Subhadra Yojana : ବଡ଼ ଘୋଷଣା କଲେ ପ୍ରଭାତୀ ପରିଡ଼ା, ପୁଣି ଏହି ଦିନ ମିଳିବ ‘ସୁଭଦ୍ରା’ ଟଙ୍କା

ଆସନ୍ତା ୨୪ ତାରିଖରେ ଆଉ ଲକ୍ଷେ ୭୦ ହଜାର ମହିଳାଙ୍କୁ ସୁଭଦ୍ରା ଯୋଜନାରେ ସାମିଲ କରିବେ ସରକାର । ଆପଣ ବି ଆବେଦନ କରି ସୁଭଦ୍ରା ଟଙ୍କା ପାଇଁ ଅପେକ୍ଷାରେ ଅଛନ୍ତି କି? ବ୍ୟସ୍ତ ହୁଅନ୍ତିନି, ଯଦି ଆପଣ ଯୋଗ୍ୟ ୨୪ ତାରିଖ ଦିନ ଆପଣଙ୍କ ଖାତାକୁ ଯିବ ସୁଭଦ୍ରା ଟଙ୍କା ।

ତା' ପୁଣି ଏକା ବେଳକେ ଦୁଇଟି କିସ୍ତିର ୧୦ ହଜାର ଟଙ୍କା । ଜାତୀୟ ପଞ୍ଚାୟତିରାଜ ଦିବସରେ ପୁରୀରେ ଷଷ୍ଠ ପର୍ଯ୍ୟାୟରେ ସୁଭଦ୍ରା ଟଙ୍କା ଦେବାକୁ ଯାଉଛନ୍ତି ରାଜ୍ୟ ସରକାର । ଯେଉଁଥିରେ ଲକ୍ଷେ ୭୦ ହଜାର ମହିଳାଙ୍କୁ କରାଯିବ ସାମିଲ । ମାର୍ଚ୍ଚ ୩୧ ସୁଦ୍ଧା ଆବେଦନ କରିଥିବା ମହିଳା ଏହି ପର୍ଯ୍ୟାୟରେ ଟଙ୍କା ପାଇବେ ।

ଏବେ ଆବେଦନ ବନ୍ଦ ଥିବା ବେଳେ ତୃତୀୟ କିସ୍ତି ପରେ ପୁଣି ଆବେଦନ ପ୍ରକ୍ରିୟା ଆରମ୍ଭ କରାଯିବ । ବାଦ୍ ପଡିଥିବା ଏବଂ ଦ୍ବିତୀୟ କିସ୍ତି ପାଇନଥିବା ମହିଳାଙ୍କ ଅଭିଯୋଗ ବିଚାର ପରେ ପୁଣି ଆବେଦନ ପ୍ରକ୍ରିୟା ଆରମ୍ଭ କରିବେ ସରକାର । ଅପରପକ୍ଷେ ପ୍ରଥମ କିସ୍ତି ପାଇ, ଦ୍ୱିତୀୟ କିସ୍ତି ପାଇନଥିବା ପ୍ରାୟ ୧ ଲକ୍ଷ ୮୩ ହଜାର ହିତାଧିକାରୀଙ୍କ କଥା ବି ବିଚାର କରାଯିବ ।

କିଏ କେଉଁ କାରଣ ପାଇଁ ବାଦ୍ ପଡିଛନ୍ତି ତା'ର ତର୍ଜମା କରାଯିବ । ଯଦି ଯୋଗ୍ୟ ଥା'ନ୍ତି ତା'ହେଲେ ସେମାନଙ୍କୁ ପୁଣି ସାମିଲ କରାଯାଇପାରେ । ଏହା ସହ ଷଷ୍ଠ କିସ୍ତି ପରେ ବି ଯଦି କିଛି ମହିଳା ବାଦ୍ ପଡିଯା'ନ୍ତି । ତା'ହେଲେ ଘରକୁ ଘର ସର୍ଭେ କରି ସେମାନଙ୍କୁ ଯୋଡାଯିବ ବୋଲି କହିଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ।

ସେପଟେ ମାସ ମାସ ଧରି ଆରମ୍ଭରୁ ଆବେଦନ କରି ବି ଆଜି ପର୍ଯ୍ୟନ୍ତ ଯୋଜନାରେ ସାମିଲ ହୋଇ ପାରିନଥିବା ମହିଳା ୨୪ ତାରିଖ ତାଲିକାରେ ତାଙ୍କର ନାଁ ଥିବା ନେଇ ବେଶ୍ ଆଶାବାଦୀ ଅଛନ୍ତି । ପୂର୍ବରୁ ୫ଟି ପର୍ଯ୍ୟାୟରେ ୧ କୋଟି ୬୫ହଜାର ୮୭୭ ମହିଳାଙ୍କୁ ସୁଭଦ୍ରା ଯୋଜନାରେ ସାମିଲ କରାଯାଇଥିଲା । କିନ୍ତୁ ଦ୍ବିତୀୟ କିସ୍ତିରେ ଲକ୍ଷେ ୮୩ ହଜାର ମହିଳା ବାଦ୍ ପଡିଥିଲେ । ଫଳରେ ହିତାଧିକାରୀଙ୍କ ସଂଖ୍ୟା ୯୮ ଲକ୍ଷ ୮୨ ହଜାରକୁ ଖସି ଆସିଥିଲା । ଏବେ ପୁଣି ଲକ୍ଷେ ୭୦ ହଜାର ମହିଳାଙ୍କୁ ସାମିଲ କରିବା ଫଳରେ ହିତାଧିକାରୀଙ୍କ ସଂଖ୍ୟା ପୁଣି କୋଟିଏ ଉପରେ ରହିବ ।

ଅଧିକ ପଢ଼ନ୍ତୁ: ଆପଣଙ୍କ ଖାତାକୁ ଆସିନି କି ଦ୍ବିତୀୟ କିସ୍ତି ସୁଭଦ୍ରା ଟଙ୍କା ? ଜାଣନ୍ତୁ କାହିଁକି...