ଅଳସ ଭାଙ୍ଗି ଟ୍ରୋଲ୍‌ ହେଲେ କେଜ୍ରିୱାଲ, ବିଜେପି କହିଲା..

ଦେଶର କିଛି ରାଜ୍ୟରେ କରୋନା ସଂକ୍ରମଣ ବଢ଼ୁଥିବା ବେଳେ କରୋନା ସ୍ଥିତି ସମୀକ୍ଷା ପାଇଁ ଗତକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସବୁ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଭର୍ଚୁଆଲ୍‌ ମୋଡ୍‌ରେ ଆଲୋଚନା କରିଥିଲେ । ତେବେ କରୋନା ସ୍ଥିତିକୁ ଆୟତ୍ତରେ ଆଣିବା ପାଇଁ ମୋଦି ସବୁ ରାଜ୍ୟକୁ ଆଲର୍ଟ ରହିବାକୁ ନିର୍ଦ୍ଦେଶ ମଧ୍ୟ ଦେଇଥିଲେ । ଏହି ଆଲୋଚନା ବେଳେ ଏଭଳି କିଛି ଦୃଶ୍ୟ ଦେଖିବାକୁ ମିଳିଥିଲା, ଯାହାକୁ ନେଇ ସୋସିଆଲ୍‌ ମିଡିଆରେ ଚର୍ଚ୍ଚା ଜୋର୍‌ ଧରିଛି ।

ମୋଦିଙ୍କ ଦ୍ୱାରା ଆୟୋଜିତ ଏହି ଭର୍ଚୁଆଲ୍‌ ମିଟିଂରେ କେଜ୍ରିୱାଲ୍‌ ଅଳସ ଭାଙ୍ଗୁଥିବାର ଦେଖିବାକୁ ମିଳିଛି । ଏହାର ଭିଡିଓ ମଧ୍ୟ ସୋସିଆଲ୍‌ ମିଡିଆରେ ଭାଇରାଲ ହେବାରେ ଲାଗିଛି । ଯାହାକୁ ନେଇ କେଜ୍ରିୱାଲ୍‌ଙ୍କୁ କଡ଼ା ସମାଲୋଚନା କରିଛନ୍ତି ଦେଶବାସୀ । ଏହି ଭିଡିଓରେ ଦେଖିବାକୁ ମିଳିଛି ଯେ, ମୋଦି ସମସ୍ତ ରାଜ୍ୟର ମୁଖ୍ୟମନ୍ତ୍ରୀଙ୍କୁ କୋଭିଡ ସ୍ଥିତି ନେଇ ଆଲୋଚନା କରୁଥିବା ବେଳେ ଅରବିନ୍ଦ କେଜ୍ରିୱାଲ୍‌ ଏହାକୁ ଏକ ପ୍ରକାର ଅଣଦେଖା କରି ହାତ ଟେକି ଅଳସ ଭାଙ୍ଗୁଥିଲେ । ଯାହାକି ଅତି ନିନ୍ଦନୀୟ ବୋଲି ଦିଲ୍ଲୀ ବିଜେପି ପକ୍ଷରୁ କୁହାଯାଇଛି । 

ତେବେ ଦେଶରେ କରୋନା ସ୍ଥିତି ବିଗୁଢିଥିବା ବେଳେ କେଜ୍ରିୱାଲ୍‌ଙ୍କ ଏଭଳି ଦାୟିତ୍ୱହୀନ ଆଚରଣକୁ ନେଇ ପ୍ରତିବାଦ କରିଛି ଦିଲ୍ଲୀ ବିଜେପି ୟୁନିଟ୍‌ ।ଦିଲ୍ଲୀ ବିଜେପିର ଅଫିସିଆଲ୍‌ ଟ୍ୱିଟର୍‌ ପେଜ୍‌ରେ ମଧ୍ୟ କେଜ୍ରିୱାଲ୍‌ଙ୍କର ଏହି ଭିଡିଓକୁ ଅପଲୋଡ୍‌ କରାଯାଇ କ୍ୟାପ୍ସନ୍‌ରେ ଲେଖାଯାଇଛି ଯେ, ‘ ଦିଲ୍ଲୀର ମୁଖ୍ୟମନ୍ତ୍ରୀ ସିଷ୍ଟାଚାର ହୀନ’ ।

କରୋନା ସ୍ଥିତି ସମୀକ୍ଷା ଅବସରରେ ଗତକାଲି ପ୍ରଧାନମନ୍ତ୍ରୀ ମୋଦି କହିଥିଲେ ଯେ, ତୃତୀୟ ଲହର ବେଳେ ଦୈନିକ ୩ ଲକ୍ଷ କେସ୍‌କୁ ଆମେ ସାମ୍ନା କରିଛୁ । ସେତେବେଳେ ସବୁ ରାଜ୍ୟ ସଫଳତାର ସହ ଏହାର ମୁକାବିଲା କରିଥିଲେ। କରୋନା ବିରୋଧରେ ଲଢ଼େଇ ଲଢ଼ି ଚାଲିବା ଓ ଏଥିପାଇଁ ରାସ୍ତା ବାହାର କରିବା ନିହାତି ଆବଶ୍ୟକ ବୋଲି ମୋଦି କହିଥିଲେ ।

ଭାରତ ଅତି ଦୃଢ଼ତାର ସହ କରୋନା ବିରୋଧରେ ଲଢ଼େଇ କରିଛି ଏବଂ ଆଗକୁ ମଧ୍ୟ କରିବ ବୋଲି ମୋଦି କହିଛନ୍ତି । କେନ୍ଦ୍ର-ରାଜ୍ୟ ଏନେଇ ମିଳିତ ଭାବେ ଲଢ଼ିଛନ୍ତି ଏବଂ ଆଗକୁ ମଧ୍ୟ ଲଢ଼ିବା ଉଚିତ୍‌। ସାଂପ୍ରତିକ ଯୁଦ୍ଧ ସ୍ଥିତିରେ କେନ୍ଦ୍ର-ରାଜ୍ୟ ସହଯୋଗ ବଢ଼ିବା ଦରକାର ବୋଲି ପ୍ରଧାନମନ୍ତ୍ରୀ କହିଥିଲେ।

ମୋଦି ଆହୁରି କହିଥିଲେ ଯେ, ଆମ ଟିକାକରଣ କାର୍ଯ୍ୟକ୍ରମ ମଧ୍ୟ ଆମକୁ ଅନେକ ସହଯୋଗ କରିଛି। ଏଯାଏ ୯୬% ଲୋକ କରୋନାର ଟିକାର ପ୍ରଥମ ଡୋଜ୍‌ ନେଇ ସାରିଥିବା ବେଳେ ୧୫ ବର୍ଷରୁ ଅଧିକ ବୟସ୍କଙ୍କ ମଧ୍ୟରୁ ୮୫% ହିତାଧିକାରୀ ଦୁଇଟି ଯାକ ଡୋଜ୍‌ ନେଇଛନ୍ତି।

ଆମକୁ ଏକାଠି ହୋଇ ବେଶ ସକ୍ରିୟ ଭାବେ କରୋନା ସହ ଲଢ଼େଇ କରିବାକୁ ପଡ଼ିବ। ଟେଷ୍ଟିଂ ଓ ଟ୍ରାକିଂକୁ ଗୁରୁତ୍ୱ ଦେବାକୁ ହେବ। ସମସ୍ତ ବହୁବିଧି ରୋଗୀଙ୍କ ଆରଟିପିସିଆର ଟେଷ୍ଟ ଓ ସମସ୍ତ ପଜିଟିଭ ନମୁନାକୁ ଜେନୋମ ସିକ୍ୱେନ୍ସିଂ କରିବାକୁ ପଡ଼ିବ। ଦେଶର ସମସ୍ତ ମେଡିକାଲ କଲେଜ ଓ ଜିଲ୍ଲା ହସ୍ପିଟାଲ ଭିତ୍ତିଭୂମିକୁ ସୁଦୃଢ଼ କରିବାକୁ ମଧ୍ୟ ମୋଦି ପରାମର୍ଶ ଦେଇଥିଲେ ।