Police Medal: ଦେଶର ୧୦୯୦ ଜଣଙ୍କୁ ମିଳିବ ପୋଲିସ ସେବା ପଦକ, ଓଡ଼ିଶାର ୨ ଜଣଙ୍କୁ ମିଳିବ ରାଷ୍ଟ୍ରପତି ପଦକ

ସ୍ୱାଧୀନତା ଦିବସ ଅବସରରେ ମୋଟ ୧୦୯୦ ଜଣ ପୋଲିସ ସେବା, ଅଗ୍ନିଶମ ସେବା, ଗୃହରକ୍ଷୀ ଓ ନାଗରିକ ସୁରକ୍ଷା (HG&CD) ଏବଂ ସଂଶୋଧନ ସେବା କର୍ମଚାରୀଙ୍କୁ ସାହସିକତା ଓ ସେବା ପଦକ ପ୍ରଦାନ କରାଯାଇଛି।

ଗୃହ ମନ୍ତ୍ରଣାଳୟର ଏକ ବିବୃତି ଅନୁଯାୟୀ, ୨୩୩ ଜଣଙ୍କୁ ସାହସିକତା ପଦକ (GM), ୯୯ ଜଣଙ୍କୁ ବିଶିଷ୍ଟ ସେବା ପାଇଁ ରାଷ୍ଟ୍ରପତି ପଦକ (PSM) ଏବଂ ୭୫୮ ଜଣଙ୍କୁ ପ୍ରଶଂସନୀୟ ସେବା ପଦକ (MSM) ପ୍ରଦାନ କରାଯାଇଛି।

୨୩୩ ସାହସିକତା ପଦକ ମଧ୍ୟରୁ ୫୪ ଜଣ ବାମପନ୍ଥୀ ଉଗ୍ରବାଦ ପ୍ରଭାବିତ ଅଞ୍ଚଳର, ୧୫୨ ଜଣ ଜମ୍ମୁ ଓ କାଶ୍ମୀର ଅଞ୍ଚଳର, ୩ ଜଣ ଉତ୍ତର-ପୂର୍ବ ଅଞ୍ଚଳର ଏବଂ ୨୪ ଜଣ ଅନ୍ୟ ଅଞ୍ଚଳର କର୍ମଚାରୀଙ୍କୁ ସେମାନଙ୍କ କାର୍ଯ୍ୟ ପାଇଁ ପ୍ରଦାନ କରାଯାଇଛି।

ପୋଲିସ ବର୍ଗରେ ୨୨୬ଜଣ ଅଧିକାରୀ ଏବଂ କର୍ମଚାରୀଙ୍କୁ ସାହସିକତା ପଦକ ପାଇଁ ଚୟନ କରାଯାଇଛି। ୮୯ ଜଣଙ୍କୁ ବିଶିଷ୍ଟ ସେବା ପାଇଁ ରାଷ୍ଟ୍ରପତି ପଦକରେ ସମ୍ମାନିତ କରାଯିବ, ଏବଂ ୬୩୫ ଜଣଙ୍କୁ ପ୍ରଶଂସନୀୟ ସେବା ପାଇଁ ପଦକ ମିଳିବ।

ଅଗ୍ନିଶମ ସେବା ପାଇଁ ୬୨ଟି ପୁରସ୍କାର ଘୋଷଣା କରାଯାଇଛି, ଯେଉଁଥିରେ ଛଅଟି ସାହସିକତା ପଦକ, ବିଶିଷ୍ଟ ସେବା ପାଇଁ ପାଞ୍ଚଟି ରାଷ୍ଟ୍ରପତି ପଦକ ଏବଂ ପ୍ରଶଂସନୀୟ ସେବା ପାଇଁ ୫୧ଟି ପଦକ ଅନ୍ତର୍ଭୁକ୍ତ।

ଗୃହରକ୍ଷୀ ଏବଂ ନାଗରିକ ସୁରକ୍ଷା ବର୍ଗରେ ଗୋଟିଏ ସାହସିକତା ପଦକ, ବିଶିଷ୍ଟ ସେବା ପାଇଁ ତିନୋଟି ରାଷ୍ଟ୍ରପତି ପଦକ ଏବଂ ପ୍ରଶଂସନୀୟ ସେବା ପାଇଁ ୪୧ଟି ପଦକ ଅନ୍ତର୍ଭୁକ୍ତ ହେବ।

ସଂଶୋଧନ ସେବା ପାଇଁ, ଦୁଇ ଜଣ ଅଧିକାରୀଙ୍କୁ ବିଶିଷ୍ଟ ସେବା ପାଇଁ ରାଷ୍ଟ୍ରପତି ପଦକରେ ସମ୍ମାନିତ କରାଯିବ ଏବଂ ୩୧ ଜଣଙ୍କୁ ପ୍ରଶଂସନୀୟ ସେବା ପାଇଁ ପଦକ ମିଳିବ।

ସେହିପରି ଓଡ଼ିଶାର ୨ଜଣଙ୍କୁ ରାଷ୍ଟ୍ରପତି ପଦକ ମିଳିବ। ବିଶିଷ୍ଟ ସେବା ପାଇଁ ୨ ଜଣଙ୍କୁ ମିଳିବ ରାଷ୍ଟ୍ରପତି ପଦକ। ASP ରବୀନ୍ଦ୍ର ପଣ୍ଡା, କମାଣ୍ଡାଣ୍ଟ ନରେଶ ପଟେଲଙ୍କୁ ରାଷ୍ଟ୍ରପତି ପଦକ ମିଳିବ।

ଓଡ଼ିଶାରୁ ୯ ଜଣଙ୍କୁ ସାହସିକତା ପଦକ ମିଳିବ। SI ଅମରେଶ ନରେନ୍ଦ୍ର, କନଷ୍ଟେବଲ ଜିତେନ୍ଦ୍ର ନାୟକ, OAPF ଅର୍ଜ୍ଜୁନ ମଲ୍ଲିକ, ଯୁଧିଷ୍ଠିର ମଲ୍ଲିକ, ହାବିଲଦାର ଅଶ୍ୱିନୀ ବାଗ, କମାଣ୍ଡୋ ଡମ୍ବରୁଧର ଭୋଇ, ନବୀନ ସାହୁ, ପ୍ରଦୀପ ଶ୍ରେଷ୍ଠ, ଅଭିମନ୍ୟୁ ମାଝୀଙ୍କୁ ମିଳିବ ସାହସିକତା ପଦକ।

ଓଡ଼ିଶାରୁ ୧୧ ଜଣଙ୍କୁ ମିଳିବ ପ୍ରଶଂସନୀୟ ସେବା ପଦକ। AIG ମହେଶ୍ୱର ସେଠୀ, ASP ପ୍ରଦୀପ ପ୍ରଧାନ, ଦେବେନ୍ଦ୍ର ଦାସ, DSP ଆଶିଷ ରାଉତ, ଇନ୍ସପେକ୍ଟର ଶ୍ରୀନିବାସ ଦୋରା, DSP ହେମାମାଳିନୀ ନାୟକ, କମାଣ୍ଡାଣ୍ଟ ସୂର୍ଯ୍ୟ ନାରାୟଣ ମଲ୍ଲିକ, ଇନ୍ସପେକ୍ଟର ସନ୍ତୋଷ ମିର୍ଦ୍ଧା, ASI ଅରୁଣ ସାମନ୍ତ, ଅରବିନ୍ଦ ଦାସ, କନଷ୍ଟେବଳ ଚିନ୍ମୟୀ ରାଉତଙ୍କୁ ମିଳିବ ପ୍ରଶଂସନୀୟ ସେବା ପଦକ।

ଅଧିକ ପଢନ୍ତୁ: ଫାଙ୍କା ଗୁଳିଚାଳନାରେ ଗଲା ୩ ଜୀବନ, ଅନେକ ଆହତ