ଚିଲିକା ମଝିରେ ବିପଦଜନକ ଯାତ୍ରା। ଛୁଆ ପିଲା ଧରି ବର୍ଷ ବର୍ଷ ଧରି ଲୋକେ ଅକାତ ଅକାତ ପାଣିରେ ଯାଆସ କରୁଛନ୍ତି। ନା ଅଛି ସୁରକ୍ଷା ବ୍ୟବସ୍ଥା, ନା ଅଛି କୌଣସି ସାବଧାନତା। ଜହ୍ନିକୁଦାରୁ ସାତପଡ଼ାକୁ ଚିଲିକା ଭିତରେ ୫ କିଲୋମିଟର ଜୀବନ ବାଜିରେ ଲାଗିଛି ।
ଅକାତ ଅକାତ ପାଣି, ଯୁଆଡ଼େ ଆଖି ବୁଲାଇ ଆଣିବେ ଖାଲି ନୀଳ ଜଳରାଶି। ଆଉ ଏହାରି ଭିତରେ ଖୋଲା ବୋଟ୍ରେ ଯାଉଛନ୍ତି ଲୋକେ। ବସ୍ ଯାଉଛି, କାର୍ ଯାଉଛି, ବାଇକ୍ ନେଇ ମଣିଷ ବି ଚାଲିଛନ୍ତି ଆର ପାରି କି ଯିବାକୁ। ଏସିଆର ସବୁଠୁ ବଡ଼ ଲୁଣା ହଦ୍ର ଚିଲିକା। ଚିଲିକା ଭିତରେ ଥିବା ଜହ୍ନିକୁଦାରୁ ଆରପଟ ସାତପଡ଼ା ୫ କିଲୋମିଟର୍ ପାଣିର ରାସ୍ତାରେ ବିପଦଜନକ ଭାବେ ପ୍ରତିଦିନ ହଜାର ହଜାର ଲୋକେ ଯାଆସ କରନ୍ତି । ଛାତିକୁ ପଥର କରି, ମାଆ କାଳୀଜାଇଙ୍କୁ ସ୍ମରଣ କରି ଯାଆନ୍ତି ।
Also Read
ବିସ୍ତିର୍ଣ୍ଣ ଚିଲିକାର ବୁକୁରେ ଯାଉଥିବା ବୋଟ୍ ଓ ଡଙ୍ଗାରେ ନା ଅଛି କୌଣସି ସୁରକ୍ଷା ବ୍ୟବସ୍ଥା ନା ବିପଦ ହେଲେ ସେଠୁ ମୁକାବିଲା କରିବାକୁ ଯୋଜନା। ଡଙ୍ଗାରେ ଯାଉଥିବା କାହାରି ପାଖରେ ଲାଇଫ୍ ଜାକେଟ୍ ନାହିଁ, ସେମିତି ଖୋଲା ବୋଟରେ ମଧ୍ୟ। ଆଉ ବୋଟର ଅବସ୍ଥା ହୋସ୍ ଉଡ଼ାଇ ଦେବ। କେଉଁଠି କଳଙ୍କି ଲାଗିଛି, କେଉଁଠି ପାଣି ଜମିଲାଣି। ପୁରୁଣା ଯନ୍ତ୍ରାଂସକୁ ଧରି ଜୀବନକୁ ବାଜି ଲଗାଇ ଯିବା ବେଳେ ଅନେକ ସମୟରେ ଚିଲିକା ମଝିରେ ବୋଟ୍ ଅଟକିବା ଘଟଣା ସାମ୍ନାକୁ ଆସିଛି।
ଖାଲି ଏତିକି ନୁହେଁ କ୍ଷମତାରୁ ଅଧିକ ବି ଲୋକେ ଯାଆସ କରୁଥିବା ଅଭିଯୋଗ ରହିଛି। ସ୍ଥିତି ଏମିତି ହେଇଛି ଚିଲିକା ମଝି ଦେଇ ଯିବା ବେଳେ ଏମିତି ଗୋଟେ ପଟୁ ଢଲି ଯାଉଛି ବୋଟ୍। ୧୬ ଜୁନ ୨୦୧୮ରେ ଚିଲିକାରେ ଡଙ୍ଗା ପଲଟି ୧୬ ଜଣଙ୍କ ଜୀବନ ଯାଇଥିଲା, ୨ ଫେବ୍ରୁଆରୀ ୨୦୨୦ରେ ସମାନ ଢଙ୍ଗରେ ବୁଡ଼ିଥିଲା ଡଙ୍ଗା। ତଥାପି ଚେତିନି ପ୍ରଶାସନ, ସୁଧୁରୁନି ପରିସ୍ଥିତି।