Minister In Local Bus: ଲୋକଙ୍କ ସହ ବସ୍‌ରେ ୬୫୦ କି.ମି ଗଲେ ଗଣଶିକ୍ଷା ମନ୍ତ୍ରୀ-ବିଧାୟକ

ନାଲି ବତୀ ଗାଡ଼ିରେ ନୁହେଁ ସାଧାରଣ ବସ୍‌ରେ ଯାତ୍ରା କଲେ ମନ୍ତ୍ରୀ ଓ ବିଧାୟକ । ଆପଣ ଭାବୁଥିବେ ମନ୍ତ୍ରୀ-ବିଧାୟକମାନେ ଏମିତି ବସ୍‌ରେ ଯାତ୍ରା କରିଥାନ୍ତି । ଆଉ କିଛି ସମୟ ପରେ ବା କିଛି ବାଟ ଗଲା ପରେ ଫଟୋ ଉଠା ସାରି ପୁଣି ଓହ୍ଲାଇ ପଡ଼ନ୍ତି ।

ଆଜ୍ଞା ହଁ ଆପଣ ଯାହା ଭାବୁଛନ୍ତି ତାହା ଠିକ୍‌ । କିନ୍ତୁ ଏଠି କାହାଣୀ ସମ୍ପୂର୍ଣ୍ଣ ଅଲଗା । ଆମେ ଯେଉଁ ବିଧାୟକ ଓ ମନ୍ତ୍ରୀଙ୍କ କଥା କହୁଛୁ ସେମାନେ କିଛି ସମୟ ପାଇଁ ନୁହେଁ ବରଂ ୬୫୦ କିଲୋମିଟର ଯାତ୍ରା କରିଛନ୍ତି ସାଧାରଣ ବସ୍‌ରେ । ଏହି ସମୟରେ ସେମାନେ ଲୋକଙ୍କ ସହ ସେମାନଙ୍କ ସମସ୍ୟା ନେଇ ଆଲୋଚନା କରିଛନ୍ତି । ଏମିତିକି ସେମାନଙ୍କ ଅଭିଯୋଗ ମଧ୍ୟ ଗ୍ରହଣ କରିଛନ୍ତି ।

ଆଉ ଏହି ଦୁଇ ନେତା ହେଲେ ନବରଙ୍ଗପୁର ବିଧାୟକ ଗୌରୀ ଶଙ୍କର ମାଝି । ଆଉ ତାଙ୍କ ସହ ବସ୍‌ରେ ଥିଲେ ଆମ ରାଜ୍ୟର ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ । ଏହି ଦୁଇ ନେତାଙ୍କ ଏଭଳି ସରଳ ଜୀବନ ଶୈଳୀ ପାଇଁ ଏବେ ସବୁଠି ଚର୍ଚ୍ଚାର ବିଷୟ ପାଲଟିଛନ୍ତି । କାରଣ ଓଡ଼ିଶାବାସୀ ଆଗରୁ କେବେ ଏଭଳି ନେତା ବା ମନ୍ତ୍ରୀ ଦେଖିନାହାନ୍ତି । ଯିଏ କି ନାଲିବତୀ କାର୍‌ ଛାଡ଼ି ଲୋକଙ୍କ ସହ ସାଧାରଣ ବସ୍‌ରେ ଯାଆ ଆସ କରିଛନ୍ତି ।

ଏହି ଦୁଇ ନେତା ବସ୍‌ରେ ଯିବା ସହ ବସ୍‌ଯାତ୍ରୀଙ୍କ ସହ ରାତିରେ ଢ଼ାବାରେ ଖାଇଛନ୍ତି । ଆଉ ତାଙ୍କର ସମସ୍ୟା କଥା ଶୁଣିଛନ୍ତି । ମନ୍ତ୍ରୀଙ୍କୁ ଏଭଳି ପାଖରେ ପାଇ ବସ୍‌ଯାତ୍ରୀ ବି ଖୁବ୍‌ ଖୁସି ବ୍ୟକ୍ତ କରିଛନ୍ତି । ଆଉ ମନ୍ତ୍ରୀଙ୍କୁ ଭୁରି ଭୁରି ପ୍ରଶଂସା କରିଛନ୍ତି । ସେମାନେ କହିଛନ୍ତି ଏଭଳି ମନ୍ତ୍ରୀଙ୍କୁ ପାଇ ଆମେ ଗର୍ବିତ । ଅନ୍ୟପଟେ ବିଧାୟକଙ୍କୁ ମଧ୍ୟ ଲୋକେ ପ୍ରଶଂସା କରିଛନ୍ତି । ‘ଏଭଳି ବିଧାୟକଙ୍କ ପାଇଁ ମଧ୍ୟ ଆମେ ଖୁବ୍‌ ଗର୍ବିତ । ବିଧାୟକ ଆମ ସହ ଯାତ୍ରା କଲେ ଆମେ ବହୁତ ଖୁସି । ପୂର୍ବରୁ କୌଣସି ନେତାଙ୍କୁ ଆମେ ଏଭଳି ସାଧାରଣ ଜୀବନ ଯାପନ କରୁଥିବା ଦେଖିନଥିଲୁ । ଏହି ବିଧାୟକ ଆମ ସହ ବସ୍‌ରେ ଆସିଲେ ଆଉ ଆମ କଥା ସବୁ ଶୁଣିଲେ ।’

ମିଳିଥିବା ସୂଚନା ଅନୁସାରେ ଦୁଇ ଦିନିଆ ନବରଙ୍ଗପୁର ଗସ୍ତରେ ଆସିଛନ୍ତି କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ସାବିତ୍ରୀ ଠାକୁର । କେନ୍ଦ୍ରମନ୍ତ୍ରୀ ଆସୁଥିବା ଖବର ପାଇବା ପରେ ଏହି ଦୁଇ ନେତା ତୁରନ୍ତ ବସ୍‌ ସହ ଯୋଗାଯୋଗ କରିଥିଲେ । ଆଉ ବସ୍‌ରେ ଯାତ୍ରା କରିଥିଲେ । ରାତିରେ ବସ୍‌ରେ ବସିଲେ ଆଉ ସକାଳୁ ସକାଳୁ ନବରଙ୍ଗପୁରରେ ପହଞ୍ଚିଥିଲେ । ତାଙ୍କର ଏଭଳି ଚିନ୍ତାଧାରାକୁ ବିଭିନ୍ନ ମହଲରୁ ପ୍ରଶଂସା କରାଯାଇଛି ।

ତେବେ ମନ୍ତ୍ରୀ କହିଛନ୍ତି ‘ମୁଁ ପୂର୍ବରୁ ମଧ୍ୟ ବହୁବାର ବସରେ ଯାତ୍ରା କରିଛି l ଆମେ ଜନତାଙ୍କ ସେବକ । ଆମେ ସେବା କରିବାର ସୌଭାଗ୍ୟ ପାଇଛୁ । ବସରେ ସମସ୍ତେ ଆସୁଛନ୍ତି ତ ଆମେ ବି ଆସିଲୁ ।