ମୁଖ୍ୟମନ୍ତ୍ରୀ ଚନ୍ନିଙ୍କୁ ଭେଟିବେ ସିଦ୍ଧୁ : ଗତକାଲି ଫୋନରେ ଆଲୋଚନା ହେବା ପରେ ଆଜି ୩ଟାରେ ସାକ୍ଷାତ ପର୍ବ

ଚଣ୍ଡିଗଡ଼ : ନରମିଲେ କି ସିଦ୍ଧୁ ? ପଞ୍ଜାବରେ କଂଗ୍ରେସ ମତଭେଦ ମଧ୍ୟରେ ସ୍ଥିତି ପୁଣି ଥରେ ସ୍ୱାଭାବିକ ହେବା ଭଳି ମନେ ହେଉଛି । ଦଳର ନେତା ରାହୁଲ ଗାନ୍ଧୀଙ୍କ ବୈଠକ ଖବର ମଧ୍ୟରେ ଗୁରୁବାର ଦିନ ଅପରାହ୍ନ ୩ ଟାରେ କଂଗ୍ରେସ ନେତା ନବଜୋତ ସିଂ ସିଦ୍ଧୁ ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନିଙ୍କୁ ଭେଟିବେ । ସିଦ୍ଧୁ ନିଜେ ଏ ସମ୍ପର୍କରେ ସୂଚନା ଦେଇଛନ୍ତି । 'ମୁଖ୍ୟମନ୍ତ୍ରୀ ଆଲୋଚନା ପାଇଁ ଆମନ୍ତ୍ରଣ କରିଛନ୍ତି ବୋଲି ସେ ଟ୍ୱିଟ୍ କରି କହିଛନ୍ତି । ଆଜି ଅପରାହ୍ନ ୩ଟା ସମୟରେ ଚଣ୍ଡିଗଡ଼ର ପଞ୍ଜାବ ଭବନରେ ପହଞ୍ଚି ଆଲୋଚନା କରିବେ । ପଞ୍ଜାବର ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନି ନାରାଜ ଥିବା ନବଜୋତ ସିଂ ସିଦ୍ଧୁଙ୍କ ସହ ଟେଲିଫୋନ୍ ଯୋଗେ ବାର୍ତ୍ତାଳାପ କରି ସମସ୍ୟାର ସମାଧାନ ପାଇଁ ପ୍ରସ୍ତାବ ଦେଇଛନ୍ତି ।

ସିଦ୍ଧୁଙ୍କୁ ମନାଇବା ପାଇଁ ମନ୍ତ୍ରୀ ପରଗଟ୍ ସିଂ, ଅମରିନ୍ଦର ସିଂ ରାଜାଙ୍କ ସମେତ ଅନେକ ନେତା ତାଙ୍କୁ ପଟିଆଲା ସ୍ଥିତ ବାସଭବନରେ ଭେଟିଥିଲେ । ଦଳକୁ ମଜବୁତ କରିବା ପାଇଁ କାର୍ଯ୍ୟ କରିବାକୁ ଚନ୍ନି ସିଦ୍ଧୁଙ୍କୁ ଅନୁରୋଧ କରିଥିଲେ । କୌଣସି ବି ବ୍ୟକ୍ତିବିଶେଷ ଉର୍ଦ୍ଧ୍ୱରେ ଦଳ ଏବଂ ଦଳର ଆଦର୍ଶ ଅନୁସରଣ କରୁଛନ୍ତି ସରକାର ବୋଲି କହିଛନ୍ତି ଚନ୍ନି । ସୂଚନା ଅନୁସାରେ ମନପ୍ରୀତ ସିଂ ବାଦଲ ମଧ୍ୟ ଏହି ସଭାରେ ଉପସ୍ଥିତ ରହିପାରନ୍ତି ।

ବୁଧବାର ଦିନ ସିଦ୍ଧୁ ପୋଲିସ୍ ମହାନିର୍ଦ୍ଦେଶକ, ରାଜ୍ୟ ଆଡଭୋକେଟ୍ ଜେନେରାଲ୍ ଏବଂ "କଳଙ୍କିତ" ନେତାଙ୍କ ନିଯୁକ୍ତିକୁ ନେଇ ପ୍ରଶ୍ନ ଉଠାଇଥିଲେ । ଇସ୍ତଫା ପରେ ଗତକାଲି ନବଜୋତ ସିଂ ସିଦ୍ଧୁ ଏକ ଭିଡିଓ ବାର୍ତ୍ତା ଜାରି କରିଥିଲେ । ଅଧିକାର ଓ ସତ ପାଇଁ ଲଢ଼େଇ ଜାରି ରଖିବା ସହ କୌଣସି ମତେ ବୁଝାମଣା କରିପାରିବେ ନାହିଁ ବୋଲି ଭିଡିଓ ଜରିଆରେ କହିଥିଲେ ସିଦ୍ଧୁ ।

Also Read

ପିପିଲି ବିଧାନସଭା ଉପନିର୍ବାଚନ: ଦିନ ୧୧ ସୁଦ୍ଧା ୨୪.୭୬% ମତଦାନ

ସୁରକ୍ଷିତ ନୁହେଁ କି ପ୍ରେମର ପ୍ରତୀକ ତାଜମହଲ୍ ? ନିଷେଦ୍ଧାଞ୍ଚଳରେ ଉଡ଼ିଲା ଡ୍ରୋନ୍, ୩ ପର୍ଯ୍ୟଟକ ଗିରଫ

ଚାନ୍ଦା ମାଗିଲେ କଡ଼ା କାର୍ଯ୍ୟାନୁଷ୍ଠାନ - କଟକ ଡିସିପି

ଏହାସହ ନବଜୋତ ସିଂ ସିଦ୍ଧୁ କହିଥିଲେ, 'ପ୍ରିୟ ପଞ୍ଜାବୀ ଭାଇମାନେ ୧୭ ବର୍ଷର ରାଜନୈତିକ ଯାତ୍ରା ଏକ ମହତ ଉଦ୍ଦେଶ୍ୟରେ ଆରମ୍ଭ ହୋଇଥିଲା । ପଞ୍ଜାବର ଲୋକଙ୍କ ଜୀବନରେ ଉନ୍ନତି ଆଣିବା ଏବଂ ସେହି ପ୍ରସଙ୍ଗର ରାଜନୀତି କରିବା ଥିଲା ମୂଳ ଲକ୍ଷ୍ୟ । ପଞ୍ଜାବାସୀଙ୍କ ବିକାଶ ମୋର ଧର୍ମ ଥିଲା ଏବଂ ଏହା ମୋର କର୍ତ୍ତବ୍ୟ । ମୁଁ କୌଣସି ବ୍ୟକ୍ତିଗତ ଯୁଦ୍ଧ କରୁନାହିଁ । ମୋର ସଂଗ୍ରାମ ପ୍ରସଙ୍ଗ ପାଇଁ, ପଞ୍ଜାବର ନିଜସ୍ୱ ଏଜେଣ୍ଡା ପାଇଁ । ଏହି ଏଜେଣ୍ଡା ସହିତ, ମୁଁ ମୋର ଅଧିକାର ପାଇଁ ସଂଗ୍ରାମ କରୁଛି । କୌଣସି ଆପୋଷ ବୁଝାମଣା କରିପାରିବି ନାହିଁ ବୋଲି ସେ ସ୍ପଷ୍ଟ କରିଥିଲେ ।