ନବରଙ୍ଗପୁରରେ 5T ସଚିବ ଭି.କେ. ପାଣ୍ଡିଆନ୍ଙ୍କ ଅଭିଯୋଗ ଶୁଣାଣି ସମୟରେ ବିଜେଡି ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସଙ୍କ କାର୍ଯ୍ୟକୁ ନେଇ ଚର୍ଚ୍ଚା ଲାଗି ରହିଥିବା ବେଳେ ଘଟଣାକୁ ନେଇ ପ୍ରତିକ୍ରିୟା ରଖିଛନ୍ତି ନିଜେ ପ୍ରଣବ ପ୍ରକାଶ ଦାସ । ସେ କହିଛନ୍ତି, ‘ମୁଖ୍ୟମନ୍ତ୍ରୀଙ୍କୁ ଭେଟି ସମସ୍ୟାର ସମାଧାନ ପାଇଁ ନବରଙ୍ଗପୁରବାସୀ କହିଥିଲେ । ଫଳରେ ଲୋକଙ୍କ କାମ କରିବାକୁ ମୁଖ୍ୟମନ୍ତ୍ରୀଙ୍କ ଅଫିସ୍ ଏଠାକୁ ଆସିଥିଲା ।’
‘ମୁଁ ଲୋକଙ୍କୁ ଏଠାକୁ ଆସିବାକୁ ଡାକିଥିଲି । ଓଡ଼ିଶାବାସୀଙ୍କ କାମ ପାଇଁ ଦ୍ୱାରପାଳ ନୁହେଁ କ୍ରୀତଦାସ ହେବାକୁ ମୁଁ ରାଜି ଅଛି’ ବୋଲି କହିଛନ୍ତି ପ୍ରଣବ । ତାହାସହ ‘ବିଜୁ ଜନତା ଦଳ ପାଇଁ ମୁଁ ମୂଲିଆ ହେବାକୁ ରାଜି ଅଛି । ଆମେ ଲୋକଙ୍କ ପାଇଁ କାମ କରିବାକୁ ଆସିଛୁ, ମଧ୍ୟଯୁଗୀୟ ମାନସିକତା ପାଇଁ ନୁହେଁ । ଲୋକଙ୍କର କାମ ହେବା ଦରକାର, ମୁଁ ଲୋକଙ୍କୁ ଏଠାକୁ ଡାକଥିଲି’ ବୋଲି ଦୃଢ଼ୋକ୍ତି ବାଢ଼ିଛନ୍ତି ବିଜେଡି ସାଂଗଠନିକ ସମ୍ପାଦକ ପ୍ରଣବପ୍ରକାଶ ଦାସ ।
ଖାଲି ସେତିକି ନୁହେଁ, ‘ମୁଁ ଛିଡ଼ାହୋଇ ଲୋକଙ୍କୁ ଭିତରୁ ପଠାଉଥିଲି । ଲୋକମାନଙ୍କୁ ଛିଡ଼ାକରି ମୁଁ କ’ଣ ଭିତରେ ବସିବି ବୋଲି କହିଛନ୍ତି ପ୍ରଣବ ପ୍ରକାଶ ପ୍ରକାଶ ଦାସ । ମୋର ନେତା ପୂର୍ବରୁ କହିଛନ୍ତି, ଆମେ ଲୋକଙ୍କ ସେବକ । ଆମେ କଥାରେ ନୁହେଁ ଆମେ କାମରେ କରୁ । ପଞ୍ଚାୟତ ନିର୍ବାଚନରେ ଏଠାରୁ ବିପୁଳ ସମର୍ଥନ ମିଳିଥିଲା । ଆଉ ସେହି ପଞ୍ଚାୟତ ନିର୍ବାଚନ ସମୟରେ ବିଭିନ୍ନ ସମସ୍ୟା ନେଇ ଲୋକ ମାନେ ମୁଖ୍ୟମନ୍ତ୍ରୀଙ୍କ ନିକଟକୁ ଯାଇଥିଲେ । ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଥିଲେ ସବୁକାମ କରିବେ । ସେଥିଲାଗି ଏଠାକୁ ସିଏମ୍ଓ ଆସିଥିଲା ବୋଲି କହିଛନ୍ତି ବିଜେଡି ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସ ।
Also Read
ସୂଚନା ଥାଉ କି ଗତକାଲି ସଂଧ୍ୟାରେ ନବରଙ୍ଗପୁରସ୍ଥିତ ସର୍କିଟ୍ ହାଉସରେ ଏହି ଅଭିଯୋଗ ଶୁଣାଣି କାର୍ଯ୍ୟକ୍ରମର ଆୟୋଜନ କରାଯାଇଥିଲା । ସରକାରୀ କାର୍ଯ୍ୟକ୍ରମ ଅନୁସାରେ ଅଭିଯୋଗ ଶୁଣାଣି କରାଯାଉଥିବା ବେଳେ ନିଜେ ନିଜର ଅଭିଯୋଗ ନେଇ ନବରଙ୍ଗପୁର ଜିଲ୍ଲା ଓ ଜିଲ୍ଲା ବାହାରର ପ୍ରାୟ ୨ ହଜାର ଲୋକ ଏଠାରେ ଭିଡ଼ ଜମାଇଥିଲେ ।
ତେବେ ସେଠାରେ ଖୋଦ୍ ବିଜେଡି ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସ ଫାଟକ ନିକଟରେ ଛିଡ଼ା ହୋଇ ଜଣକ ପରେ ଜଣଙ୍କୁ ଭିତରକୁ ଛାଡୁଥିଲେ । ଏପରିକି ସେ ନିଜେ ବଡ଼ ପାଟି କରି ଜଣ ଜଣକର ନାଁ ଡାକୁଥିବା ଦେଖିବାକୁ ମିଳିଥିଲା । ଖାଲି ସେତିକି ନୁହେଁ 5T ସଚିବ ପହଞ୍ଚିବା ପୂର୍ବରୁ ଉପସ୍ଥିତ ଥିବା ବିଧାୟକ ଓ ସାଂସଦମାନେ ରାସ୍ତା ଉପରେ ଜମି ଥିବା ଭିଡ଼କୁ ହଟାଉଥିବା ମଧ୍ୟ ଦେଖିବାକୁ ମିଳିଥିଲା ।