Jay And Veeru: ପାଲଟିଗଲେ ଇତିହାସ, କିନ୍ତୁ ମନେ ରହିବେ ସବୁଦିନ ପାଇଁ...କାହାଣୀ ହିଁ କିଛି ଏଭଳି

ଗୁଜରାଟର ଗିର ନ୍ୟାସନାଲ ପାର୍କ ସିଂହମାନଙ୍କ ପାଇଁ ସାରା ବିଶ୍ୱରେ ପ୍ରସିଦ୍ଧ। ଏହି ନ୍ୟାସନାଲ ପାର୍କର ସବୁଠାରୁ ଚର୍ଚ୍ଚିତ ସିଂହ ଯୋଡ଼ି ‘ଜୟ’ ଓ ‘ବୀରୁ’ ଏବେ ଇତିହାସ ହୋଇଗଲେ। ଏମାନଙ୍କର ଗଭୀର ବନ୍ଧୁତା ମଣିଷଙ୍କ ପାଇଁ ଉଦାହରଣ ଥିଲା । ଏହା ହିଁ କାରଣ ଯେ ଏମାନଙ୍କୁ ବ୍ଲକବଷ୍ଟର ଫିଲ୍ମ ‘ଶୋଲେ’ର ପ୍ରସିଦ୍ଧ ଯୋଡ଼ି ‘ଜୟ-ବୀରୁ’ର ନାମ ଦିଆଯାଇଥିଲା।

ବିଗତ କିଛି ବର୍ଷ ଧରି ଏହି ଦୁଇ ସିଂହ ଗୁଜରାଟର ଗିର ନ୍ୟାସନାଲ ପାର୍କର ଗୌରବ ହୋଇ ରହିଥିଲେ। ଏମାନଙ୍କର ଲୋକପ୍ରିୟତା ଏତେ ଥିଲା ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଗିର ଗସ୍ତରେ ଏହି ଯୋଡ଼ିଙ୍କୁ ଦେଖିବାକୁ ଆଗ୍ରହ ଦେଖାଇଥିଲେ ।

ଜୟ ଓ ବୀରୁ ଯୋଡ଼ି ସବୁବେଳେ ଏକାଠି ଦେଖାଯାଉଥିଲେ, କିନ୍ତୁ ଗତ ମାସରେ ଯେତେବେଳେ ସେମାନେ ଅଲଗା ଅଲଗା ଥିଲେ, ସେତେବେଳେ ସିଂହଙ୍କ ଅନ୍ୟ ଏକ ଦଳ ସେମାନଙ୍କ ଉପରେ ଆକ୍ରମଣ କରିଥିଲେ । ଆକ୍ରମଣରେ ଉଭୟେ ଗୁରୁତର ଭାବେ ଆହତ ହୋଇଥିଲେ।

ଆଘାତ ସହ ସଂଘର୍ଷ କରୁଥିବା ବେଳେ ୧୧ ଜୁନରେ ବୀରୁ ପ୍ରାଣ ତ୍ୟାଗ କରିଥିଲା। ଏହାପରେ କିଛି ଦିନ ମୃତ୍ୟୁ ସହ ଲଢ଼େଇ କରି ଜୁଲାଇ ୨୯ରେ ଜୟ ମଧ୍ୟ ଏହି ଦୁନିଆକୁ ଅଲବିଦା କହିଥିଲା।

ଗୁଜରାଟର ମୁଖ୍ୟ ବନ୍ୟଜନ୍ତୁ ଓ୍ୱାର୍ଡେନ ଜୟପାଲ ସିଂହ କହିଛନ୍ତି ଯେ ଜୟ ଓ ବୀରୁ ଏକ ବଡ଼ ସିଂହ ଦଳର ନେତୃତ୍ୱ ନେଉଥିଲେ । ସେ ଆହୁରି କହିଛନ୍ତି, “ଆକ୍ରମଣ ପରେ ଉଭୟଙ୍କୁ ଉଦ୍ଧାର କରାଯାଇଥିଲା, କିନ୍ତୁ ସେମାନେ ଗୁରୁତର ଆହତ ହୋଇଥିଲେ। ସେମାନଙ୍କ ଜୀବନ ବଞ୍ଚାଇବା ପାଇଁ ବହୁତ ଚେଷ୍ଟା କରାଯାଇଥିଲା, କିନ୍ତୁ ସଫଳତା ମିଳି ନଥିଲା।

ରାଜ୍ୟସଭା ସାଂସଦ ପରିମଳ ନାଥୱାନୀ ସିଂହମାନଙ୍କ ମୃତ୍ୟୁରେ ଦୁଃଖ ପ୍ରକାଶ କରିଛନ୍ତି। ସେ ସୋସିଆଲ ମିଡିଆରେ ଲେଖିଛନ୍ତି, “ଗିରର ପ୍ରସିଦ୍ଧ ଜୟ-ବୀରୁଙ୍କ ନିଧନରେ ଗଭୀର ଦୁଃଖ ହୋଇଛି। ଦୀର୍ଘ ଓ ବୀରତ୍ୱପୂର୍ଣ୍ଣ ସଂଘର୍ଷ ପରେ, ସେମାନେ ସେମାନଙ୍କ ଆଘାତ ହେତୁ ପ୍ରାଣ ତ୍ୟାଗ କରିଛନ୍ତି।

ବନ୍ୟ ଅଧିକାରୀ ଓ ପଶୁ ଚିକିତ୍ସକମାନେ ସେମାନଙ୍କୁ ବଞ୍ଚାଇବା ପାଇଁ ଅକ୍ଳାନ୍ତ ପ୍ରୟାସ କରିଥିଲେ। ସେମାନେ ସିଂହମାନଙ୍କୁ ବଞ୍ଚାଇବା ପାଇଁ ସବୁକିଛି କରିଥିଲେ । ଯେଉଁ ବନ୍ୟଜନ୍ତୁ ପ୍ରେମୀ ଏହି ଯୋଡ଼ିର କାହାଣୀ ଶୁଣିଛନ୍ତି, ସେମାନଙ୍କ ପାଇଁ ଏହା ଏକ ବଡ଼ କ୍ଷତି।

ଆମର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ନିକଟରେ ଗିର ଗସ୍ତ ସମୟରେ ଜୟ ଓ ବୀରୁଙ୍କ ରାଜକୀୟ ଗାମ୍ଭୀର୍ଯ୍ୟ ଦେଖିଥିଲେ। ସେମାନଙ୍କ ବିନା ଗିର କେବେବି ପୂର୍ବ ପରି ରହିବ ନାହିଁ।

ଜୟ ଓ ବୀରୁ ଅନେକ ବନ୍ୟଜନ୍ତୁ ଡକ୍ୟୁମେଣ୍ଟାରୀରେ ନାୟକ ହୋଇଛନ୍ତି। ଗିର ଜଙ୍ଗଲରେ ପ୍ରାୟତଃ ଏକାଠି ଦେଖାଯାଉଥିବା ଏହି ଯୋଡ଼ି ପର୍ଯ୍ୟଟକମାନଙ୍କ ପାଇଁ ଆକର୍ଷଣର କେନ୍ଦ୍ରବିନ୍ଦୁ ଥିଲେ। ଏମାନଙ୍କର ବନ୍ଧୁତ୍ବ ଏତେ ଦୃଢ଼ ଥିଲା ଯେ ସେମାନେ ଦୀର୍ଘ ସମୟ ଧରି ଅନ୍ୟ ସିଂହମାନଙ୍କୁ ନିଜ ସୀମାରେ ପ୍ରବେଶ କରିବାକୁ ଦେଇ ନଥିଲେ।