ପରପୁରୁଷ ସହ ଚାଲିଗଲା ମାଆ, ସାପ କାମୁଡ଼ାରେ ଆଖିବୁଜିଲେ ବାପା...କେମିତି ଚଳିବ କୁନି ଝିଅ...

ଆଶ୍ରା ଖୋଜୁଛି ୮ବର୍ଷର କୁନି ଝିଅ । ବାପା ମାଙ୍କୁ ହରାଇ ସେ ଏବେ ଅସହାୟ । ଦେଢବର୍ଷର ହୋଇଥିଲା, ମାଆ ପର ପୁରୁଷ ପ୍ରେମରେ ପାଗଳ ହୋଇ ଘର ଛାଡି ପଳାଇଲା । ବାପା ସାପ କାମୁଡାରେ ଚାଲିଗଲେ । ଏବେ କୁନି ଝିଅର ସାହା ଭରସା ସାଜିଛନ୍ତି ଜେଜେ ବାପା ଓ ଜେଜେ ମା’ ।

କଟକ ବଡମ୍ବା ବଡ଼କମ୍ବିଲୋ ଗ୍ରାମରେ ଦେଖିବାକୁ ମିଳିଛି ଏମିତି ଘଟଣା । ଅଳ୍ପ ବୟସରେ ମାଆ ପରକିୟା ପ୍ରୀତିରେ ଚାଲିଯିବା ପରେ ତା’ର ଗୋଟିଏ ସାହାରା ଥିଲେ ବାପା ରାଜକିଶୋର ପ୍ରଧାନ । ସେ ସ୍ଥାନୀୟ ଛାଞ୍ଚୁଣିଆ ସ୍କୁଲରେ ଶିକ୍ଷକ ଥିଲେ। ହେଲେ ଗତ ୨୦ ଦିନ ହେବ ସାପ କାମୁଡ଼ାରେ ତାଙ୍କର ମୃତ୍ୟୁ ଘଟିଲା। ଏବେ ଜେଜେ ବାପା ଓ ଜେଜେ ମାଆଙ୍କ କୋଳ ତା’ର ଗୋଟିଏ ମାତ୍ର ସାହାରା ପାଲଟିଛି । ହେଲେ ପରିଣତ ବୟସ ହେତୁ ତାଙ୍କୁ ଏବେ ନାତୁଣୀର ଭବିଷ୍ୟତର ଚିନ୍ତା ଘାରିଛି ।

ଯମୁନା ଏବେ ତୃତୀୟ ଶ୍ରେଣୀରେ ପାଠ ପଢ଼ୁଛି । ଘରେ କମେଇବା ବାଲା କେହି ନ ଥିବାରୁ ବୃଦ୍ଧ ଜେଜେ ମାଆ ଓ ଜେଜେ ବାପା ମୂଲ ଲାଗିବା ସହ ଛେଳି ଚାଷ କରି ପରିବାର ଚଳାଉଛନ୍ତି । ରୋଜଗାରିଆ ପୁଅ ଚାଲି ଯିବା ପରେ ଛେଳି ଚରାଇ କେତେଦିନ ପରିବାର ପ୍ରତି ପୋଷଣ ହେବ ? ତାଙ୍କ ପରେ ଝିଅର ଦାୟିତ୍ୱ କିଏ ନେବ ? ଏପରି ଚିନ୍ତାରେ ଏବେ ବୃଦ୍ଧ ଦମ୍ପତ୍ତି । ତେଣୁ ଝିଅକୁ ସରକାରୀ ସୁବିଧା ଯୋଗାଇ ଦେବା ପାଇଁ ସ୍ଥାନୀୟ ଅଞ୍ଚଳରେ ଦାବି ଉଠିଛି । ଯଦି ଯମୁନାକୁ ସରକାର ସହାୟତାର ହାତ ବଢ଼ାନ୍ତେ ତେବେ ଶିଶୁକନ୍ୟାଟିର ଭବିଷ୍ୟତ ଉଜ୍ଜ୍ୱଳ ହୋଇପାରନ୍ତା ।