LIVE TV
୧୯୯୯ ମସିହା ଆଜିର ଦିନରେ ପ୍ରଳୟ ରଚିଥିଲା ମହାବାତ୍ୟା । ୨୪ ବର୍ଷ ବିତିଗଲାଣି, ପ୍ରକୃତିର ସେହି ତାଣ୍ଡବକୁ । ୧୯୯୯ ଅକ୍ଟୋବର ୨୯ରେ ଓଡ଼ିଶା ଇତିହାସରେ ସବୁଠାରୁ ଭୟଙ୍କର ପ୍ରାକୃତିକ ବିପର୍ଯ୍ୟୟ ଆସିଥିଲା । ସବୁଠୁ ଅଧିକ କ୍ଷତିଗ୍ରସ୍ତ ହୋଇଥିଲା ଜଗତସିଂହପୁର ଜିଲ୍ଲା ଏରସମା ଅଞ୍ଚଳ । ମହାବାତ୍ୟାରେ ଏରସମାର ଜପା ପଞ୍ଚାୟତରେ ସର୍ବାଧିକ ୨୨୦୦ ଲୋକ ପ୍ରାଣ ହରାଇଥିଲା ।
କେବଳ ଦହିବର ଗାଁରେ ୫୬୦ ଜଣ ଲୋକ ପ୍ରାଣ ହରାଇଥିଲେ । ମହାବାତ୍ୟା କେବଳ ପ୍ରାଣ ନେଇ ନଥିଲା, ଘରଦ୍ୱାର, ରାସ୍ତାଘାଟ ସବୁ କିଛି ଛାରଖାର କରି ଦେଇଥିଲା । ଭୂଗୋଳ ବଦଳାଇ ଦେଇଥିଲା ମହାବାତ୍ୟା । ଭାରତ ମହାସାଗର ଅଞ୍ଚଳରେ ଏହା ସବୁଠାରୁ ଶକ୍ତିଶାଳୀ ସାମୁଦ୍ରିକ ଝଡ଼ ଥିଲା ବୋଲି ଇତିହାସ କହେ ।
ମହାବାତ୍ୟା ସିନା ଚାଲିଗଲା, କିନ୍ତୁ ପଛରେ ଛାଡ଼ି ଦେଇ ଯାଇଛି ଅନେକ ଦୁଃଖର ଦାଗ । ଆଜି ବି ସେ ଦିନର କଥାକୁ ମନେ ପକାଇଲେ କୋହରେ ଛାତି ଭରି ଯାଉଛି । ପୁରୀ ଜିଲ୍ଲା ଅସ୍ତରଙ୍ଗ ବ୍ଲକରେ ଏମିତି ଅନେକ ଗାଁ ରହିଛି, ଯେଉଁଠି ୧୯୯୯ ମସିହାର ମହାବାତ୍ୟାର ଚିହ୍ନ ଏବେ ବି ରହିଛି । ୨୯ ଅକ୍ଟୋବର ୧୯୯୯, ଠିକ୍ ଆଜିର ଦିନରେ ଓଡ଼ିଶା ଉପକୂଳରେ ପ୍ରକୃତି ଉଜାଡ଼ିଥିଲା ଅନେକ କିଛି । ସେଦିନ ବଙ୍ଗୋପସାଗରରୁ ହୁ ହୁ ହୋଇ ମାଡ଼ି ଆସିଥିଲା ପ୍ରଳୟ ।
ଘର ଉଡ଼ାଇଲା, ଗାଁ ବୁଡ଼ାଇଲା, ଲିଭିଗଲା ଚିହ୍ନ ବର୍ଣ୍ଣ । କିଏ ନିଜ ପୁଅକୁ ହରାଇଲେ ତ ଆଉ କିଏ ନିଜ ସମ୍ପୂର୍ଣ୍ଣ ପରିବାର । ପୁରୀ ଜିଲ୍ଲା ଅସ୍ତରଙ୍ଗ ବ୍ଲକ ମଧୁପୁର ଗାଁର କଳ୍ପନା ବେହେରା, ସେଦିନ ସମସ୍ତଙ୍କୁ ହରାଇଛନ୍ତି କଳ୍ପନା । ସ୍ୱାମୀ ଚାଲିଗଲେ, ପୁଅ ଝିଅ, ଶ୍ୱଶୁର, ଜା’ ଆଗ ପଛ ହୋଇ ଚାଲିଗଲେ । ଆଜି ବି ସେ ଦିନର ଛାତିଥରା କଥା କହିଲା ବେଳେ କଳ୍ପନାଙ୍କ ଆଖି ଭିଜି ଯାଉଛି, ପାଟି ଶୁଖି ଯାଉଛି ।
#୧୯୯୯_ମହାବାତ୍ୟା_ଛାଡିଯାଇଛି_ଦୁଃଖ
ମହାବାତ୍ୟା ସିନା ଚାଲିଗଲା… କିନ୍ତୁ ପଛରେ ଛାଡ଼ି ଦେଇ ଯାଇଛି ଅନେକ ଦୁଃଖର ଦାଗା ଆଜି ବି ସେ ଦିନର କଥାକୁ ମନେ ପକାଇଲେ କୋହରେ ଛାତି ଭରି ଯାଉଛି… ପୁରୀ ଅସ୍ତରଙ୍ଗ ବ୍ଲକରେ ଏମିତି ଅନେକ ଗାଁ ରହିଛି ଯେଉଁଠି ମହାବାତ୍ୟାର ଚିହ୍ନ ଏବେ ବି ରହିଛି…#Odisha #Supercyclone pic.twitter.com/6xnZUeYg2N— ଓଟିଭି (@otvkhabar) October 29, 2023Also Read
ଖାଲି କଳ୍ପନା ନୁହଁନ୍ତି, ତାଙ୍କ ଭଳି ଅନେକ ନିଜ ପରିବାରର ପ୍ରିୟଜନଙ୍କୁ ହରାଇଛନ୍ତି ମହାବାତ୍ୟାରେ । ୨୪ ବର୍ଷ ବିତିଗଲାଣି ମହାବାତ୍ୟାକୁ । କିନ୍ତୁ ଆଜି ବି ତା’ ଚିହ୍ନ ସେ ଦିନର କଥାକୁ ମନେ ପକାଇ ଦେଉଛି । ଅସ୍ତରଙ୍ଗ ବ୍ଲକ୍ ଅନ୍ତର୍ଗତ ଉଦୟକଣୀ ଗାଁ, ଦୁଇ ଦୁଇଟି ବଡ଼ ମହାବାତ୍ୟା ଏଠାକାର ଲୋକେ ଦେଖିଛନ୍ତି । ଦିନେ ଏଠି ଘର ଥିଲା, ମନ୍ଦିର ଥିଲା, ଜୀବନ ଜୀବିକା ଏଠୁ ପରିଚାଳିତ ହେଉଥିଲା ।
ହେଲେ ୧୦୦ ବର୍ଷ ତଳେ ମହାବାତ୍ୟା ଉଜାଡ଼ିବାରୁ ସମୁଦ୍ରରୁ କିଛି ବାଟ ପଛକୁ ଘୁଞ୍ଚିଥିଲେ ଗାଁ ଲୋକେ । କିନ୍ତୁ ୯୯ ମହାବାତ୍ୟା ପରେ ପୁଣି ସଂସାର ଭାସିଗଲା । ଏବେ ଖାଲି ଏହି କୂଅ ଅଛି, ମାଟିରେ ଲୋଟୁଥିବା କାନ୍ଥ ଅଛି । ସତେ ଯେମିତି ସେ ଦିନର କଷ୍ଟ ଓ ଆଖିରେ ଦେଖିଛନ୍ତି ମଣିଷର ବ୍ୟଥା । ମହାବାତ୍ୟା ପରେ ସମୁଦ୍ର କୂଳରେ ଅନେକ ଆଶ୍ରୟ ସ୍ଥଳୀ ନିର୍ମାଣ ହୋଇଛି । କିନ୍ତୁ କିଛି ପରିତ୍ୟକ୍ତ ଓ କିଛି ଭାଙ୍ଗିରୁଜି ଗଲାଣି । ପ୍ରତିବର୍ଷ ଓଡ଼ିଶା ଉପକୂଳରେ ବାତ୍ୟା ଓ ବନ୍ୟା ଆସେ, ସେତେବେଳେ ଏସବୁର ଅବଶ୍ୟକତା ପଡ଼େ । ଯଦି, ବାତ୍ୟା ଆଶ୍ରୟସ୍ଥଳୀ ହି ରହିବନି ତା’ହେଲେ ଲୋକେ ରହିବେ କେଉଁଠି ?
ତେବେ ୯୯ ମହାବାତ୍ୟା ମଣିଷକୁ ଲଢ଼ିବା ଶିଖେଇ ଦେଲା । ଆଗୁଆ ପ୍ରସ୍ତୁତି କେମିତି କରାଯାଏ ତାହା ଶିଖାଇ ଦେଲା ।
