Korean Bamboo Salt: କେଜି ପିଛା ୩୫ ହଜାର ଟଙ୍କାରେ ବିକ୍ରି ହେଉଛି ଲୁଣ, ଖାଇଲେ ଫାଇଦା ମିଳିବ ଏମିତି...ଗଣିପାରିବେ ନାହିଁ

ଆପଣ ସର୍ବାଧିକ କେତେ ଟଙ୍କାରେ ଲୁଣ କିଣିଥିବେ, ୫୦ ଟଙ୍କା କି ୧୦୦ ଟଙ୍କା... କାରଣ ସବୁ ଦେଶରେ ଲୁଣ ଖୁବ ଶସ୍ତାରେ ମିଳିଥାଏ । ହେଲେ ଏମିତି ବି ଲୁଣ ଅଛି ଯାହାର କେଜି ପିଛା ଦାମ୍ ଶହେ କି ହଜାରେ ନୁହେଁ, ପୂରା ୩୫ ହଜାର ଟଙ୍କା । ଯେଉଁଥିପାଇଁ ଏହି ଲୁଣକୁ ଦୁନିଆର ସବୁଠୁ ଦାମୀ ଲୁଣ କୁହାଯାଏ ।

ଏହି ଦାମୀ ଲୁଣ ହେଲା କୋରିଆନ ବାମ୍ବୋ ସଲ୍ଟ ବା କୋରିଆର ବାଉଁଶ ଲୁଣ । ୨୫୦ ଗ୍ରାମ କୋରିଆନ ବାମ୍ବୋ ଲୁଣର ମୂଲ୍ୟ ୧୦୦ ଡଲାର ଯାହାକି ଭାରତୀୟ ମୁଦ୍ରାରେ ୮ ହଜାର ଟଙ୍କାରୁ ଅଧିକ । ଆଉ କେଜିଏ ଦାମ୍ ୪୦୦ ଡଲାର ବା ପ୍ରାୟ ୩୫ ହଜାର ୨୪୬ ଟଙ୍କା ।

ତେବେ ଏହି ଲୁଣ ଏତେ ମହଙ୍ଗା ହେବାର କାରଣ ଏହାର ଦୁର୍ଲଭତା ଏବଂ ଔଷଧୀୟ ଗୁଣ । କୋରିଆନ ବାମ୍ବୋ ସଲ୍ଟ ଖାଦ୍ୟ ପ୍ରସ୍ତୁତି ବ୍ୟତୀତ କୋରିଆର ପାରମ୍ପରିକ ଚିକିତ୍ସା ପଦ୍ଧତି ବା ଆୟୁର୍ବେଦିକ ଚିକିତ୍ସାରେ ବ୍ୟବହୃତ ହୋଇଥାଏ ।

କୋରିଆନ ବାମ୍ବୋ ଲୁଣ ପାରମ୍ପରିକ କୋରିଆନ ପଦ୍ଧତିରେ ପ୍ରସ୍ତୁତ କରାଯାଏ । ଏହି ଲୁଣର ଉତ୍ପାଦନ ଏକ ଜଟିଳ ପ୍ରକ୍ରିୟା ଓ ମାସ ମାସ ସମୟ ଲାଗିଥାଏ । ପ୍ରଥମେ କୋରିଆର ପଶ୍ଚିମ ଉପକୂଳରୁ ସମୁଦ୍ର ଲୁଣ ସଂଗ୍ରହ କରାଯାଏ । ଏହି ଲୁଣକୁ ଆଣି ଏକ ବାଉଁଶ ନଳୀରେ ଭର୍ତ୍ତି କରାଯାଏ । ନଳୀରେ ମାଟିରେ ସିଲ୍ କରି ଉଚ୍ଚ ତାପମାତ୍ରାରେ ପୋଡାଯାଏ ।

ଲୁଣ କଠିନ ହେବା ପରେ ଏହାକୁ ବାଉଁଶ ନଳୀରୁ ବାହାର କରି ଗୁଣ୍ଡ କରାଯାଇ ପୁଣିଥରେ ପୋଡାଯାଏ । ଏମିତି ୯ ଥର ଲୁଣକୁ ୧୦୦୦ ଡିଗ୍ରୀ ସେଲସିୟମ ତାପମାତ୍ରାରେ ପୋଡାଯାଇ କୋରିଆନ ବାମ୍ବୋ ଲୁଣ ପ୍ରସ୍ତୁତ କରାଯାଏ ।

ଲୁଣ ପୋଡିହେବା ପରେ ଏହା ଗାଢ଼ ଧୂସର କିମ୍ବା ବାଇଗଣୀ ରଙ୍ଗର ଦେଖାଯାଏ ଓ ଏକ ନିଆରା ସ୍ୱାଦ ଆସେ । ଏହି ଲୁଣିକୁ ପର୍ପଲ ବାମ୍ବୋ ସଲ୍ଟ ବି କୁହାଯାଏ ।