ଜର୍ମାନୀରେ ଭାରତ ମାତାର ଜୟ ଜୟକାର, ବର୍ଲିନ୍‌ରେ ଗୁଞ୍ଜରିତ ହେଲା ବନ୍ଦେ ମାତରମ୍ ଧ୍ୱନି

ତିନି ଦିନିଆ ୟୁରୋପ ଗସ୍ତର ପ୍ରଥମ ଦିନରେ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜର୍ମାନୀ ରାଜଧାନୀ ବର୍ଲିନ୍‌ରେ ପାଦ ରଖିବା ପରେ, ତାଙ୍କୁ ଭାରତୀୟ ସମୁଦାୟ ପକ୍ଷରୁ ଭବ୍ୟ ସ୍ୱାଗତ କରାଯାଇଛି ।

ଉତ୍ସବ ମୁଖର ବର୍ଲିନ୍‌ର ପ୍ରସିଦ୍ଧ ବ୍ରାଣ୍ଡେନ୍‌ବର୍ଗ ଗେଟ୍ । ଭାରତୀୟ ବାଦ୍ୟ, ନାଚ ଗୀତ ସହ ମୋଦି ମୋଦି ନାରାରେ ପ୍ରକମ୍ପିତ ପରିବେଶ । ଜର୍ମାନୀ ରାଜଧାନୀ ବର୍ଲିନ୍‌ରେ ପ୍ରଧାନମନ୍ତ୍ରୀ ମୋଦିଙ୍କୁ ଏଭଳି ଭବ୍ୟ ସ୍ୱାଗତ ଜଣାଇଛନ୍ତି ଭାରତୀୟ ସମୁଦାୟ । ଜର୍ମାନୀ ଚାନ୍‌ସେଲର୍ ଓଲାଫ୍ ସ୍କୋଲ୍‌ଜଙ୍କୁ ସାକ୍ଷାତ କରିବାକୁ ଫେଡେରାଲ୍ ଚାନ୍‌ସେଲାରୀ ଅଭିମୁଖେ ବାହାରିବା ବେଳେ, ମୋଦିଙ୍କୁ ଦେଖିବା ପାଇଁ ଓ ତାଙ୍କ ସହ ସେଲ୍ଫି ନେବା ପାଇଁ ବିଭିନ୍ନ ପାରମ୍ପରିକ ବେଶଭୂଷାରେ ଭିଡ଼ ଜମାଇଥିଲେ ପ୍ରବାସୀ ଭାରତୀୟ ।

୩ ଦିନିଆ ୟୁରୋପ ଗସ୍ତର ପ୍ରଥମ ଦିନରେ ଜର୍ମାନୀ ଯାଇଛନ୍ତି ମୋଦି । ରାଜଧାନୀ ବର୍ଲିନ୍ ସ୍ଥିତ ହୋଟେଲ୍ ଆଡ୍‌ଲନ୍ କେମ୍‌ପିନ୍‌ସ୍କିରେ ପହଞ୍ଚିବା ପରେ ସେଠିବି ପ୍ରଧାନମନ୍ତ୍ରୀଙ୍କୁ ଭବ୍ୟ ସ୍ୱାଗତ ସମ୍ବର୍ଦ୍ଧନା ଦେଇଥିଲେ ପ୍ରବାସୀ ଭାରତୀୟ । ସେଠାରେ ଛୋଟ ଛୋଟ ପିଲାଙ୍କୁ ଦେଖି ଖୁସି ହୋଇଯାଇଥିଲେ ମୋଦି । ସେମାନଙ୍କ ସହ କଥା ହେବା ବେଳେ, କୁନି ଝିଅ ମାନ୍ୟା ନିଜେ ଆଙ୍କିଥିବା ମୋଦିଙ୍କ ଚିତ୍ର ତାଙ୍କୁ ଦେଖାଇଥିଲା । ମାନ୍ୟାର କଳାପ୍ରତିଭାକୁ ଦେଖି ମୋଦି ସାବାସୀ ଦେବା ସହ ଫଟୋ ଉଠାଇଥିଲେ ଓ ଚିତ୍ରରେ ଅଟୋଗ୍ରାଫ୍ ଦେଇଥିଲେ । ସେହିପରି ପ୍ରବାସୀ ଭାରତୀୟ ପରିବାରର ଆଉ ଜଣେ କୁନି ପୁଅ ଆଶୁତୋଷ ଶୁଣାଇଥିଲା ଭାରତ ବନ୍ଦନା । ଆଉ ଗୀତ ସହ ତାଳରେ ତାଳ ମିଳାଇଥିଲେ ପ୍ରଧାନମନ୍ତ୍ରୀ ମୋଦି ।