G-20 ରେ ଝଟକିଲା ଉତ୍କଳୀୟ କଳା କାରିଗରୀ; କୋଣାର୍କ ଚକର ପ୍ରତିକୃତି ଦେଖି ବିମୋହିତ ବିଶ୍ୱନେତା

ନା କେହି ଭୁଲିପାରିବେ ଏହି ମୁହୂର୍ତ୍ତକୁ..ନା କେହି ଅଣଦେଖା କରିପାରିବେ ପ୍ରଛଦପଟ୍ଟରେ ଝଟକୁଥିବା ଓଡ଼ିଶାର କୀର୍ତ୍ତିରାଜିକୁ । ଦୃଶ୍ୟ ଦେଖିଲେ ଆଖି  ଲାଖିଯାଉଛି । ପ୍ରତ୍ୟେକଟି ଓଡ଼ିଆଙ୍କ ଛାତି ଆଜି ଗର୍ବ ଆଉ ଗୌରବରେ ଫୁଲି ଉଠୁଛି । କାରଣ ଉତ୍କଳୀୟ କଳାର ଅନ୍ୟତମ ଉତ୍କର୍ଷ କୁହାଯାଉଥିବା କୋଣାର୍କର ଐତିହାସିକ ସୂର୍ଯ୍ୟମନ୍ଦିର ଚକ ଆଜି ସ୍ୱାଗତ କରୁଛି ବିଶ୍ୱନେତା ଆଉ ପ୍ରତିନିଧିମାନଙ୍କୁ । ସେହି ସ୍ଥାନରୁ ସବୁ ଅତିଥିଙ୍କୁ ପାଛୋଟି ନେଉଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।

କେବଳ ପାଛୋଟି ନେଉନାହାଁନ୍ତି, ଗୋଟି ଗୋଟି କରି ବୁଝାଉଛନ୍ତି ସୂର୍ଯ୍ୟମନ୍ଦିର ଓ ଏହି ଚକର କଥା ଆଉ ଗାଥାକୁ । ଆମେରିକା ରାଷ୍ଟ୍ରପତି ଜୋ ବାଇଡେନଙ୍କୁ ମୋଦି ଅବଗତ କରିଛନ୍ତି ଚକର ବୈଶିଷ୍ଟତା ସଂପର୍କରେ । ତ୍ରୟୋଦଶ ଶତାବ୍ଦୀରେ ରାଜା ଲାଙ୍ଗୁଳା ନରସିଂହ ଦେବଙ୍କ ଦ୍ୱାରା ନିର୍ମିତ ଏହି ଚକରେ ରହିଛି ମୁଖ୍ୟତଃ ୮ଟି ଅର । ଯାହା ୮ଟି ପ୍ରହରକୁ ଦର୍ଶାଉଛି । ତା’ସହ ରହିଛି ୮ଟି ସରୁବାଡ଼ି ତଥା ଲାଲବାଡ଼ି । ଯାହା ସମୟ ଓ ବିକାଶର ଧାରାକୁ ସୂଚାଇଥାଏ ।

ଗଣତନ୍ତ୍ରରେ ଏକତା ଓ ବିକାଶର ପରିବର୍ତ୍ତନ ଧାରାକୁ ଦର୍ଶାଇବାକୁ G 20ରେ ସ୍ଥାନ ଦିଆଯାଇଛି କୋଣାର୍କ ଚକକୁ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡାଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ସୋସିଆଲ ମିଡିଆ ‘ଏକ୍ସ’ ଜରିଆରେ ଏହା ଏକ ଗୌରବର ମୁହୂର୍ତ୍ତ ବୋଲି ବର୍ଣ୍ଣନା କରିଛନ୍ତି ।

ଭାରତରେ ପ୍ରଥମ ଥର ପାଇଁ ଆୟୋଜିତ G-20 ଶିଖର ସମ୍ମିଳନୀରେ କେବଳ ଯେ କୋଣାର୍କର କାରୁକାର୍ଯ୍ୟ ଓଡ଼ିଶାର ଗାଥା ବଖାଣୁଛି ତା’ନୁହେଁ । ଭାରତ ମଣ୍ଡପମରେ ବି ଶୋଭାପାଉଛି ଆମର ପ୍ରାଚୀନ ହସ୍ତକଳା । ପିପିଲି ଚାନ୍ଦୁଆ, ପଟ୍ଟଚିତ୍ର, ସମ୍ବଲପୁରୀ ବସ୍ତ୍ର ଭଳି ଆକର୍ଷଣୀୟ ହସ୍ତତନ୍ତ ସାମଗ୍ରୀ ପ୍ରଦର୍ଶିତ ହେଉଛି ଏହି ବିଶ୍ୱମଞ୍ଚର ମନ୍ଥନ କାର୍ଯ୍ୟକ୍ରମ ଅବସରରେ । ଯାହାକୁ ଦେଖି ଓ କ୍ରୟକରି ବେଶ୍ ଆତ୍ମସନ୍ତୋଷ ଲଭିଛନ୍ତି ବିଦେଶାଗତ ଅତିଥି ।

ଏସବୁ ଭିତରେ ଅନ୍ୟତମ ଆକର୍ଷଣ ହୋଇଛି G-20କୁ ଆସୁଥିବା ଅତିଥିଙ୍କ ସ୍ୱାଗତ ପାଇଁ ପାରମ୍ପାରିକ ସମ୍ବଲପୁରୀ ନୃତ୍ୟ ସହ ଡାଲଖାଇ ଗୀତର ଆସର । ମନ ବୋଲ ମନୁନି ବୋଲି ଗୀତର ତାଳେ ତାଳେ ପାଦ ପକାଇ ବି ନାଚିଛନ୍ତି ଅତିଥି । ଇଣ୍ଟରନ୍ୟାସନାଲ ମନିଟାରି ଫଣ୍ଡ-IMF ନିର୍ଦ୍ଦେଶକ କ୍ରିଷ୍ଟାଲିନା ଜର୍ଜିଆଭା ମଧ୍ୟ ଏହି ଗୀତରେ ନାଚି ପକାଇଲେ । ସ୍ୱାଗତ ମଞ୍ଚରେ ନାଚୁଥିବା କଳାକାରଙ୍କ ସହ ତାଳ ଦେଇ ନାଚିଲେ ସେ । ଡାଲଖାଇ ଓ ସମ୍ବଲପୁରୀ ଗୀତ ସହ ପାରମ୍ପାରିକ ନୃତ୍ୟ ଗୀତ ଜରିଆରେ G-20 ଅତିଥି ମାନଙ୍କୁ ସ୍ୱାଗତ କରିଛନ୍ତି ଓଡ଼ିଆ କଳାକାର ।