Free Sand Distribution: ରାଜସ୍ୱ ମନ୍ତ୍ରୀଙ୍କ ବଡ଼ ଘୋଷଣା, ଘର ତିଆରି ପାଇଁ ୨ ଟ୍ରାକ୍ଟର୍ ବାଲି ଦେବେ ରାଜ୍ୟ ସରକାର

ପ୍ରଧାନମନ୍ତ୍ରୀ ଆବାସ ହିତାଧିକାରୀଙ୍କୁ ମାଗଣାରେ ମିଳିବ ବାଲି । ମାଗଣାରେ ଦୁଇ ଟ୍ରାକ୍ଟର୍ ବାଲି ଦେବେ ସରକାର । ଏନେଇ ସୂଚନା ଦେଇଛନ୍ତି ରାଜସ୍ବ ମନ୍ତ୍ରୀ ସୁରେଶ ପୂଜାରୀ । ହିତାଧିକାରୀମାନେ ଯେଭଳି ଘର ତିଆରି କରିବାକୁ ଶସ୍ତାରେ ବାଲି ପାଇବେ ସେଥିପାଇଁ ସରକାର ଯୋଜନା କରୁଛନ୍ତି । ଏନେଇ ପରମିଟ୍ ଇସ୍ୟୁ କରାଯିବ, ଡ୍ରାଫ୍ଟ ପ୍ରସ୍ତୁତ ହୋଇଛି ।

ଅଧିକ ପଢ଼ନ୍ତୁ: ମିଳିଲା ସବୁଜ ସଙ୍କେତ, ପାରାଦୀପକୁ ଚାଲିବ ଯାତ୍ରୀବାହୀ ଜାହାଜ

ରାଜସ୍ୱ ମନ୍ତ୍ରୀ ସୁରେଶ ପୂଜାରୀଙ୍କ ସୂଚନା ଅନୁସାରେ, ହାଇଓ୍ୱା ବଦଳରେ ବାଲି ଉଠାଣ ପାଇଁ ଅନ୍ୟ ଗାଡ଼ି ବ୍ୟବହାର କରାଯିବ । ହାଇୱା ବ୍ୟବହାର ଦ୍ବାରା ପ୍ରଧାନମନ୍ତ୍ରୀ ସଡ଼କ କ୍ଷତିଗ୍ରସ୍ତ ହେଉଛି । ଏଣୁ ବାଲି ଉଠାଣ ପାଇଁ କେଉଁ ଗାଡ଼ି ବ୍ୟବହାର ହେବ ଓ କେତେ ବାଲି ଉଠାଇପାରିବେ ଏଥିପାଇଁ ଏସଓପି ପ୍ରସ୍ତୁତ ହେଉଛି ବୋଲି ସେ କହିଛନ୍ତି ।

ସେହିପରି କପ୍ତିପଦାରେ ଅତିରିକ୍ତ ତହସିଲଦାରଙ୍କୁ ବାଲି ମାଫିଆଙ୍କ ଆକ୍ରମଣ ଘଟଣାକୁ ନିନ୍ଦା କରିଛନ୍ତି ରାଜସ୍ୱ ମନ୍ତ୍ରୀ ସୁରେଶ ପୂଜାରୀ । ଏହି ଘଟଣା ଆଦୌ ସ୍ୱାଭାବିକ ନୁହେଁ । ସରକାରୀ ଅଧିକାରୀଙ୍କୁ ଯେଉଁଭଳି ଭାବେ ବାଲି ମାଫିଆ ଆକ୍ରମଣ କଲେ ତାହା ଗ୍ରହଣୀୟ ନୁହେଁ । ଦୋଷୀଙ୍କ ବିରୋଧରେ କଡ଼ା କାର୍ଯାନୁଷ୍ଠାନ ନେବା ପାଇଁ ପୋଲିସ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଥିବା ମନ୍ତ୍ରୀ କହିଛନ୍ତି । ରାଜ ଧର୍ମରେ କାହାରି ମୁହଁ ଦେଖାଯାଏ ନାହିଁ । ଓଡ଼ିଶାକୁ ବିହାର କି ବେଙ୍ଗଲ କରିବାକୁ ଦିଆଯିବ ନାହିଁ। ବାଲି ମାଫିଆ ଓ ଚୋରି ପାଇଁ ଏସ୍‌ଓପି ଆସିବ ବୋଲି ରାଜସ୍ୱ ମନ୍ତ୍ରୀ କହିଛନ୍ତି ।