ବୋମା ଧମକ: ବିମାନ ପରେ ହୋଟେଲ୍ ! ୫୫ ହଜାର ଡଲାର ଦିଅ, ନହେଲେ ...

୨ ସପ୍ତାହ ଧରି ବିଭିନ୍ନ ବିମାନକୁ ମିଛ ବୋମା ଧମକ ଆସିବା ପରେ, ଏବେ ଦୁର୍ବୃତ୍ତଙ୍କ ଟାର୍ଗେଟରେ ଦେଶର ୨୫ରୁ ଅଧିକ ନାମୀଦାମୀ ହୋଟେଲ୍ । ଗୁଜରାଟ, ପଶ୍ଚିମବଙ୍ଗ ଓ ଆନ୍ଧ୍ର ପରେ ଉତ୍ତରପ୍ରଦେଶର ଲକ୍ଷ୍ନୌ ସ୍ଥିତ ବିଭିନ୍ନ ହୋଟେଲକୁ ଆସିଲା ଧମକପୂର୍ଣ୍ଣ ଇମେଲ୍ । ହୋଟେଲରେ ବୋମା ଥିବା ଧମକ ଦେବା ସହିତ, ୫୫ ହଜାର ଡଲାର ଦାବି କଲା ଦୁର୍ବୃତ୍ତ ।

ଏକ କଳା ବ୍ୟାଗରେ ବୋମା ଥିବା ଏବଂ ଏହାକୁ ନିଷ୍କ୍ରିୟ କରିବାକୁ ଚେଷ୍ଟା କଲେ ବିସ୍ଫୋରଣ କରାଯିବ ବୋଲି ଧମକ ଆସିଛି । ଏହା ପୂର୍ବରୁ ଗତକାଲି ଗୁଜରାଟ ରାଜକୋଟର ୧୦ରୁ ଅଧିକ ହୋଟେଲ ଏବଂ ପଶ୍ଚିମବଙ୍ଗର କୋଲକାତା ଓ ଆନ୍ଧ୍ରପ୍ରଦେଶ ତିରୁପତିର କିଛି ହୋଟେଲକୁ ମଧ୍ୟ ଏଭଳି ଧମକ ଆସିଥିଲା ।

ତେବେ ସୁରକ୍ଷା ଯାଞ୍ଚ ପରେ ଏହା ମିଛ ଧମକ ବୋଲି ଜଣାପଡ଼ିଥିଲା । ଦୀପାବଳି ପୂର୍ବରୁ ହୋଟେଲରେ ଗହଳି ଥିବା ବେଳେ, ଏଭଳି ଘଟଣା ଚିନ୍ତାର କାରଣ ପାଲଟିଛି ।