Prayagraj : ଚାରିଆଡ଼େ ଖାଲି ପାଣି ଆଉ ପାଣି, ଗଙ୍ଗା ଓ ଯମୁନାର ଜଳସ୍ତରରେ ରେକର୍ଡ ବୃଦ୍ଧି

ଉତ୍ତର ପ୍ରଦେଶର ପ୍ରୟାଗରାଜରେ ପ୍ରବଳ ବର୍ଷା ପରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଲୋକମାନଙ୍କୁ ଘରୁ ବାହାରକୁ ଆସିବା ପାଇଁ ଡଙ୍ଗାର ସାହାଯ୍ୟ ନେବାକୁ ପଡ଼ୁଛି। ଏନଡିଆରଏଫର ଦଳ ପ୍ରତ୍ୟେକ ଗଳିରେ ଉଦ୍ଧାର କାର୍ଯ୍ୟ ଚଳାଇଛନ୍ତି ।

ପରିସ୍ଥିତି ଏମିତି ଯେ ଅନେକ ରାସ୍ତା ସହରରୁ ସମ୍ପୂର୍ଣ୍ଣ ରୂପେ ବିଚ୍ଛିନ୍ନ ହୋଇଯାଇଛି। ବର୍ତ୍ତମାନ ଲୋକମାନଙ୍କୁ ସେମାନଙ୍କ ଘରୁ ଉଦ୍ଧାର କରାଯାଉଛି ଏବଂ ସୁରକ୍ଷିତ ସ୍ଥାନକୁ ନିଆଯାଉଛି । କୌଣସି ସୁବିଧା ମିଳୁନାହିଁ ।

ପ୍ରୟାଗରାଜରେ ଅନେକ ଘର ଏମିତି ଅଛି ଯେଉଁଗୁଡ଼ିକ ସମ୍ପୂର୍ଣ୍ଣ ରୂପେ ଜଳମଗ୍ନ ହୋଇଯାଇଛି। ଏହାଦ୍ୱାରା କ୍ଷୟକ୍ଷତି କେତେ ତାହା ଅନୁମାନ କରାଯାଇପାରେ। ବର୍ତ୍ତମାନ ପରିସ୍ଥିତି ଏମିତି ଯେ ଲୋକମାନଙ୍କୁ ମୌଳିକ ସୁବିଧା ମଧ୍ୟ ମିଳୁନାହିଁ। ରାସନ ଏବଂ ଅନ୍ୟ ଜରୁରୀ ଜିନିଷ ପାଇଁ ଲୋକମାନେ ଏନଡିଆରଏଫ ଦଳ ଉପରେ ହିଁ ନିର୍ଭର କରୁଛନ୍ତି।

ଗଙ୍ଗାର ପାଣି ଗଳିଗୁଡ଼ିକରେ ଏତେ ଭରି ଯାଇଛି ଯେ ପାଦରେ କିମ୍ବା ଗାଡ଼ିରେ ଏଠାକୁ ଯିବା ଅସମ୍ଭବ। ବର୍ତ୍ତମାନ ଡଙ୍ଗା ହିଁ ଲୋକମାନଙ୍କ ପାଇଁ ଏକମାତ୍ର ସାହାରା ପାଲଟିଛି ।ପ୍ରୟାଗରାଜରେ ହଠାତ୍ ବନ୍ୟା ପରିସ୍ଥିତି ସୃଷ୍ଟି ହେବାରୁ ସେଠାରେ ରହୁଥିବା ଲକ୍ଷ ଲକ୍ଷ ଲୋକ ପ୍ରଭାବିତ ହୋଇଛନ୍ତି।

ଲୋକମାନେ କହୁଛନ୍ତି ହଠାତ ରାସ୍ତା ଓ ଗଳିଗୁଡ଼ିକରେ ପାଣି ଭରିବା ଆରମ୍ଭ ହେଲା ଏବଂ ସେମାନଙ୍କୁ କିଛି ଭାବିବାର କି କରିବାକୁ ସୁଯୋଗ ମଧ୍ୟ ମିଳିଲା ନାହିଁ। ପାଣି ଗଳିରେ ପଶୁଥିବାର ଦେଖି ଗ୍ରାଉଣ୍ଡ ଫ୍ଲୋରରେ ରହୁଥିବା ଲୋକମାନେ ତୁରନ୍ତ ଛାତକୁ ଚାଲିଯାଇଥିଲେ ।

ଅଧିକାରୀମାନେ କହୁଛନ୍ତି ଯେ ଗଙ୍ଗା ଓ ଯମୁନାର ଜଳସ୍ତରରେ ରେକର୍ଡ ବୃଦ୍ଧି ଦେଖାଯାଇଛି ଏବଂ ଏହା ବିପଜ୍ଜନକ ସ୍ତର ପର୍ଯ୍ୟନ୍ତ ପହଞ୍ଚିବାକୁ ଯାଉଛି। ବର୍ତ୍ତମାନ ଜଳସ୍ତର ୮୩ ମିଟର ଅତିକ୍ରମ କରିସାରିଛି, ଆଗାମୀ ତିନି ଦିନରେ ଏହା ଆହୁରି ଦ୍ରୁତ ଗତିରେ ବଢ଼ିବାର ସମ୍ଭାବନା ରହିଛି। ବନ୍ୟା ପରିସ୍ଥିତିର ମୁକାବିଲା ପାଇଁ ପ୍ରଶାସନ ମଧ୍ୟ କାମ ଆରମ୍ଭ କରିଦେଇଛି ।ସ୍ଥାନୀୟ ପୁଲିସ ସହିତ ଏନଡିଆରଏଫ ଓ ଏସଡିଆରଏଫର ଟିମ ନିରନ୍ତର କାମ କରୁଛନ୍ତି। ଯେଉଁମାନଙ୍କୁ ଉଦ୍ଧାରର ଆବଶ୍ୟକତା ଅଛି, ସେମାନଙ୍କ ପାଖକୁ ଯଥାଶୀଘ୍ର ପହଞ୍ଚିବାକୁ ଚେଷ୍ଟା କରାଯାଉଛି।

ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ବନ୍ୟା ପ୍ରଭାବିତ ୧୨ଟି ଜିଲ୍ଲା ପାଇଁ ୧୧ ଜଣିଆ ଟିମ୍ ଗଠନ କରିଛନ୍ତି। ଏଥିରେ ବିଭିନ୍ନ ମନ୍ତ୍ରୀ ଅଛନ୍ତି, ଯେଉଁମାନଙ୍କୁ ବିଭିନ୍ନ ଜିଲ୍ଲାରେ ରିଲିଫ୍ ଓ ଉଦ୍ଧାର କାର୍ଯ୍ୟର ନିରୀକ୍ଷଣର ଦାୟିତ୍ୱ ଦିଆଯାଇଛି। ବନ୍ୟା ପ୍ରଭାବିତ ଲୋକମାନଙ୍କ ପାଇଁ ରିଲିଫ୍ ଶିବିର ମଧ୍ୟ ସ୍ଥାପନ କରାଯାଇଛି।