ନୂଆପଡାରେ ମାଟି କାମୁଡିଲା ବିଜେଡି; ହୋମ୍ ଟାଉନରେ ହାରିଲେ ସାଂସଦ-ବିଧାୟକ

ଆଜି ପ୍ରକାଶ ପାଇଛି ପୌର ଭୋଟ ଗଣତିର ଫଳାଫଳ । ନୂଆପଡା ଜିଲ୍ଲାର ୩ଟି ଏନ୍‌ଏସିରେ ମଧ୍ୟ ପୌର ଫଳ ପ୍ରକାଶ ପାଇଛି । ଏଠାରେ ଚିତ୍‌ପଟାଙ୍ଗ ମାରିଛି ବିଜେଡି। ରାଜ୍ୟରେ ବିଜେଡିର ଦବଦବା ଥିବାବେଳେ ନୂଆପଡାରେ ମାଟି କାମୁଡି ପଡିଛି ଦଳ।

ଜିଲ୍ଲାରେ ଶାସକ ବିଜୁ ଜନତା ଦଳ ଗୋଟିଏ ବି ପରିଷଦ ହାତେଇ ପାରି ନ ଥିବା ବେଳେ ବିଜେପି, କଂଗ୍ରେସ ଓ ସ୍ୱାଧୀନ ପ୍ରାର୍ଥୀ ଅଧ୍ୟକ୍ଷ ପଦ ହାତେଇଛନ୍ତି । ନୂଆପଡା ଏନ୍‌ଏସିରେ ସ୍ୱାଧୀନ ପ୍ରାର୍ଥୀ ମହମ୍ମଦ ଆଦମ, ଖରିଆର୍‌ରୋଡ୍‌ ଏନ୍‌ଏସିରେ ବିଜେପିର ସୋନିଆ ଜୈନ ଓ ଖଡିଆଳ ଏନ୍‌ଏସିରେ କଂଗ୍ରେସର ଉଜ୍ଜଳ ଗୁପ୍ତା ବିଜୟୀ ହୋଇଛନ୍ତି ।

କଳାହାଣ୍ତି ସାଂସଦଙ୍କ ହୋମ୍‌ ଟାଉନ ନୂଆପଡା ସଦର । ଏହି ଏନ୍‌ଏସିରେ ବିଜେପିର ଅଧ୍ୟକ୍ଷ ପ୍ରାର୍ଥୀ ଥିଲେ ସାଂସଦଙ୍କ ବଡ ପୁଅ ଅଭିନନ୍ଦନ ପଣ୍ତା । ତାଙ୍କୁ ବିଜେଡି ବିଦ୍ରୋହୀ ସ୍ୱାଧୀନ ପ୍ରାର୍ଥୀ ମହମ୍ମଦ ଆଦମ ୧୨୬୬ ଭୋଟ୍‌ରେ ପରାଜିତ କରିଛନ୍ତି । ସେହିପରି ଖରିଆର୍‌ରୋଡ୍‌ ଏନ୍‌ଏସି ହେଉଛି ନୂଆପଡା ବିଧାୟକ ତଥା ଟାଣୁଆ ବିଜେଡି ନେତା ରାଜେନ୍ଦ୍ର ପ୍ରସାଦ ଢୋଲକିଆଙ୍କ ହୋମ୍‌ ଟାଉନ୍ ।

ବିଜେଡି ବିଧାୟକ ନିଜ ଅଞ୍ଚଳକୁ ସୁରକ୍ଷା କରିବାରେ ଅକ୍ଷମ ହେବାରୁ ନିଜ ହୋମ୍‌ ଟାଉନ୍‌ରେ ପଦ୍ମ ଫୁଟିଛି । ବିଜେପିର ସୋନିଆ ଜୈନ ନିଜ ନିକଟତମ ପ୍ରତିଦ୍ୱନ୍ଦୀ ବିଜେଡିର ସୁନୀତା ଜୈନଙ୍କୁ ୮୮୬ ଭୋଟ୍‌ରେ ପରାଜିତ କରିଛନ୍ତି । ସେହିପରି ଖଡିଆଳ ଏନ୍‌ଏସି ହେଉଛି ଖଡିଆଳ କଂଗ୍ରେସ ବିଧାୟକ ଅଧିରାଜ ପାଣିଗ୍ରାହୀଙ୍କ ହୋମ୍‌ ଟାଉନ । ଏଠାରେ କଂଗ୍ରେସ ପରିଷଦ ହାତେଇ ନେଇଛି । ଜିଲ୍ଲାର ୩ଟି ପୌର ପରିଷଦରେ ବିଜେଡି ପରାଜୟର ସ୍ୱାଦ ଚାଖିଥିବା ବେଳେ କଂଗ୍ରେସ ଓ ବିଜେପି ମୁହଁରେ ହସ ଫୁଟିଛି।

(ରିପୋର୍ଟ: ନୂଆପଡାରୁ ମାୟାଧର ସରାଫ)