Cyber Fraud:ଲିଟରେ କ୍ଷୀର ପାଇଁ ଉଡିଗଲା ୧୮ ଲକ୍ଷ, ତିନି ତିନିଟା ଆକାଉଣ୍ଟକୁ ପୋଛିନେଲା ଅଦୃଶ୍ୟ ଠକ

ଜଣେ ୭୧ ବର୍ଷୀୟା ବୃଦ୍ଧା ମହିଳା ଅନଲାଇନରୁ ଏକ ଲିଟର କ୍ଷୀର ଅର୍ଡର କରୁଥିବା ବେଳେ ତାଙ୍କ ଆକାଉଣ୍ଟରୁ ୧୮ ଲକ୍ଷ ୫୦ ହଜାର ଟଙ୍କା ଲୁଟି ନେଇଛନ୍ତି ସାଇବର ଠକ । ଘଟଣା ଅଗଷ୍ଟ ୪ ତାରିଖର । ବୃଦ୍ଧା ମହିଳାଙ୍କୁ ଏକ କଲ୍ ଆସିଲା । କଲ୍ କରିଥିବା ବ୍ୟକ୍ତି ନିଜକୁ ଏକ କ୍ଷୀର କମ୍ପାନୀର ଅଧିକାରୀ ଭାବେ ପରିଚୟ ଦେଲା । ନିଜ ନାଁ ଦୀପକ କହିଲା । ଏହାପରେ ସେ ବୃଦ୍ଧାଙ୍କ ଫୋନ୍‌କୁ ଏକ ଲିଙ୍କ ପଠାଇଲା । ସେଇ ଲିଙ୍କ୍‌ରେ କ୍ଲିକ୍‌ କରି ନିଜର ପର୍ସନାଲ ଡିଟେଲ୍ସ ଦେଇ କ୍ଷୀର ଅର୍ଡର କରିବାକୁ କହିଲା ।

ସିଏ ଯେମିତି କହିଲା ମହିଳା ବି ସେମିତି କଲେ । ପ୍ରାୟ ଘଣ୍ଟାଏ ପର୍ଯ୍ୟନ୍ତ ଫୋନ୍‌ରେ ରହି ସେ ନିଜର ସବୁ ଡିଟେଲ୍ସ ଦେଇଥିଲେ । ତା' ପରଦିନ ପୁଣି ମହିଳାଙ୍କୁ କଲ୍ କରି ଆଉ କିଛି ଡିଟେଲ୍ସ ମାଗିଥିଲା ଠକ ।

ଏହାର କିଛି ଦିନ ପରେ ବ୍ୟାଙ୍କ ଯାଇଥିଲେ ମହିଳା । ଆଉ ସେଠି ଆକାଉଣ୍ଟ ଦେଖିବା ପରେ ଉଡିଗଲା ହୋସ୍‌ । ତାଙ୍କର ଗୋଟିଏ ଆକାଉଣ୍ଟରୁ ଲକ୍ଷେ ୭୦ ହଜାର ଟଙ୍କା ଉଠାଣ ହୋଇଥିଲା । ଚେକ୍‌ କରିବାରୁ ଆଉ ଦୁଇଟି ଆକାଉଣ୍ଟରୁ ବି ସବୁତକ ଟଙ୍କା ଗାଏବ ହୋଇସାରିଥିଲା । ମହିଳାଙ୍କୁ ଲିଙ୍କ୍ ପଠାଇ ମୋଟ ୧୮ ଲକ୍ଷ ୫୦ ହଜାର ଟଙ୍କା ଲୁଟି ନେଇଯାଇଥିବା ସାଇବର ଠକ । ଏନେଇ ଥାନାରେ ଅଭିଯୋଗ ପରେ ତଦନ୍ତ ଆରମ୍ଭ କରିଛି ପୋଲିସ ।

ତେବେ ଦେଶରେ ଦିନକୁ ଦିନ ବଢିଚାଲିଛି ସାଇବର ଠକେଇ । କୌଣସି ଅଜଣା ଲିଙ୍କ୍‌ କ୍ଲିକ୍ ନକରିବାକୁ, କାହାରିକୁ ପର୍ସନାଲ ବ୍ୟାଙ୍କିଂ ଡିଟେନ୍ସ ନ ଦେବାକୁ, ଅଜଣା ଆପ୍‌ ଡାଉନଲୋଡ ନକରିବାରୁ ବାରମ୍ବାର ଲୋକଙ୍କୁ ସଚେତନ କରୁଛି ପୋଲିସ । ତଥାପି ନୂଆ ନୂଆ ଚାଲ୍‌ ଚଲାଇ ସାଧାରଣ ଲୋକଙ୍କ ଜୀବନଯାକର ପୁଞ୍ଜି ପୋଛି ନେଉଛନ୍ତି ସାଇବର ଠକ ।