ମହାନ୍‌ ଶେଷ କିସାନ୍‌ ! ଗାଁ ପିଲାଙ୍କ ପାଠପଢ଼ା ପାଇଁ ଦାନ କରିଦେଲେ ୩୦ଲକ୍ଷ ଟଙ୍କାର ଘର

ବିଦେଶରୁ ଫେରିଛି ଗାଁର ଗରିବ ପୁଅ ଶେଷ କିସାନ୍ । ଆଜି ସମୟ ବଦଳିଯାଇଛି । ସେ ଜଣେ ସଫଳ ବୈଜ୍ଞାନିକ । ଦିନ ଥିଲା ସେ ମୁଢି ମୁଠେ ଖାଇବାକୁ ପାଉ ନ ଥିଲେ, ଅହେଲେ ଆଜି ସେ ନିଜର ଏକ ସ୍ୱପ୍ନର ଘର ତିଆରି କରି ପାରିଛନ୍ତି । ୩୦ଲକ୍ଷ ଟଙ୍କା ଖର୍ଚ୍ଚ କରି କରିଥିବା ସେହି ନୂଆ ଘରକୁ ସେ ଏବେ ଗାଁ ପିଲାଙ୍କ ନାମରେ କରିଦେଇଛନ୍ତି । କାରଣ ସେ ଅଙ୍ଗେ ଅଙ୍ଗେ ନିଭେଇଛନ୍ତି ସ୍ୱପ୍ନର ମୂଲ୍ୟ କେତେ । ଆଉ କୁନି ପିଲାଙ୍କ ଭବିଷ୍ୟତ ପାଇଁ ତଥା ସେମାନେ କିପରି ସ୍ୱଚ୍ଛନ୍ଦରା ପାଠ ପଢ଼ିବେ, ସେଥିପାଇଁ ଘରକୁ ଦାନ କରିଦେଇଛନ୍ତି ।

ସମ୍ବଲପରୁ ଜିଲ୍ଲା ନାକଟିଦେଉଳ ବ୍ଲକ ବଲାସିଂଘା ଗାଁର ପୁଅ ଶେଷ କିସାନ। ପିଲାଟି ଦିନରୁ ବାପା ମାଆଙ୍କୁ ହରାଇଛନ୍ତି । ସଂଘର୍ଷ ମୟ ଜୀବନ ଭିତରେ ଗାଈ ଚରାଇଛନ୍ତି । ମୂଲ ମଜୁରୀ ଲାଗି ପାଠ ପଢ଼ିବାର ନିଶାକୁ ସେ ପୂରଣ କରିଛନ୍ତି । ୪ ବର୍ଷ ତଳେ ଜର୍ମାନୀର ଗୋଟିନ୍ ଜେନ୍ ବିଶ୍ୱବିଦ୍ୟାଳୟରେ ବୈଜ୍ଞାନିକ ଭାବରେ କାର୍ଯ୍ୟକରିବା ପାଇଁ ଯୋଗ୍ୟ ବିବେଚିତ ହୋଇଥିଲେ । ଆଉ ତା’ପରେ ତାଙ୍କ ଦୁଃଖ ଦୂର ହୋଇଛି । ପିଲାଟି ଦିନରୁ ଦୁଃଖ ଦେଖିଥିବା ଶେଷଙ୍କ ଜୀବନରେ ଦୁଃଖର ଅନ୍ତ ଘଟିଛି । ଏବେ ସେ ଯୋଗ୍ୟ ଆଉ ରୋଜଗାରକ୍ଷମ। ନିଜେ ବଞ୍ଚିବା ସହ ଗାଁର ଶତାଧିକ ପିଲାଙ୍କ ପାଇଁ ସେ ସାହାରା ପାଲଟିଛନ୍ତି । ତାଙ୍କରି ପ୍ରୟାସରେ ପ୍ରାୟ ୧୭୦ଜଣ ପିଲା ଏବେ ପାଠ ପଢ଼ାର ସୁଯୋଗ ପାଇଛନ୍ତି । ଶେଷ କିସାନ ଖାଲି ତାଙ୍କ ଗାଁ କାହିଁକି ସମଗ୍ର ରାଜ୍ୟ ପାଇଁ ଗର୍ବ ।

ଅଧିକ ପଢ଼ନ୍ତୁ: ରୋମ୍‌ରେ ନିଜ ସଂଘର୍ଷର କାହାଣୀ ବଖାଣିଲେ ଶେଷ କିସାନ

ତେବେ ବଡ଼ କଥା ହେଲା ଆଉ ଦିନ କେଇଟା ଗଲେ ହାତକୁ ଦିହାତ ହେବେ ଶେଷ କିସାନ୍ । ସେ ତାଙ୍କ ଜୀବନ ସାଥି ପାଇସାରିଛନ୍ତି। ସେ ଚାହିଁଥିଲେ ବିଦେଶରେ ହେଉ କି ଆମ ଦେଶର ଯେ କୌଣସି ତାରକା ହୋଟେଲରେ ବିବାହ କରି ପାରି ଥାଆନ୍ତେ । କିନ୍ତୁ ସେ ଗାଁକୁ ଫେରି ଆସିଛନ୍ତି । ଏଇଠି ବାହାଘର ହେବ। ଓଡ଼ିଆ ଝିଅ ଶେଷ କିସାନଙ୍କ ଘରକୁ ବୋହୂ ହୋଇ ଆସିବ ।

ଶେଷ କିସାନ ଏ ଭିତରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଙ୍କୁ ଭେଟିଛନ୍ତି । ଦିନେ ମୁଖ୍ୟମନ୍ତ୍ରୀଙ୍କୁ ଭେଟିବା ପାଇଁ ଛିଣ୍ଡା ଚପଲ ହଳେ ପିନ୍ଧି ଯାଇଥିବା କଥା ମନେ ପକାଇ ସେ ଭାବବିହ୍ୱଳ ହୋଇ ପଡ଼ିଛନ୍ତି । ଆଉ କହୁଛନ୍ତି ଆଜି ମୋ ପାଖରେ ସବୁ ଅଛି। ଘର ଅଛି, ଗାଡି ଅଛି, ବ୍ୟାଙ୍କ ବାଲନ୍ସ କୋଉଥିରେ ଅଭାବ ନାହିଁ । ହେଲେ ଏ ସବୁ ଦେଖିବାକୁ ମୋ ବାପା ମା ଭଉଣୀ କେହି ନାହାନ୍ତି । ଏ କୁନି କୁନି ପିଲାଏ ମୋର ସବୁ... ମୋ ଗାଁ ପିଲାଙ୍କୁ ପାଠ ପଢ଼ାଇ ଶିକ୍ଷିତ କରିବି । ଦିନେ ଫିଚର ଫୋନ୍ ଟିଏ କିଣିବାକୁ ମୁଁ ଅସମର୍ଥ ଥିଲି, ଆଜି ମୋ ହାତରେ ଆଇଫନ୍। ଭଗବାନଙ୍କ ଆଶୀର୍ବାଦରୁ ସବୁ ସମ୍ଭବ ହୋଇ ପାରିଛି ।