LIVE TV
୨୦୦ କୋଟି ଟଙ୍କା ଠକେଇ ମାମଲାରେ ଅଭିଯୁକ୍ତ ମହାଠକ ସୁକେଶ ଚନ୍ଦ୍ରଶେଖର (Sukesh Chandrasekhar) ଏବେ ମଣ୍ଡୋଲି ଜେଲ୍ରେ ଅଛି। ସୁକେଶ ରହୁଥିବା ସେଲ୍ରେ ପ୍ରଶାସନ ପକ୍ଷରୁ ରେଡ୍ କରାଯାଇଥିଲା। ଏହି ସମୟରେ ସୁକେଶ ନିକଟରୁ ଦେଢ଼ ଲକ୍ଷ ଟଙ୍କାର ଚପଲ ଓ ୮୦ ହଜାର ଟଙ୍କାର ଜିନ୍ସ ପ୍ୟାଣ୍ଟ ଜବତ ହୋଇଛି। ଖାଲି ଏତିକି ନୁହେଁ ରେଡ୍ ବେଳେ ସୁକେଶ କାନ୍ଦୁଥିବା ମଧ୍ୟ ଦେଖିବାକୁ ମିଳିଛି। ଯାହାର ଦୃଶ୍ୟ ଏବେ ସାମ୍ନାକୁ ଆସିଛି।
ସୁକେଶ ରହୁଥିବା ସେଲ୍ରେ ଜେଲର ଦୀପକ ଶର୍ମା ଓ ଜୟସିଂ CRPF ସହ ରେଡ୍ କରିଥିଲେ। ହଠାତ୍ ସେଲ୍ ଭିତରେ ରେଡ୍ ନେଇ ସୁକେଶ ଚକିତ ହୋଇଯାଇଥିଲା। ରେଡ୍ ସରିବା ପରେ ସୁକେଶ, ଜେଲରଙ୍କ ସାମ୍ନାରେ ଭୋ ଭୋ ହୋଇ କାନ୍ଦିଥିଲା। ରେଡ୍ ବେଳେ ସୁକେଶ ସେଲ୍ରୁ ଯେଉଁସବୁ ଦାମିକା ଜିନିଷ ଜବତ ହୋଇଛି, ତାହା ଜେଲ୍ ଅଧିକାରୀଙ୍କୁ ଆଶ୍ଚର୍ଯ୍ୟ କରିଛି। ସୁକେଶ ନିକଟରୁ Gucci ର ଦେଢ଼ ଲକ୍ଷ ଟଙ୍କାର ଚପଲ ଓ ୮୦ ହଜାର ଟଙ୍କାର ଜିନ୍ସ ପ୍ୟାଣ୍ଟ ଜବତ ହୋଇଛି।
Also Read
ସୂଚନାଥାଉ କି, ୨୦୦ କୋଟି ଟଙ୍କା ଠକେଇ ମାମଲାରେ ଦିଲ୍ଲୀ ପୋଲିସ ସୁକେଶକୁ ଗିରଫ କରିଥିଲା। ପ୍ରଥମେ ସୁକେଶକୁ ତିହାର ଜେଲ୍ରେ ରଖା ଯାଇଥିଲା। ହେଲେ ସେଠାରେ ସେ ଅଧିକାରୀଙ୍କୁ ଲାଞ୍ଚ ଦେଇ ଜେଲ୍ ଭିତରେ ଅଡ୍ଡା ବନେଇ ଥିଲା। ଏପରିକି ଅଭିନେତ୍ରୀମାନେ ସୁକେଶକୁ ଭେଟିବାକୁ ଜେଲ୍କୁ ଆସୁଥିଲେ।
ମହାଠକ ସୁକେଶ ଜେଲ୍ ଭିତରେ ରହି ଖାଲି ଠକେଇ ନୁହେଁ ବରଂ ଅନେକ ବଲିଉଡ୍ ସେଲିବ୍ରେଟିଙ୍କ ସହ ନୂଆ ସମ୍ପର୍କ ସ୍ଥାପନ କରିଥିବା ଜଣାପଡ଼ିଛି। ଦିଲ୍ଲୀ ପୋଲିସର EOW ସୁକେଶ ବିରୋଧରେ ୧୩୪ ପେଜ୍ର ତୃତୀୟ ସପ୍ଲିମେଣ୍ଟାରୀ ଚାର୍ଜସିଟ୍ ଦାଖଲ କରିଥିଲା। ଏଥିରେ ଅନେକ ଜିନିଷର ଖୁଲାସା ହୋଇଥିଲା। EOW ଅନୁସାରେ, ଜେଲ୍ ଭିତରେ ସମସ୍ତ ଜେଲ୍ ଅଧିକାରୀଙ୍କୁ ସୁକେଶ ଟଙ୍କା କିଣି ନେଇଥିଲା। ବର୍ଷ ସାରା ତାଙ୍କ ପାଖରେ ମୋବାଇଲ୍ ରହୁଥିଲା। ଜେଲ୍ ଭିତରେ ରହି ଫୋନ୍ ଜରିଆରେ ସେ ଲୋକଙ୍କୁ ଚୂନ ଲଗାଉଥିଲଲେ।
ସୁକେଶଙ୍କ ସହ ଜଡ଼ିତ ଏହି ମନି ଲଣ୍ଡ୍ରିଂ ମାମଲାରେ ବଲିଉଡ୍ ଅଭିନେତ୍ରୀ ଜ୍ୟାକଲିନ୍ ଫର୍ଣ୍ଣାଣ୍ଡିଜ(Jacqueline Fernandez) ମଧ୍ୟ ଫସିଛନ୍ତି। ଅଭିନେତ୍ରୀ ନୋରା ଫତେହିଙ୍କ ନାଁ ମଧ୍ୟ ଚର୍ଚ୍ଚାକୁ ଆସିଛି।
