ଦେଶରେ ପୁଣି ଡରାଇଲାଣି କରୋନା, ସବୁ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିବେ ପ୍ରଧାନମନ୍ତ୍ରୀ

ଦେଶରେ ପୁଣି ବଢୁଥିବା କରୋନା ସଂକ୍ରମଣ ସ୍ଥିତି ସମ୍ପର୍କରେ ସମୀକ୍ଷା ଲାଗି ଆଜି ସବୁ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏନେଇ ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ଏକ ଭର୍ଚୁଆଲ ବୈଠକ ବସିବ । ଏହି ବୈଠକରେ ସବୁ ରାଜ୍ୟର ମୁଖ୍ୟମନ୍ତ୍ରୀ ଯୋଗଦେବେ । ଦେଶର କିଛି ରାଜ୍ୟରେ ବିଶେଷ କରି ରାଜଧାନୀ ଦିଲ୍ଲୀରେ ଏବେ ଚିନ୍ତା ବଢାଇବାରେ ଲାଗିଛି କରୋନା ସଂକ୍ରମଣ ।

ତେବେ କିଭଳି ଏହାକୁ ମୁକାବିଲା କରାଯିବ, ସେନେଇ ପ୍ରସ୍ତୁତ ରହିବାକୁ ପ୍ରଧାନମନ୍ତ୍ରୀ ଆଜିର ବୈଠକରେ ପରାମର୍ଶ ଦେଇପାରନ୍ତି । କେନ୍ଦ୍ର ସ୍ୱାସ୍ଥ୍ୟ ସଚିବ ରାଜେଶ ଭୂଷଣ ମଧ୍ୟ ବୈଠକରେ ଯୋଗଦେବା ସହ କିଛି ତଥ୍ୟ ଉପସ୍ଥାପନ କରିବାର କାର୍ଯ୍ୟକ୍ରମ ରହିଛି । ଦେଶରେ ଗତ ୨୪ ଘଣ୍ଟାରେ ୨୪୮୩ ନୂଆ ସଂକ୍ରମଣ ଚିହ୍ନଟ ହୋଇଛି ।

ଅନ୍ୟପଟେ କରୋନା ଆତଙ୍କ ଥମିବାର ନାଁ ଧରୁନି । ଏବେ କରୋନାର ଚତୁର୍ଥ ଲହର କିଛି ରାଜ୍ୟରେ ପ୍ରଭାବ ଦେଖାଇବା ଆରମ୍ଭ କରି ଦେଇଛି । ଯାହାକି ବଡ଼ ଲୋକଙ୍କ ସହ ପିଲାଙ୍କୁ ବେଶ୍‌ ପ୍ରଭାବିତ କରିବାରେ ଲାଗିଛି । କରୋନାର ନୂଆ ଲହରରେ ପିଲାଙ୍କ ଭିତରେ ମୁଖ୍ୟତଃ ଗୋଟାଏ ଲକ୍ଷଣ ଅଧିକ ଦେଖିବାକୁ ମିଳୁଛି । ଯାହାକୁ ଆଦୌ ଅଣଦେଖା କରିବା ଉଚିତ ନୁହେଁ ।

କରୋନା କାଳରେ ଯଦି ଆପଣଙ୍କ ପିଲାର ଡାଇରିଆ ହେଉଛି ବା ପେଟ‌ ଦରଜ ହେଉଛି ତାହାଲେ ଏହାକୁ ଆଦୌ ଅଣଦେଖା କରନ୍ତୁ ନାହିଁ। ଏହାଛଡ଼ା ପିଲାଙ୍କ ଶରୀରରେ ଆହୁରି ଅନେକ ଗୁଡ଼ାଏ ଲକ୍ଷଣ ଦେଖାଯାଏ । ଜ୍ୱର ହେବା, ତଣ୍ଟି ଦରଜ ଲାଗିବା, ଶୁଖିଲା କାଶ ହେବା, ଥକ୍କା ଲାଗିବା, ନିଶ୍ୱାସ ନେବାରେ ସମସ୍ୟା ଅନୁଭବ କରିବା, ନାକରୁ ପାଣି ବୋହିବା, ଥଣ୍ଡା ଲାଗିବା, ମୁଣ୍ଡ ବିନ୍ଧା ହେବା, ବାନ୍ତି ଲାଗିବା, ଓ ମାଂସପେଶୀ ଦରଜ ହେବା ଆଦି କରୋନାର ଲକ୍ଷଣ ବୋଲି ସ୍ୱାସ୍ଥ୍ୟ ଗବେଷକମା‌ନେ କହୁଛନ୍ତି ।

ତେବେ ପିଲାଙ୍କ ଶରୀରରେ କରୋନାର ଏସବୁ ଲକ୍ଷଣ ଦେଖାଗଲେ ଆଦୌ ଅଣଦେଖା କରନ୍ତୁ ନାହିଁ । ଏପରିକି ବିଶେଷ ବିବ୍ରତ ହେବାର ମଧ୍ୟ କୌଣସି ଆବଶ୍ୟକତାଦ ନାହିଁ । କାରଣ ଏହା କରୋନାର ଭୟଙ୍କର ଲହର ନୁହେଁ । ମାତ୍ର ସଚେତନତାର ଆବଶ୍ୟକତା ଥିବା ଗବେଷକମାନେ କହିଛନ୍ତି । ଯାହାବି ହେଉ ଦେଶରେ କରୋନା ଗ୍ରାଫ୍ ଉପର ମୁହାଁ ହେବାରେ ଲାଗିଛି । କମିବା ପରେ ପୁଣି କରୋନା ସଂକ୍ରମଣ ବଢିବା ଆରମ୍ଭ ହୋଇଯାଇଛି । ଏବେଠୁ ସତର୍କ ହେବାର ଆବଶ୍ୟକତା ରହିଛି ।