YouTuber Priyanka Senapati Spy Scandal: ଝିଅ ପାଇଁ ବଢ଼ିଲାକି ବାପାଙ୍କ ସମ୍ପତ୍ତି ? କରିଦେଲେ ୪ଟା ହୋଟେଲ୍‌...

ଝିଅ କରିଦେଲା କି ବାପାଙ୍କୁ ମାଲେମାଲ୍‌ ? ତେଜରାତି ଦୋକାନୀରୁ ସିଧା ବନିଗଲେ ଚାରି ଚାରିଟା ହୋଟେଲ୍‌ ମାଲିକ । ଝିଅ ବୁଲୁଥିଲା ଫରେନ୍‌ରେ ବାପା ରହୁଥିଲେ ପୁରୀରେ । ୟୁଟ୍ୟୁବ୍‌ ଓ ତେଜରାତି ଦୋକାନରୁ ଏମିତି କେତେ ଟଙ୍କା ପାଉଥିଲେ ଯେ ରାତିରାତି ଛୋଟ ସାମ୍ରାଜ୍ୟ ତିଆରି ହୋଇଗଲା । ଯାହାକୁ ନେଇ ଏବେ ଅସମାହିତ ପ୍ରଶ୍ନ ଛିଡ଼ା ହେଲାଣି । ୟୁଟ୍ୟୁବର ଜ୍ୟୋତି ମଲହୋତ୍ରାଙ୍କ ସହ ପ୍ରିୟଙ୍କା ସେନାପତିଙ୍କ ସମ୍ପର୍କ ବେଶ୍‌ ନିବିଡ଼ । ଏକାଠି ବୁଲୁଥିଲେ, ଏକାଠି ହୋଟେଲ୍‌ରେ ରହୁଥିଲେ । ଏମିତି କି ପାକିସ୍ତାନ ବି ଦୁହେଁ ମିଶି ଯାଉଥିଲେ । କତ୍ତାରରେ ଚାଲୁଥିଲା ଏମାନଙ୍କ ଆଳାପ । ଗାଡ଼ି ଭିତରର ବ୍ଲଗିଂକୁ ଦେଖିଲେ ଆପଣ ବୁଝିପାରୁଥିବେ ଜ୍ୟୋତି ଓ ପ୍ରିୟଙ୍କାଙ୍କ ମଧ୍ୟରେ ଥିବା ସେ ବନ୍ଧୁତ୍ବକୁ । ଆଉ ସବୁଠାରୁ ବଡ଼ କଥା ହେଉଛି ଝିଅ ପାକିସ୍ତାନ ଯାଇଥିବା କଥାକୁ ଖୋଦ୍‌ ମାନିଛନ୍ତି ପ୍ରିୟଙ୍କାଙ୍କ ବାପା । 

ଭାରତର ଏ ୟୁଟ୍ୟୁବର- ପାକିସ୍ତାନୀ ଗୁପ୍ତଚର ! ଜ୍ୟୋତି ମାଲହୋତ୍ରାଙ୍କ ଖୋଲୁଛି ଗୋଟିଏ ପରେ ଗୋଟିଏ ପେଡ଼ି । ଅପରେସନ ସିନ୍ଦୂର ପୂର୍ବରୁ ବି ସେ ପାକିସ୍ତାନକୁ ଦେଇଥିଲେ ବ୍ଲାକ୍ଆଉଟ୍ ସୂଚନା । ଏଣେ ତା ଲିଙ୍କ୍‌ରେ ଆଉ ୩ ଜଣଙ୍କୁ ହରିୟାଣା ପୋଲିସ୍ ବାନ୍ଧି ଘାଣ୍ଟୁଥିବାବେଳେ ଓଡ଼ିଆ ଝିଅ ପ୍ରିୟଙ୍କା ସେନାପତି ବି ସ୍କାନରରୁ ବାହାରି ନାହାନ୍ତି । ସବୁଠାରୁ ଚିନ୍ତାଜନକ କଥା ହେଉଛି, ଜ୍ୟୋତିଙ୍କ ଭଳି ଭାରତୀୟ ସୋସିଆଲ୍ ମିଡିଆ ଇନଫ୍ଲୁଏନସରଙ୍କୁ ISI ସଫ୍ଟ ଟାର୍ଗଟ୍ କରି ଗୁପ୍ତ ତଥ୍ୟ ହାସଲରେ ସଫଳ ହେଉଥିବା କହିଛନ୍ତି ହିସାର SP । ତେବେ କେମିତି, କେଉଁ ପରିସ୍ଥିତିରେ ଭାରତୀୟ ହୋଇ ବି ଏଭଳି ଦେଶଦ୍ରୋହ କାର୍ଯ୍ୟରେ ସାମିଲ ହେଉଛନ୍ତି କିଛି ନିର୍ଦ୍ଦିଷ୍ଟ ୟୁଟ୍ୟୁବର, ତାକୁ ନେଇ ଉଠିଛି ପ୍ରଶ୍ନ ।

ଅଧିକ ପଢନ୍ତୁ : ଟଙ୍କା ରୋଜଗାରର ନିଶା ଜ୍ୟୋତି ମଲହୋତ୍ରାଙ୍କୁ କରିଦେଲା ପାକିସ୍ତାନ ଗୁପ୍ତଚର!

ସେପଟେ ସେଣ୍ଟ୍ରାଲ  ଓ ଷ୍ଟେଟ ଇଣ୍ଟେଲିଜେନ୍ସ ସହ ଯୋଗାଯୋଗରେ ଅଛି ପୁରୀ ପୋଲିସ । ତଦନ୍ତ ପାଇଁ ଏକ ସ୍ପେଶାଲ ଟିମ ଗଠନ ହୋଇଛି । ପୁରୀ ଏସପି ଏହି ଟିମକୁ ଲିଡ଼ କରୁଛନ୍ତି । 

ତେବେ ଏଠି ପ୍ରଶ୍ନ ଉଠୁଛି ଜ୍ୟୋତିଙ୍କ ସହ କାହିଁକି ଯୋଗାଯୋଗରେ ଥିଲେ ପ୍ରିୟଙ୍କା ? ପ୍ରିୟଙ୍କା କ'ଣ ପାଇଁ ପାକିସ୍ତାନ ଯାଇଥିଲେ ? କତ୍ତାରରେ କ’ଣ କରିଥିଲେ ଉଭୟ ? ଏସବୁ ପ୍ରଶ୍ନକୁ ନେଇ ଏବେ ତଦନ୍ତ ଜୋରଦାର କରାଯାଉଛି । ତଦନ୍ତ ନସରିବା ଯାଏଁ ପ୍ରିୟଙ୍କାଙ୍କୁ ପୁରୀ ଛାଡି ନଯିବାକୁ ନିର୍ଦ୍ଦେଶ ଦିଆଯାଇଛି ।