ଭ୍ରମଣ ସୁଖ ଭିତରେ ଲୁଚି ରହିଥିଲା ମରଣ ଯୋଗ । ଓଡ଼ିଆ ଡାକ୍ତର ଦଂପତିଙ୍କ ପାଇଁ କାଳ ହେଲା କେରଳର ଦୈବୀ ଦୁର୍ବିପାକ। ମଙ୍ଗଳବାର ଭୋରରୁ ୱାୟନାଡ଼ରେ ହୋଇଥିବା ମହାପ୍ରଳୟକାରୀ ଭୂସ୍ଖଳନରେ ଭାଙ୍ଗି ଯାଇଛି ଚୌଦ୍ବାର ଅଞ୍ଚଳର ଡାକ୍ତର ବିଷ୍ଣୁପ୍ରସାଦ ଚିନାରା ଓ ତାଙ୍କ ଅଧ୍ୟାପିକା ପତ୍ନୀ ପ୍ରିୟଦର୍ଶିନୀ ପାଲଙ୍କ ସୁନାର ସଂସାର। ରାଜସ୍ବ ମନ୍ତ୍ରୀଙ୍କ ପକ୍ଷରୁ ମିଳିଥିବା ସୂଚନା ଅନୁସାରେ ଗତକାଲିର ଓୟନାଡ ଭୂସ୍ଖଳନରେ ସବୁଦିନ ପାଇଁ ଆଖି ବୁଜି ଦେଇଛନ୍ତି ଡାକ୍ତର ବିଷ୍ଣୁ ପ୍ରସାଦ ଚିନାରା । ସ୍ଥାନୀୟ ପୋଲିସ ତାଙ୍କ ମୃତଦେହ ଚିହ୍ନଟ କରିଛି । ହେଲେ ମାଟି ଓ ପାଣି-କାଦୁଅର ଏ ମହାପ୍ରଳୟ ଭିତରୁ ସୌଭାଗ୍ୟବଶତଃ ଗୁରୁତର ଅବସ୍ଥାରେ ବଞ୍ଚି ଯାଇଛନ୍ତି ତାଙ୍କ ପତ୍ନୀ ପ୍ରିୟଦର୍ଶିନୀ । ସେ ଏବେ ୱାୟନାଡ୍ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ ହସ୍ପିଟାଲରେ ଆଇସିୟୁରେ ଚିକିତ୍ସାଧୀନ ।
Also Read
ଅନ୍ୟପଟେ କିନ୍ତୁ ବିଷ୍ଣୁଙ୍କ ମୃତ୍ୟୁ ହୋଇଥିବା ନେଇ ତାଙ୍କ ପରିବାର ପକ୍ଷରୁ ଏଯାଏଁ କୌଣସି ସୂଚନା ମିଳିନାହିଁ । ମୃତଦେହ ପୁନଃ ଚିହ୍ନଟ ପରେ ଓଡ଼ିଶା ଆଣିବାକୁ ବ୍ୟବସ୍ଥା କରାଯିବା ବୋଲି ରାଜସ୍ବ ମନ୍ତ୍ରୀ କହିଛନ୍ତି ।
ସେପଟେ ମହାପ୍ରଳୟ ପରଠୁ ଏଯାଏଁ ନିଖୋଜ ଅଛନ୍ତି, କଟକ SCBରେ ସ୍ତ୍ରୀ ରୋଗ ବିଶେଷଜ୍ଞ ଭାବେ କାର୍ଯ୍ୟ କରୁଥିବା ଡାକ୍ତର ସ୍ବାଧୀନ ପଣ୍ଡା। ତାଙ୍କ ସମ୍ପର୍କରେ ଏ ଯାଏଁ କୌଣସି ବି ସୂଚନା ମିଳିପାରିନି । ଫଳରେ ଭୟ ଆଉ ଆତଙ୍କ ଭିତରେ ଦିନ କାଟୁଛନ୍ତି, ତାଙ୍କ ପରିବାର, ବନ୍ଧୁ ଓ ସମ୍ପର୍କୀୟ ।
ଅନ୍ୟପଟେ ତାଙ୍କର ବାନ୍ଧବୀ ଝାରସୁଗୁଡ଼ାର ସ୍ବୀକୃତି ମହାପାତ୍ର ଗୁରୁତର ଅବସ୍ଥାରେ ଉଦ୍ଧାର ହୋଇ ଆଇସିୟୁରେ ଚିକିତ୍ସାଧୀନ ଅଛନ୍ତି। ସ୍ବୀକୃତି ଭୁବନେଶ୍ବରର ଏକ ଘରୋଇ ମେଡିକାଲ କଲେଜରେ ପିଜି କରୁଥିଲେ। ତାଙ୍କ ସ୍ବାସ୍ଥ୍ୟବସ୍ଥାରେ ଧୀରେ ଧୀରେ ଉନ୍ନତି ଆସିଥିବା ସୂଚନା ମିଳିଛି। ହେଲେ ଏ ଅଘଟଣ ପରେ ଆଶା-ଅଶଙ୍କା ଭିତରେ ରହିଛନ୍ତି ତାଙ୍କ ପରିବାର ଲୋକେ ।
ବୁଲିବାକୁ କେରଳ ଯାଇ ଦୁର୍ଯୋଗର ଶିକାର ହୋଇଥିବା ଦୁଇ ଡାକ୍ତରଙ୍କ ପରିବାର ସଦସ୍ୟଙ୍କୁ ସବୁ ପ୍ରକାର ସହାୟତା ଲାଗି ଉଦ୍ୟମ କରୁଛନ୍ତି ରାଜ୍ୟ ସରକାର। ଏଥିପାଇଁ ରାଜ୍ୟ ସରକାରଙ୍କ ୨ ଜଣ ଅଧିକାରୀଙ୍କୁ ୱାୟନାଡ ପଠାଯାଇଛି। ଏଥିସହ କେରଳ ସରକାରଙ୍କ ସହ ଯୋଗାଯଗରେ ରହିବାକୁ ମୁଖ୍ୟମନ୍ତ୍ରୀ ମୋହନ ମାଝୀ, ଏସଆରସିଙ୍କୁ ନିର୍ଦ୍ଦେଶ ଦେଇଛନ୍ତି ।