୟ ସରକାରଙ୍କ ପ୍ରତିକ୍ରିୟା ମିଳିପାରିନାହିଁ ।

ଅଧିକ ପଢ଼ନ୍ତୁ: ‘ଏଠି ମୁଖ୍ୟମନ୍ତ୍ରୀ ନାହାଁନ୍ତି, ପାଣ୍ଡିଆନ ସବୁ କବ୍‌ଜା କରି ନେଇଛନ୍ତି’

ସୂଚନାଯୋଗ୍ୟ ଗତ କିଛିଦିନ ତଳେ, ଭିଡିଓ ବାର୍ତ୍ତା ମାଧ୍ୟମରେ ନବୀନ ଲିଙ୍ଗରାଜ ଆକ୍ଟକୁ ଅପରାଜିତା ବିରୋଧ କରିଥିବା ନେଇ ଅଭିଯୋଗ ଆଣିଥିଲେ । ତେବେ ଅଭିଯୋଗର ତଥ୍ୟ ଓ ପ୍ରମାଣ ସହ ସେବେ ସ୍ପଷ୍ଟୀକରଣ ରଖିଥିଲେ ଅପରାଜିତା । ଲିଙ୍ଗରାଜ ମନ୍ଦିର କାମକୁ କେବେବି ବିରୋଧ କରିନି ବୋଲି ସେ କହିଥିଲେ । ଅପରାଜିତା କହିଛନ୍ତି ଯେ, ତାଙ୍କ ବିରୋଧରେ ମୁଖ୍ୟମନ୍ତ୍ରୀଙ୍କ ମିଛ ଅଭିଯୋଗ ଶୁଣିବା ପରେ ସେ ରାଗୁ ନାହାନ୍ତି, କିନ୍ତୁ ମର୍ମାହତ । କାରଣ ମୁଖ୍ୟମନ୍ତ୍ରୀ ତାଙ୍କୁ ଅତୀତରେ ଭଲ କାମ କରିବାକୁ ନେଇ ପ୍ରଶଂସା କରିଥିବା ବେଳେ ବର୍ତ୍ତମାନର ଅଭିଯୋଗ, ତାଙ୍କୁ ଆଶ୍ଚର୍ଯ୍ୟଚକିତ କରୁଛି । 

ଯଦି ବିରୋଧ କରିଥିବା ମୁଖ୍ୟମନ୍ତ୍ରୀ କହୁଛନ୍ତି- ତାହାଲେ ୭୨ ଘଣ୍ଟା ଭିତରେ ତା’ର ପ୍ରମାଣ ଦିଅନ୍ତୁ ବୋଲି ସେ କହିଥିଲେ । ଲିଙ୍ଗରାଜ ମନ୍ଦିର ଓ ଏହାର ଆଖପାଖର ବିକାଶ ମୋର ଲକ୍ଷ୍ୟ । ତେଣୁ କେବେ ଓ କେଉଁ ସମୟରେ ଏ ପ୍ରକଳ୍ପକୁ ମୁଁ ବିରୋଧ କରିଛି ସେ ନେଇ ଠୋସ୍ ପ୍ରମାଣ ଅଛି ନା ମୁଖ୍ୟମନ୍ତ୍ରୀ ଖାଲି କାଗଜ ପଢ଼ିଦେଲେ ବୋଲି ପ୍ରଶ୍ନ କରିଛନ୍ତି ଅପରାଜିତା ।

ଭୁବନେଶ୍ୱରର ଉନ୍ନତି ପାଇଁ କେବେ ବି କୌଣସି ବିଜେଡି ନେତା ପ୍ରସ୍ତାବ ଦେଇନାହାନ୍ତି ବୋଲି ସାଂସଦ ପ୍ରଶ୍ନ କରିବା ସହ ପୂର୍ବରୁ ଥରେ ଭୁବନେଶ୍ୱର ବିମାନ ବନ୍ଦରରେ ନିଜେ ମୁଖ୍ୟମନ୍ତ୍ରୀ, ତାଙ୍କୁ ଭୁବନେଶ୍ୱର ପାଇଁ ଭଲ କାମ କହି ପ୍ରଶଂସା କରିଥିଲେ । ଆଉ ଏବେ କିଛି କରିନାହାନ୍ତି ବୋଲି କହୁଛନ୍ତି- ତେଣୁ ସେ ରିପୋର୍ଟ କାର୍ଡ ପଢ଼ି ଦିଅନ୍ତୁ ବୋଲି କହିଥିଲେ ଅପରାଜିତା ।

ଅଧିକ ପଢ଼ନ୍ତୁ: ‘ତାମିଲ ଲୋକ ନୁହେଁ, ଓଡ଼ିଶାର ଶାସନ କରିବେ ଓଡ଼ିଆ ପୁଅ’

ଏଥିସହ ଜଣେ ୨୪ ବର୍ଷର ମୁଖ୍ୟମନ୍ତ୍ରୀ, ଜଣେ ପ୍ରଥମ ଥରର ସାଂସଦଙ୍କୁ ଅଙ୍ଗୁଳି ଉଠାଉଛନ୍ତି ବୋଲି ଅପରାଜିତା ପ୍ରଶ୍ନ କରିବା ସହ ସେ ଗତ ୫ ବର୍ଷରେ କ’ଣ କରିଛନ୍ତି ସେ ନେଇ ବିତର୍କ ପାଇଁ ମୁଖ୍ୟମନ୍ତ୍ରୀଙ୍କୁ ସ୍ଥାନ ଓ ସମୟ ମାଗିଛନ୍ତି । ଏଥିସହ ଐତିହ୍ୟ ଉନ୍ନତିକରଣ କ୍ଷେତ୍ରରେ ଆଦୌ ଅଭିଜ୍ଞତା ନଥିବା ଏକ ଦକ୍ଷିଣ ଭାରତୀୟ ସଂସ୍ଥା ଭୂମିପୁତ୍ରକୁ କିପରି ଶ୍ରୀମନ୍ଦିର ପ୍ରକଳ୍ପ ଡିପିଆର୍ ପ୍ରସ୍ତୁତି ପାଇଁ ଅନୁମତି ଦିଆଗଲା ସେ ନେଇ ବି ପ୍ରଶ୍ନ ଉଠାଇଥିଲେ ଅପରାଜିତା ।