LIVE TV
ରାଜ୍ୟ ରାଜନୀତିରେ କାମିୟା ଜାନି ବିବାଦ । କାମିୟାଙ୍କୁ ମହାପ୍ରଭୁଙ୍କ ଅବଢା ଖୁଆଇ ଅଡୁଆରେ ପାଣ୍ଡିଆନ । ପାଣ୍ଡିଆନ ଏବଂ କାମିୟାଙ୍କ ବିରୋଧରେ ମାମଲା ପାଇଁ ଦାବି । ହିନ୍ଦୀ ବ୍ଲଗର କାମିୟା ଜାନିଙ୍କୁ ନିକଟରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ବୁଲାଇବା ସହ ଦର୍ଶନ ଏବଂ ଅବଢା ଖୁଆଇଥିଲେ 5T ଅଧ୍ୟକ୍ଷ ଭି.କେ. ପାଣ୍ଡିଆନ । ଏହା ସହ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଏବଂ ଜଗନ୍ନାଥ ସଂସ୍କୃତି ସଂପର୍କରେ ତାଙ୍କୁ ଇଣ୍ଟରଭ୍ୟୁ ଦେଇଥିଲେ । ଯାହାକୁ ନିଜ ସୋସିଆଲ ମିଡିଆ ପେଜରେ ଅପଲୋଡ୍ କରିଥିଲେ କାମିୟା ।
ହେଲେ କାମିୟାଙ୍କ ଜଗନ୍ନାଥ ଦର୍ଶନକୁ ନେଇ ପ୍ରଶ୍ନ ଉଠାଇଛି ବିଜେପି । ଦଳ ଅଭିଯୋଗ କରିଛି, କାମିୟା ଜାନି ଖୁଲ୍ଲମଖୁଲ୍ଲା ଗୋମାଂସ ଖାଇଥିବା ନିଜ ସୋସିଆଲ ମିଡିଆ ସାଇଡରେ ରହିଛି । ତେଣୁ ଶ୍ରୀମନ୍ଦିର ନିୟମ ଅନୁସାରେ ଗୋମାଂସ ଭକ୍ଷଣ କରିଥିବା ମହିଳାଙ୍କୁ ମନ୍ଦିର ଭିତରକୁ ପ୍ରବେଶ କରାଇ ଅପରାଧ କରିଛନ୍ତି ପାଣ୍ଡିଆନ । କୋଟି କୋଟି ଜଗନ୍ନାଥପ୍ରେମୀ ଏବଂ ସନାତନ ଧର୍ମୀଙ୍କ ଭାବାବେଗକୁ କୁଠାରଘାତ କରିଥିବାରୁ ସେମାନଙ୍କ ବିରୋଧରେ ଆଇପିସି ୨୯୫-ଏ ଧାରା ବିରୋଧରେ ମାମଲା ରୁଜୁ କରୁ ଶ୍ରୀମନ୍ଦିର ପ୍ରଶାସନ ।
ସେହିପରି ଶ୍ରୀ ଜଗନ୍ନାଥ ଟେମ୍ପୁଲ ଆକ୍ଟକୁ ଉଲ୍ଲଘଂନ କରି ନିଷିଦ୍ଧ ଜିନିଷ ଧରି ମନ୍ଦିର ପରିସରରେ ସୁଟିଂ କରି ମଧ୍ୟ ଅପରାଧ କରିଛନ୍ତି । ଏଣୁ ପାଣ୍ଡିଆନ ଏବଂ କାମିୟା ଉଭୟଙ୍କ ବିରୋଧରେ ମାମଲା ରୁଜୁ କରିବା ପାଇଁ ଦାବି କରିଛି ଦଳ । ଅନ୍ୟପଟେ କାମିୟା ନିଜ ସୋସିଆଲ ମିଡିଆ ଯୋଗେ ସ୍ପଷ୍ଟୀକରଣ ରଖି ଲେଖିଛନ୍ତି, ମୁଁ କେବେ ଗୋମାଂସ ଖାଇନି ।
Also Read
ଗତକାଲି ବିଜେପି ଆଇଟି ସେଲ୍ ସଦସ୍ୟ ସଂଗ୍ରାମ ପାତ୍ରଙ୍କୁ ସମ୍ବଲପୁର ପୋଲିସ ଗିରଫ କରିବା ପରେ ଏହି କାମିୟା ବିବାଦ ତେଜିଥିଲା । ସୋସିଆଲ ମିଡିଆରେ ରାଜ୍ୟ ସରକାରଙ୍କୁ ରାଜନୈତିକ ସମାଲୋଚନା କରିବା ନେଇ ଏକ ମାମଲାରେ ସଂଗ୍ରାମଙ୍କୁ ଗିରଫ କରିଥିଲା ପୋଲିସ । କିନ୍ତୁ ବିଜେପି ଅଭିଯୋଗ କରିଛି କାମିୟା ଜାନି ଏବଂ ପାଣ୍ଡିଆନଙ୍କୁ ଟାର୍ଗେଟ କରିବାରୁ ତାଙ୍କୁ ଗରିଫ କରାଯାଇଛି । ଯାହାକୁ ନେଇ ବିଜେପି ନେତାମାନେ ସୋସିଆଲ ମିଡିଆରେ ଟାର୍ଗେଟ କରିଥିଲେ ।
ସେପଟେ ଘଟଣାରେ ପ୍ରତିକ୍ରିୟା ରଖି ସେବାୟତ କହିଛନ୍ତି ଯଦି ଏହା ସତ ହୋଇଥାଏ ସାଂଘାତିକ ଅପରାଧ । ଅନ୍ୟ ପଟେ ସୋସିଆଲ ମିଡିଆ ଏକ୍ସ ଯୋଗେ ଶ୍ରୀମନ୍ଦିର ପ୍ରଶାସନ କହିଛି ବିଜେପିର ଅଭିଯୋଗ ଭିତ୍ତିହୀନ । ପ୍ରମାଣ ଦେଲେ ତଦନ୍ତ ହୋଇ କାର୍ଯ୍ୟାନୁଷ୍ଠାନ ହେବ । ଏବେ ଦେଖିବାର କଥା, ବିଜେପି-ବିଜେଡି ଭିତରେ ଆରମ୍ଭ ହୋଇଥିବା ସୋସିଆଲ୍ ମିଡିଆ ବିବାଦ ଆଗକୁ କେଉଁ ମୋଡ଼ ନେଉଛି ।
