କ୍ଷମତା ଦଖଲ ପାଇଁ ଘୋଷଣା ହେଉଛି ମାଗଣା ଯୋଜନା । ଗୋଟେପଟେ କ୍ଷମତାର ଲୋଭ ଅନ୍ୟପଟେ ମହିଳାଙ୍କୁ ସମ୍ମାନ । ରାଜ୍ୟରେ ନିର୍ବାଚନ ଆସିଗଲେ ମହିଳାଙ୍କ କଥା ମନେପଡ଼େ ରାଜନୈତିକ ଦଳମାନଙ୍କର । ରାଜନୈତିକ ଦଳମାନେ ନିର୍ବାଚନ ପୂର୍ବରୁ ମହିଳାମାନଙ୍କ ଭୋଟ୍ ହାତେଇବା ପାଇଁ ଅନେକ ମାଗଣା ଯୋଜନା ଘୋଷଣା କରନ୍ତି । ଅନେକ ରାଜ୍ୟରେ ଏହି କ୍ଷେତ୍ରରେ ସଫଳ ହୁଅନ୍ତି ରାଜନୈତିକ ଦଳ । କିନ୍ତୁ, ବାସ୍ତବରେ ଦେଖିବାକୁ ଗଲେ ମହିଳାଙ୍କୁ ଟଙ୍କା ବାଣ୍ଟିବା ଯୋଜନା ରାଜ୍ୟ ପାଇଁ ବୁମେରାଂ ସାବ୍ୟସ୍ତ ହୋଇପାରେ ବୋଲି ଷ୍ଟେଟ ବ୍ୟାଙ୍କ୍ ଅଫ ଇଣ୍ଡିଆ (SBI) ସର୍ଭେ ରିପୋର୍ଟରୁ ଜଣାପଡିଛି ।
ନିର୍ବାଚନ ପୂର୍ବରୁ ମହିଳା ମାନଙ୍କ ଆକାଉଣ୍ଟକୁ ଟଙ୍କା ଯିବା ଦ୍ବାରା ଯଦିଓ ଭୋଟର ମାନେ ଖୁସି ହୁଅନ୍ତି, କିନ୍ତୁ ସେହି ଯୋଜନା ରାଜ୍ୟର ଋଣ ଭାରକୁ ବଢାଇବା ସହ ରାଜ୍ୟର ସମ୍ପୁର୍ଣ୍ଣ ବଜେଟ୍ର ୧୩% ପର୍ଯ୍ୟନ୍ତ ପହଞ୍ଚିଥିବା ସର୍ଭେ ରିପୋର୍ଟରୁ ଜଣାପଡିଛି । ଏଭଳି ସ୍ଥିତିରେ କ୍ଷମତା ଦଖଲ ନିଶା ଭବିଷ୍ୟତରେ ବିଭିନ୍ନ ରାଜ୍ୟ ପାଇଁ ଅଶୁଭ ସାବ୍ୟସ୍ତ ହୋଇପାରେ ବୋଲି ରାଜନୈତିକ ସମୀକ୍ଷକ ମାନେ ମତ ଦେଇଛନ୍ତି । ଅନ୍ୟପଟେ SBIର ରିପୋର୍ଟ ସମସ୍ତଙ୍କ ହୋସ୍ ଉଡ଼ାଉଛି । ପ୍ରକୃତରେ ଏହି ଯୋଜନା ମହିଳାଙ୍କୁ ଆଗକୁ ନେବାପାଇଁ କରାଯାଉଛି ନା ଭୋଟ୍ ହାତେଇବାକୁ ଏମିତି କରାଯାଉଛି ତାକୁ ନେଇ ଚର୍ଚ୍ଚା ଜାରି ରହିଛି । ଏହି ରିପୋର୍ଟରେ ଉଲ୍ଲେଖ ଅଛି ୮ ଟି ରାଜ୍ୟରେ ଘୋଷଣା ହୋଇଥିବା ଏଭଳି ଯୋଜନା ପାଇଁ ଆର୍ଥିକ ବୋଝ ଦେଢ ଲକ୍ଷ କୋଟି ଟଙ୍କା ଟପିଯାଇଛି ।
Also Read
ଏହି ବାବଦକୁ ଅର୍ଥ ରାଜ୍ୟ ରାଜସ୍ୱ ଆୟର ୩ ରୁ ୧୧ ପ୍ରତିଶତ ପର୍ଯ୍ୟନ୍ତ ରହୁଛି ବୋଲି ଜଣାପଡ଼ିଛି । କର୍ଣ୍ଣାଟକ ସରକାରଙ୍କ ଦ୍ବାରା କାର୍ଯ୍ୟକାରୀ ହୋଇଥିବା ଗୃହଲକ୍ଷ୍ମୀ ଯୋଜନା ପାଇଁ ୨୮,୬୦୮ କୋଟି ଟଙ୍କା ବରାଦ କରାଯାଇଛି । ଯାହାକି ରାଜ୍ୟ ର ରାଜସ୍ୱ ଆୟର ମୋଟ ୧୧ ପ୍ରତିଶତ । ପଶ୍ଚିମବଙ୍ଗ ସରକାରଙ୍କ ଦ୍ବାରା ଘୋଷଣା କରାଯାଇଥିବା ଲକ୍ଷ୍ମୀର ଭଣ୍ଡାର ଯୋଜନାରେ ରାଜ୍ୟ ସରକାରଙ୍କୁ ରାଜସ୍ୱ ଆୟର ୬ ପ୍ରତିଶତ ଖର୍ଚ୍ଚ କରିବାକୁ ପଡ଼ୁଛି । ଦିଲ୍ଲୀ ସରକାରକୁ ମୁଖ୍ୟମନ୍ତ୍ରୀ ମହିଳା ସମ୍ମାନ ଯୋଜନାରେ ରାଜସ୍ୱ ଆୟର ୩ ପ୍ରତିଶତ ଖର୍ଚ୍ଚ କରିବାକୁ ପଡ଼ୁଛି । ଏ କ୍ଷେତ୍ରରେ ଓଡ଼ିଶା ଭଲ ସ୍ଥିତିରେ ରହିଥିବା ରିପୋର୍ଟରେ ଉଲ୍ଲେଖ ରହିଛି । ତେବେ ଏହି ଯୋଜନାପାଇଁ ଏହାକୁ ଲାଗୁ କରୁଥିବା ରାଜ୍ୟ ନିମ୍ନଗାମୀ ହେବାର ସମ୍ଭାବନା ରହିଛି ।
ଅଧିକ ପଢ଼ନ୍ତୁ: ଆଗେଇ ଆସିଲେ ପୁଞ୍ଜିପତି, ନିବେଶ କରିବେ ଲକ୍ଷାଧିକ କୋଟି
ଏକଥାକୁ ନେଇ ଆଲୋଚନା ହେଉଥିଲେ ମଧ୍ୟ ନିର୍ବାଚନ ପୂର୍ବରୁ ମାଗଣା ଯୋଜନା ଘୋଷଣା ଉପରେ ରୋକ୍ ଲାଗୁନାହିଁ । ଅନେକ ଶିକ୍ଷିତ ଏବଂ ବରିଷ୍ଠ ରାଜନେତା ନିଜ ଦଳକୁ କ୍ଷମତାକୁ ଆଣିବାକୁ ସବୁ କିଛି ପାସୋରି ଯାଉଛନ୍ତି । କ୍ଷମତା ଲାଳସା ରାଜ୍ୟ ପାଇଁ ବୁମେରାଂ ସାବ୍ୟସ୍ତ ନହେଉ ବୋଲି ଅର୍ଥନୈତିକ ବିଶାରଦ ମତବ୍ୟକ୍ତ କରିଛନ୍ତି । ଯଦି ଏମିତି ହେବ ରାଜ୍ୟର ଋଣ ଭାର ବଢିବା ସହ ରାଜ୍ୟ ଶିକ୍ଷା,ସ୍ବାସ୍ଥ୍ୟ ଏବଂ ଅନେକ କ୍ଷେତ୍ରରେ ପଛରେ ପଡ଼ିଯାଇପାରେ । କର୍ଣ୍ଣାଟକ, ପଶ୍ଚିମବଙ୍ଗ ଏବଂ ଦିଲ୍ଲୀ ଭଳି ସ୍ଥିତି ଅନ୍ୟ ରାଜ୍ୟରେ ନହେଉ ସେଥିପାଇଁ ଆଗୁଆ ସଜାଗ ହେବାର ଆବଶ୍ୟକତା ରହିଛି । ନହେଲେ ନେଡିଗୁଡ଼ କହୁଣିକୁ ବୋହିଗଲେ ଆର୍ଥିକ ସ୍ଥିତି ବିଗିଡ଼ିବା ସହ ବିକାଶ ମଧ୍ୟ ବାଧାପ୍ରାପ୍ତ ହେବାର ସମ୍ଭାବନା ରହିଛି ।