ମୁହଁ ଖୋଲିଲେ କାମିୟା: କହିଲେ..ମୁଁ ବିଫ୍‌ ଖାଏନି କି ପ୍ରୋତ୍ସାହନ କରେନି

ଫାଇଭ୍ ଟି ଅଧ୍ୟକ୍ଷ ଭି.କେ. ପାଣ୍ଡିଆନ୍, ବ୍ଲଗର କାମିୟା ଜାନି ଓ ଗୋମାଂସ ବିବାଦ ପରେ ନିଜେ କାମିୟା ଜାନି ଏ ନେଇ ମୁହଁ ଖୋଲିଛନ୍ତି । ସୋସିଆଲ ମିଡିଆରେ ସେ ଏକ ଭିଡିଓ ବାର୍ତ୍ତା ଜାରି କରି ଏ ନେଇ ପ୍ରତିକ୍ରିୟା ରଖିଛନ୍ତି । ଜଣେ ଫୁଡ୍ ବ୍ଲଗର ଭାବେ ସେ ଦେଶର ବିଭିନ୍ନ ସ୍ଥାନ ବୁଲିବା ସହ ସେଠାକାର ଖାଦ୍ୟ ସଂପର୍କରେ ସୂଚନା ଦେଇଥାନ୍ତି ।

ତେବେ ସେ କେବେ ବି ଗୋମାଂସ ଖାଇନଥିବା ଭିଡିଓ ବାର୍ତ୍ତା ମାଧ୍ୟମରେ ସ୍ପଷ୍ଟୀକରଣ ରଖିଛନ୍ତି । ଶ୍ରୀଜଗନ୍ନାଥଙ୍କ ଆଶୀର୍ବାଦ ପାଇବାକୁ ପୁରୀ ଯାଇଥିଲି । ମନ୍ଦିରର ନିର୍ମାଣ ଓ ସଂସ୍କୃତି ଲୋକଙ୍କ ପାଖରେ ପହଞ୍ଚାଇବା ଉଦ୍ଦେଶ୍ୟ ଥିଲା । ମାତ୍ର ଦୁର୍ଭାଗ୍ୟବଶତଃ ମୋର ଏହି ଭ୍ରମଣ ବିବାଦୀୟ ହୋଇପଡ଼ିଥିବା କାମିୟା କହିଛନ୍ତି ।

ସେ ଆହୁରି କହିଛନ୍ତି, ମୁଁ ବୁଝିଛି, ମନ୍ଦିର ପ୍ରଶାସନର କିଛି ନିୟମ ରହିଛି । ମାତ୍ର ମୁଁ କୌଣସି ବି ନିୟମ ଭାଙ୍ଗିନାହିଁ । କେରଳ ଗସ୍ତ ବେଳେ ସେ ଗୋମାଂସ ଖାଇଥିବା ନେଇ ତାଙ୍କର ଏକ ଭିଡିଓର ସ୍କ୍ରିନ ସଟ୍ ଭାଇରାଲ୍ ହୋଇଥିଲା । ନିକଟରେ ଶ୍ରୀଜଗନ୍ନାଥ ମନ୍ଦିର ପରିକ୍ରମା ପ୍ରକଳ୍ପର ପ୍ରଚାର ପ୍ରସାର ପାଇଁ କରାଯାଇଥିବା ଏକ ଭିଡିଓରେ କାମିୟାଙ୍କୁ ଦେଖିବାକୁ ମିଳିଥିଲା । ଏହାକୁ ନେଇ ବିବାଦ ଜୋର୍ ଧରିଥିଲା । ଘଟଣାକୁ ନେଇ ବିଭିନ୍ନ ସଂଗଠନ ଆନ୍ଦୋଳନକୁ ଓହ୍ଲାଇବା ସହ ରାଜନୈତିକ ବୟାନବାଜି ମଧ୍ୟ ଜୋର୍ ଧରିଥିଲା ।

ଅନ୍ୟପକ୍ଷରେ ଶ୍ରୀ ପାଣ୍ଡିଆନ ଏହି ପ୍ରସଙ୍ଗକୁ ନେଇ ହେଉଥିବା ବିବାଦରୁ ନିଜକୁ ଦୂରେଇ ରଖିଛନ୍ତି । ଗଣମାଧ୍ୟମ ତାଙ୍କଠୁ ଏନେଇ ପ୍ରତିକ୍ରିୟା ଲୋଡ଼ୁଥିବାବେଳେ ସେ ‘ଜୟ ଜଗନ୍ନାଥ’ କହି ପ୍ରଶ୍ନକୁ ଏଡ଼ାଇ ଯାଇଥିଲେ ।