LIVE TV
କଲମ ଧରିବା ହାତ ଏବେ ଘରର ଝାଡ଼ୁ ଧରିଛି । ନିଜେ ଗେହ୍ଲା ହେବା ବୟସରେ ଭାଇ ଭଉଣୀକୁ ସେହ୍ନରେ ଉଜାଡ଼ି ଦେଉଛି । କଥା କହି ନଶିଖିଲେ କଣ ହେଲା ସେ ଏବେ ସମ୍ଭାଳୁଛି ତିନି ଭାଇ ଭଉଣୀଙ୍କୁ । ଏହି କୁନି କୁନି ହାତରେ ଗାଧୋଇ ଦେଉଛି, ମୁଣ୍ଡ କୁଣ୍ଡେଇ ଦେଉଛି ଆଉ ସବୁ ଅଲିଅଳି ବୁଝୁଛି ଭଉଣୀ । ସେ ଖାଲି ଭଉଣୀ ନୁହେଁ ତ ସେ ମାଆ ଆଉ ସେ ହି ବାପା । କେନ୍ଦ୍ରାପଡ଼ା ରାଜନଗର ବ୍ଲକ ଚାରିପୋଖରୀଆ ଗାଁର ଲକ୍ଷ୍ମୀ ବାରିକ ଏବେ ଘରର ମୁରବୀ ।
ଲକ୍ଷ୍ମୀ ବାରିକ, ବୟସ ମାତ୍ର ୯ ବର୍ଷ । ହେଲେ ଛୋଟିଆ ବୟସରେ ବଡ଼ ଦାୟିତ୍ୱ ସମ୍ଭାଳିଛି ଲକ୍ଷ୍ମୀ । ବାପା, ମାଆ ନଥିବାରୁ ଏବେ ସେ ହିଁ ଭାଇ ଭଉଣୀଙ୍କ ଭରସା । ତେଣୁ ସକାଳୁ ରାତି ଯାଏଁ ନିଜ ସହ ନିଜ ୩ ସାନ ଭାଇ ଭଉଣୀଙ୍କ ସବୁ କଥା ସେ ହି ବୁଝୁଛି । ବାପା ମାଆ ଛେଉଁଣ୍ଡ ପିଲାଙ୍କ ସମ୍ପର୍କରେ ଖବର ପ୍ରସାରଣ ପରେ ସହାୟତା ପାଇଁ ଆଗକୁ ଆସିଛନ୍ତି ବିଚାରପତି । ଜିଲ୍ଲା ଦୌରାଜଜ୍ ବିଶ୍ୱଜିତ ମହାନ୍ତି ପିଲାଙ୍କ ଥଇଥାନ ପାଇଁ ନିର୍ଦ୍ଦେଶ ଦେଇଛନ୍ତି ।
Also Read
ଜିଲ୍ଲା ଆଇନସେବା ପ୍ରାଧିକରଣ ସଚିବ ସୁମିତ୍ରା ସାହୁ, ଜିଲ୍ଲା ଶିଶୁ ମଙ୍ଗଳ ଅଧିକାରୀ ଗାଁକୁ ଯାଇ ପିଲାଙ୍କୁ ଭେଟିଛନ୍ତି । ଶିଶୁଙ୍କ ଖାଇବା ପିଇବା, ବାସସ୍ଥାନ, ପାଠପଢା ଆଦି ବୁଝିବା ସହ ଆୱାସ୍ ଯୋଜନାରେ ସାମିଲ କରିବା ନେଇ ପ୍ରତିଶ୍ରୁତି ଦିଆଯାଇଛି ।
ଲକ୍ଷ୍ମୀଙ୍କ ବାପା ଅମର ବାରିକ ହାଇଦ୍ରାବାଦରେ ସୁରକ୍ଷାକର୍ମୀ ଭାବେ ଚାକିରୀ କରୁଥିଲେ । ସେଠି ନେପାଳର ଜଣେ ଯୁବତୀଙ୍କ ସହ ପ୍ରେମ ସମ୍ପର୍କ ପରେ ଉଭୟଙ୍କ ବିବାହ ହୋଇଥିଲା । ହେଲେ ୮ ମାସ ତଳେ ଅମରଙ୍କ ହଠାତ୍ ମୃତ୍ୟୁ ପରେ ୪ ଛୁଆଙ୍କୁ ଛାଡ଼ି କେଉଁ ଆଡ଼େ ପଲାଇଛନ୍ତି ମାଆ । ଏବେ ବାପା ମାଆ ଛେଉଣ୍ଡ ହେବା ପରେ ବୃଦ୍ଧ ଜେଜେବାପାଙ୍କ ପାଖରେ ରହୁଛନ୍ତି ଲକ୍ଷ୍ମୀ ଓ ତାଙ୍କ ଭାଇ ଭଉଣୀ ।
