ଭାରତ ଏବଂ ଚୀନ୍ ମଧ୍ୟରେ ଥିବା ସମ୍ପର୍କ ଏବେ ଧୀରେ ଧୀରେ ସୁଧୁରିବାରେ ଲାଗିଛି । ଯାହାର ଉଦାହରଣ ଦୀପାବଳି ଅବସରରେ ଆଜି ଲାଇନ୍ ଅଫ୍ ଆକ୍ଚୁଆଲ୍ କଣ୍ଟ୍ରୋଲ୍(LAC)ରେ ଦେଖିବାକୁ ମିଳିଥିଲା । ଯେଉଁଠାରେ ଆଲୋକର ପର୍ବ ଦୀପାବଳି ଅବସରରେ ଭାରତୀୟ ଏବଂ ଚୀନ୍ ସୈନିକମାନେ ପରସ୍ପରକୁ ମିଠା ଉପହାର ଦେଇଥିଲେ ।
Also Read
ଏମିତି ସମୟରେ ଏହି ଚିତ୍ର ସାମ୍ନାକୁ ଆସିଛି ଯେତେବେଳେ ଉଭୟ ଦେଶ ପୂର୍ବ ଲଦାଖର ଦୁଇଟି ସମ୍ବେଦନଶୀଳ ପଏଣ୍ଟ ଡେମଚୋକ୍ ଓ ଦୀପସାଙ୍ଗରୁ ସମତଳ ଭୂମିରେ ଉଭୟ ପକ୍ଷର ସଫଳତାର ସହ ସୈନ୍ୟ ଅପସାରଣ ସଂପୂର୍ଣ୍ଣ ହୋଇସାରିଛି । ଯେତେବେଳେ ଦିୱାଲୀ ଅବସରରେ ଏହିପରି ଚିତ୍ର ସାମ୍ନାକୁ ଆସିଲା, କୂଟନୈତିକ ଦୃଷ୍ଟିକୋଣରୁ ଏହା ଏକ ଗୁରୁତ୍ୱପୂର୍ଣ୍ଣ ସଫଳତା ଭାବରେ ବିବେଚନା କରାଯାଏ ।
ଭାରତ-ଚୀନ୍ ସୀମା ଚୁସୁଲ-ମୋଲ୍ ଡୋ ବର୍ଡର ନିକଟ ମିଟିଂ ପଏଣ୍ଟରେ ଦୁଇ ସେନା ମଧ୍ୟରେ ମିଠା ଆଦାନ ପ୍ରଦାନ କରାଯାଇଛି । ଖାଲି ମୋଲ୍ ଡୋ ବର୍ଡରରେ ନୁହେଁ ବରଂ ଭାରତ-ଚୀନ୍ ସୀମାନ୍ତ ବିଭିନ୍ନ ବର୍ଡର ପଏଣ୍ଟରେ ଏହି ଖୁସିର ଅବସର ଦେଖିବାକୁ ମିଳିଛି । ହଟସ୍ପ୍ରିଙ୍ଗ ହେଉ କି କାରାକୋରମ ପାସ୍ ସବୁଠି ଦୁଇ ଦେଶର ସେନା ମିଠା ଆଦାନ ପ୍ରଦାନ କରିଛନ୍ତି । ସେହିଭଳି ଦୌଲତବେଗ୍ ଏବଂ ଲଦାଖର କୋଙ୍ଗକ୍ଲା ପଏଣ୍ଟରେ ଭାରତ-ଚୀନ୍ ସେନା ପରସ୍ପରକୁ ମିଠା ଆଦାନ ପ୍ରଦାନ କରିଛନ୍ତି ।
ଋଷର କାଜାନ ସହରରେ ଅନୁଷ୍ଠିତ ବ୍ରିକ୍ସ ସମ୍ମିଳନୀରେ ପ୍ରଧାନମନ୍ତ୍ରୀ ମୋଦୀ ଏବଂ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ମଧ୍ୟରେ ପ୍ରାୟ ୫୦ ମିନିଟ୍ ଧରି ଦ୍ୱିପାକ୍ଷିକ ବୈଠକ ହୋଇଥିଲା । ପାଞ୍ଚ ବର୍ଷ ପରେ ଦୁଇ ନେତାଙ୍କ ମଧ୍ୟରେ ହୋଇଥିବା ଏହି ବୈଠକରେ ପ୍ରଧାନମନ୍ତ୍ରୀ ମୋଦୀ ସି ଜିନପିଙ୍ଗଙ୍କୁ ସ୍ପଷ୍ଟ ଭାବରେ କହିଥିଲେ କି ଉଭୟ ଦେଶର ସମ୍ପର୍କର ଉନ୍ନତି ପାଇଁ ସୀମାରେ ଶାନ୍ତି ଆବଶ୍ୟକ ।
ଦୁଇ ନେତା ବୁଧବାର ଦିନ ପୂର୍ବ ଲଦାଖରେ ଥିବା ଲାଇନ୍ ଅଫ୍ ଆକ୍ଟୁଆଲ୍ କଣ୍ଟ୍ରୋଲ୍ (LAC) ରେ ଗସ୍ତ ଏବଂ ପାଟ୍ରୋଲିଂ ଉପରେ ଭାରତ-ଚୀନ୍ ଚୁକ୍ତିନାମାକୁ ସମର୍ଥନ କରିଛନ୍ତି । ଏହାସହିତ ୨୦୨୦ରେ ଏକ ମାରାତ୍ମକ ସାମରିକ ସଂଘର୍ଷର ସମ୍ମୁଖୀନ ହୋଇଥିବା ବିଭିନ୍ନ ଦ୍ୱିପାକ୍ଷିକ କଥାବାର୍ତ୍ତା ପ୍ରଣାଳୀକୁ ପୁନର୍ଜୀବିତ କରିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି ।
ଡେମଚୋକ୍ ଓ ଦୀପସାଙ୍ଗରୁ ଅସ୍ଥାୟୀ ଟେଣ୍ଟ୍ ହଟାଇବା ପରେ ଉଭୟ ଦେଶର ସୈନ୍ୟମାନେ ଏପ୍ରିଲ୍ ୨୦୨୦ ସ୍ଥିତିକୁ ଫେରି ଆସିଛନ୍ତି । ସୀମାରୁ ସେନା ଅପସାରଣ ପରେ ପ୍ରଥମ ଥର ପାଇଁ ସେନା ଆଜି ପ୍ରାରମ୍ଭିକ ପାଟ୍ରୋଲିଂ ଆରମ୍ଭ କରିବ ।