ମାଫିଆଙ୍କ ଲୋଲୁପ ଦୃଷ୍ଟିରୁ ବାଦ୍ ପଡ଼ିନି ପୁରୀ ବେଳାଭୂମି । ଖଣ୍ଡ ଖଣ୍ଡ କରି ପ୍ଲଟିଂ କରାଯାଉଛି । ବିକ୍ରି ପାଇଁ ମସୁଧା ଚାଲିଥିବା ଅଭିଯୋଗ ଆସିଛି । CRZ ଆଇନ ଆଖିରେ ଧୂଳି ଦେଇ ପୁରୀ ସିପସରୁବାଲି ମୌଜା ବେଳାଭୂମିରେ ଚାଲିଛି, ନୂଆ ତରିକାରେ ଜମିଦୁର୍ନୀତିର ବଡ଼ ସଉଦା । ମାଫିଆ ଓ ପ୍ରଶାସନର ମଧୁଚନ୍ଦ୍ରିକାରେ ପ୍ରାୟ ୨୮ ଶହ ଏକରର ଜମି ଦୁର୍ନୀତିର ଅଭିଯୋଗ ହୋଇଛି । ଯାହାର ସିବିଆଇ ତଦନ୍ତ ଦାବି କରିଛନ୍ତି ବିଭିନ୍ନ ବର୍ଗ ।
ବେଳାଭୂମିରେ ଆସି ମଥା ପିଟୁଛି ସମୁଦ୍ରର ମାଳ ମାଳ ଢେଉ...ସୁଁ ସୁଁ ଗର୍ଜନରେ ଫାଟି ପଡୁଛି ଇଲାକା...ଆଉ ତାହାରି ଭିତରେ ମୁଣ୍ଡ ଟେକୁଛି ଇଟା, ବାଲି ଓ ସିମେଣ୍ଟର ବେଆଇନ ନିର୍ମାଣ । ପୋତାଯାଇଛି ଶତାଧିକ ହଳଦିଆ ଖୁଣ୍ଟି, ବୁଲା ଯାଉଛି ପାଚେରୀ । ମଙ୍ଗଳାନଦୀ ମୁହାଁଣର ପଛୁଆ ପାଣି ଆସି ସମୁଦ୍ରରେ ମିଶୁଥିବା ସିପସରୁବାଲି ବେଳାଭୂମି ଅଞ୍ଚଳ ।
ଏହି ଇଲାକାରେ ଯୁଆଡ଼େ ଅନାଇବେ, ସେଆଡ଼େ ପାଇବେ ନିର୍ମାଣ କାର୍ଯ୍ୟ । ଏନେଇ ଆପତ୍ତି ଉଠାଇ ସଂଗୀନ ଅଭିଯୋଗ ଆଣିଛନ୍ତି ଓଡ଼ିଶା ବେଳାଭୂମି ସୁରକ୍ଷା ପରିଷଦ ସଭାପତି । ୧୯୨୭ ମସିହା ସାବକ ଖାତା ନମ୍ବର-୭୦ । ଯେଉଁଥିରେ ଥିଲା ୩ ହଜାର ୪ଶହ ଏକର ଜମି ।
Also Read
ତା’ମଧ୍ୟରୁ ୧୯୭୭ର ହାଲ୍ ରେକର୍ଡ ଅନୁସାରେ ୨୮ ଶହ ଏକର ଜମିକୁ ବେଆଇନ ଭାବରେ ବିଭିନ୍ନ ଲୋକଙ୍କ ନାଁରେ ରେକର୍ଡଭୁକ୍ତ କରାଯାଇଛି । ଅର୍ଥାତ ସିପସରୁବାଲି ମୌଜାରେ ପ୍ରାୟ ୩ହଜାର କୋଟି ଟଙ୍କାର ହୋଇଛି ଜମି ଘୋଟାଲା । ୨୦୧୦ ଓ ୨୦୧୨ରେ ଏହାର ସିବିଆଇ ତଦନ୍ତ ଦାବି ବି କରାଯାଇଥିଲା ।
ତତ୍କାଳୀନ ସରକାର ଭିଜିଲାନ୍ସକୁ ତଦନ୍ତ ଭାର ଦେଇଥିଲେ ସତ, କିନ୍ତୁ କାର୍ଯ୍ୟାନୁଷ୍ଠାନ ହେଲାନି । ଫଳରେ କଙ୍କଡ଼ାକୁ ଗୋଳିଆ ପାଣି ଭଳି ଦୁର୍ନୀତିଖୋର୍ ସରକାରୀ ବାବୁଙ୍କୁ ହାତ କରି ଜମି ମାଫିଆ ବେଆଇନ ପ୍ଳଟିଂ କରୁଛନ୍ତି । ଏବେ ଏହାର ସିବିଆଇ ତଦନ୍ତ ଦାବି ଉଠାଇଛନ୍ତି ଆଇନଜୀବୀଙ୍କ ସହ ଓଡ଼ିଶା ବେଳାଭୂମି ସୁରକ୍ଷା ପରିଷଦ ।
ସମୁଦ୍ର ଜଳରାଶି ଓ ଏହାର ଜୈବିକ ବିବିଧତାର ସୁରକ୍ଷା ପାଇଁ ଲାଗୁ କରାଯାଇଛି କୋଷ୍ଟାଲ୍ ରେଗୁଲେସନ୍ ଜୋନ-CRZ ନିୟମ । କେନ୍ଦ୍ର ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ମନ୍ତ୍ରାଳୟର ଗେଜେଟ୍ ନୋଟିଫିକେସନରେ ମଧ୍ୟ ସ୍ପଷ୍ଟ ଉଲ୍ଲେଖ ରହିଛି । ୪ ଭାଗରେ ବିଭକ୍ତ ସିଆରଜେଡ୍ ଭିତରୁ ସମୁଦ୍ର ଜଳରାଶି ସଂଲଗ୍ନ କୂଳବର୍ତ୍ତୀ ଅଞ୍ଚଳ ସିଆରଡେଜ୍-୧ ଓ ସିଆରଜେଡ୍ -୨ରେ ଆସୁଛି ।
ଆଇନ-୧୯୮୬ର ସେକ୍ସନ୍-ଥ୍ରି କହୁଛି, CRZ ଅଞ୍ଚଳରେ ଖନନ ଓ ନିର୍ମାଣ ଦଣ୍ଡନୀୟ ଅପରାଧ । ଅର୍ଥାତ କୌଣସି ପରିସ୍ଥିତିରେ କଂକ୍ରିଟ୍ ନିର୍ମାଣ ହୋଇପାରିବନି । ତେବେ କିଭଳି ଭାବେ ଅନ୍ୟ ଲୋକଙ୍କ ନାଁରେ ଏହି ଜମିକୁ ରେକର୍ଡଭୁକ୍ତ କରାଗଲା ? ଏଥିପାଇଁ କିଏ ଦେଲା ଅନୁମତି ?
ନା ସରକାରୀ ବାବୁଙ୍କ ସହ ସଲାସୁତରାରେ ବେଳାଭୂମି ଜମିକୁ ହଡ଼ପ ପାଇଁ କରାଯାଉଛି ମସୁଧା ? ଏଭଳି ବେଆଇନ ନିର୍ମାଣକାରୀମାନେ କିଏ ? ଏଭଳି ନାନା ପ୍ରଶ୍ନ ଭିତରେ ଜମି କାରବାରକୁ ବେଆଇନ ଦର୍ଶାଇ ଉପ ଜିଲ୍ଲାପାଳଙ୍କୁ ତଦନ୍ତ ନିର୍ଦ୍ଦେଶ ଦିଆଯାଇଥିବା କହିଛନ୍ତି ପୁରୀ ଜିଲ୍ଲାପାଳ ।
ପୁରୀ ସହର ଓ ତଳି ଅଞ୍ଚଳରେ ସରକାରୀ ଜମିର ଅବାଧ ଦଖଲକାରୀ ମାଫିଆ ଏବେ ବେଳାଭୂମି ଭଳି ପ୍ରକୃତିର ବିରଳ ପରିବେଶକୁ ଖିନଭିନ୍ କରିବାକୁ ଷଡ଼ଯନ୍ତ୍ର ରଚିଛନ୍ତି । ଅପେକ୍ଷା, ଏହି ଷଡ଼ଯନ୍ତ୍ରକାରୀଙ୍କ ବିରୋଧରେ କି ଆକ୍ସନ ନେଉଛି ପୁରୀ ପ୍ରଶାସନ ।