Operation Akhal: ‘ଅପରେସନ ଅଖଲ୍’ ସଫଳ; ଆତଙ୍କବାଦୀ ନିପାତ

ଜମ୍ମୁ ଓ କାଶ୍ମୀରର କୁଲଗାମ ଜିଲ୍ଲାରେ ଚାଲିଥିବା ଏକ ଏନକାଉଣ୍ଟରରେ ସୁରକ୍ଷା ବାହିନୀ ଜଣେ ଆତଙ୍କବାଦୀଙ୍କୁ ନିପାତ କରିଛନ୍ତି। ଶୁକ୍ରବାର ଦିନ ଦକ୍ଷିଣ କାଶ୍ମୀରର କୁଲଗାମ ଜିଲ୍ଲାର ଅଖଲ ଜଙ୍ଗଲ ଅଞ୍ଚଳରେ ଆତଙ୍କବାଦୀଙ୍କ ଉପସ୍ଥିତି ସମ୍ପର୍କରେ ନିର୍ଦ୍ଦିଷ୍ଟ ଗୁଇନ୍ଦା ସୂଚନା ପାଇବା ପରେ ସୁରକ୍ଷା ବାହିନୀ ଏକ ସର୍ଚ୍ଚ ଅପରେସନ ଆରମ୍ଭ କରିଥିଲେ। ଆତଙ୍କବାଦୀମାନେ ସୁରକ୍ଷା ବାହିନୀ ଉପରେ ଗୁଳି ଚଳାଇବା ପରେ ଉଭୟ ପକ୍ଷରୁ ଗୁଳି ବିନିମୟ ହୋଇଥିଲା। ଅପରେସନ ଅଖଲ ନାମରେ ଏହି ଏନକାଉଣ୍ଟର କରାଯାଇଛି।

"ରାତି ସାରା ତୀବ୍ର ଗୁଳିବିନିମୟ ଜାରି ରହିଥିଲା। ସୈନ୍ୟମାନେ ଗୁଳିଚାଳନା କରି ଆତଙ୍କବାଦୀଙ୍କୁ ଘେରାବନ୍ଦୀ କରିଥିଲେ। ଏହା ପରେ ଏନକାଉଣ୍ଟର ହୋଇଥିଲା। ଏପର୍ଯ୍ୟନ୍ତ ସୁରକ୍ଷା ବାହିନୀ ଜଣେ ଆତଙ୍କବାଦୀଙ୍କୁ ନିପାତ କରିଛି। ଅପରେସନ ଅଖଲ ଜାରି ରହିଛି," ବୋଲି ସେନାର ଚିନାର କର୍ପସ ଆଜି ସକାଳେ ଏକ୍ସରେ ଏକ ପୋଷ୍ଟରେ କହିଛି।

ଜୁଲାଇ ୨୮ରେ ଦାଚିଗାମ ଜାତୀୟ ଉଦ୍ୟାନ ନିକଟସ୍ଥ ହରୱାନ ଅଞ୍ଚଳର ମୁଲନାରରେ ‘ଅପରେସନ ମହାଦେବ’ ଅଧୀନରେ ତିନି ଆତଙ୍କବାଦୀଙ୍କୁ ନିପାତ କରାଯାଇଥିଲା। ସେଥିରେ ପହଲଗାମରେ ହୋଇଥିବା ଭୟଙ୍କର ଆକ୍ରମଣର ମାଷ୍ଟରମାଇଣ୍ଡ ସୁଲେମାନ ଓରଫ ଆସିଫ ଓ ଅନ୍ୟ ଦୁଇ ଜଣ ଆତଙ୍କବାଦୀ ଜିବ୍ରାନ, ଯିଏ ଗତ ବର୍ଷ ସୋନାମାର୍ଗ ଟନେଲ ଆକ୍ରମଣରେ ଜଡ଼ିତ ଥିଲେ, ଏବଂ ହାମଜା ଆଫଗାନୀଙ୍କୁ ନିପାତ କରାଯାଇଥିଲା।

ସେହିପରି ଗୁରୁବାର ଦିନ ପୁଞ୍ଚରେ ନିୟନ୍ତ୍ରଣ ରେଖା (ଏଲଓସି) ନିକଟରେ ଆଉ ଦୁଇ ଆତଙ୍କବାଦୀଙ୍କୁ ଏନକାଉଣ୍ଟର କରାଯାଇଥିଲା। ପୋଲିସ କହିଥିଲା ଯେ ଏହି ଦୁଇ ଜଣ ପାକିସ୍ତାନରୁ ଅନୁପ୍ରବେଶ କରିଥିଲେ ଏବଂ ଭାରତୀୟ ସୀମାରେ ପ୍ରବେଶ କରିବା ପରେ ସେମାନଙ୍କୁ ଅଟକାଯାଇଥିଲା।

ଅଧିକ ପଢ଼ନ୍ତୁ: ଅନୁପ୍ରବେଶ ଉଦ୍ୟମ ପଣ୍ଡ, ୨ ପାକ୍ ଆତଙ୍କବାଦୀଙ୍କୁ ନିପାତ କଲେ ସୁରକ୍ଷାବାହିନୀ