LIVE TV
ଦେଶରେ ପ୍ରତିଦିନ କିଛି ନା କିଛି ଅଜବ ଗଜବ ଘଟଣା ଦେଖିବାକୁ ମିଳିଥାଏ। ସେହିପରି କିଛି ଘଟଣା ରାଜସ୍ଥାନର ଦୌସା ସହରରେ ଦେଖିବାକୁ ମିଳିଛି । ଜଣେ ୫ମ ଶ୍ରେଣୀର ଝିଅଟି କଲେକ୍ଟର ହେବାର ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି । ୫ମ ଶ୍ରେଣୀରେ ପାଠ ପଢୁଥିବା ଝିଅ ପୁଣି କଲେକ୍ଟର, ଶୁଣିଲେ ଟିକେ ଆଶ୍ଚର୍ଯ୍ୟ ଲାଗୁଥିବ, କିନ୍ତୁ ଏହା ସମ୍ପୂର୍ଣ୍ଣ ଭାବେ ସତ ବୋଲି ଦେଖିବାକୁ ମିଳିଛି । ଏହି ଘଟଣାଟି ସମ୍ପୂର୍ଣ୍ଣ ବଲିଉଡ ଚଳଚିତ୍ର ‘ନାୟକ’ ଭଳି ।
ଯଦି ଆପଣ ପୂର୍ବରୁ ‘ନାୟକ’ ଚଳଚିତ୍ର ଦେଖିଥିବେ, ତେବେ ଏହି ଘଟଣାଟି ଆପଣଙ୍କୁ ଏହାର ପୁନରାବୂର୍ତ୍ତୀ ବୋଲି ଲାଗିବ, କାରଣ ୫ମ ଶ୍ରେଣୀର ଝିଅକୁ ଗୋଟିଏ ଦିନ ପାଇଁ କଲେକ୍ଟରର କ୍ଷମତା ଦିଆଯାଇଛି । ଏହି ଘଟଣାଟି ରାଜସ୍ଥାନର ଦୌସା ସହରରେ ଘଟିଛି । ବାସ୍ତବରେ ବାଳିକାଙ୍କ ଶିକ୍ଷା କ୍ଷେତ୍ରରେ ଅଗ୍ରଗତି ଓ ପ୍ରୋତ୍ସାହନ ଦେବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ‘କାଉଁସିଲିଙ୍ଗ୍ ବାଏ କଲେକ୍ଟର’ କାର୍ଯ୍ୟକ୍ରମର ଆୟୋଜନ କରାଯାଇଥିଲା । ଏହି କାର୍ଯ୍ୟକ୍ରମରେ ୫ମ ଶ୍ରେଣୀରେ ପାଠ ପଢୁଥିବା ଝିଅ ନବ୍ୟା ଅବସ୍ତି ଜିଲ୍ଲା କଲେକ୍ଟରଙ୍କୁ ଏକ ପ୍ରଶ୍ନ ପଚାରିଥିଲେ ଯେ, ଆପଣ ଝିଅଙ୍କ ଭବିଷ୍ୟତ ପାଇଁ କ’ଣ ଭାବିଛନ୍ତି ? କୁନି ଝିଅର ଏହି ପ୍ରଶ୍ନର ପ୍ରଶଂସା କରିବା ସହ କଲେକ୍ଟର ସାର୍ ଝିଅକୁ ନିଜ ସିଟ୍ରେ ବସାଇ ଗୋଟେ ଦିନ ପାଇଁ କଲେକ୍ଟର ହେବା ପାଇଁ ଅନୁମତି ଦେଇଥିଲେ ।
Also Read
କଲେକ୍ଟରଙ୍କ ସିଟ୍ରେ ବସିବା କ୍ଷଣି ନବ୍ୟାଙ୍କୁ କିଛି ନିଷ୍ପତ୍ତି ନେବା ପାଇଁ ଅନୁମତି ଦିଆଯାଇଥିଲା । ନବ୍ୟା ତତ୍କ୍ଷଣାତ ନିଜ ସ୍କୁଲରେ ପାଠାଗାର(ଲାଇବ୍ରେରି) ନିର୍ମାଣ ପାଇଁ ନିର୍ଦ୍ଦେଶ ଦେଇଥିଲେ । ଏହି ନିର୍ଦ୍ଦେଶ କ୍ରମେ ନବ୍ୟାଙ୍କ ସ୍କୁଲରେ ପାଠାଗାର ନିର୍ମାଣ କାର୍ଯ୍ୟ ମଧ୍ୟ ଆରମ୍ଭ ହୋଇଥିବାର ଦେଖିବାକୁ ମିଳିଛି ।
ବାସ୍ତବରେ ପିଲାଙ୍କ ପରୀକ୍ଷା ନିକଟତର ହେବାରୁ ଜିଲ୍ଲା ମାଜିଷ୍ଟ୍ରେଟଙ୍କ ପକ୍ଷରୁ ନାରୀ ସଶକ୍ତିକରଣକୁ ପ୍ରୋତ୍ସାହନ ଦେବା ପାଇଁ ‘କାଉଁସିଲିଙ୍ଗ୍ ବାଏ କଲେକ୍ଟର’ କାର୍ଯ୍ୟକ୍ରମର ଆୟୋଜନ କରାଯାଇଥିଲା । ଏହି କାର୍ଯ୍ୟକ୍ରମରେ ବ୍ୟକ୍ତିଗତ ଜୀବନ ବିଷୟ ହେଉ ଅବା ସଂଘର୍ଷର କାହାଣୀ କିମ୍ବା ବାଳିକା ସନ୍ତାନଙ୍କ ବ୍ୟକ୍ତିଗତ ସମସ୍ୟା ଯୋଗୁଁ ସମାଜରେ ଘଟୁଥିବା ପ୍ରତିଟି ଘଟଣା ଉପରେ ଖୋଲା ଖୋଲି ଆଲୋଚନା କରାଯାଇଥିଲା ।
ଏହି କାର୍ଯ୍ୟକ୍ରମରେ ୫୦ରୁ ଅଧିକ ସ୍କୁଲର ୫ମ ରୁ ଆରମ୍ଭ କରି ଦ୍ୱାଦଶ ପର୍ଯ୍ୟନ୍ତ ପାଠ ପଢୁଥିବା ଛାତ୍ରୀ ଯୋଗ ଦେଇଥିଲେ । ଦୌସାର ଜିଲ୍ଲା ମାଜିଷ୍ଟ୍ରେଟ କମର୍ ଉଲ୍ ଜମାନ୍ ଚୌଧରୀ ପିଲାଙ୍କ ସହ ନାରୀ ସଶକ୍ତିକରଣ ବିଷୟରେ ଆଲୋଚନା କରିଥିଲେ । ଏହି ସଭାରେ ଝିଅମାନେ କଲେକ୍ଟରଙ୍କୁ ଅନେକ ପ୍ରଶ୍ନ ପଚାରିଥିଲେ । କଲେକ୍ଟରଙ୍କ ବ୍ୟତୀତ ଆଇଆରଏସ୍ ଅଧିକାରୀ ଫରାହ୍ ହୁସେନ୍, ଡକ୍ଟର ରିତି ଶର୍ମା, ଆସିଷ୍ଟାଣ୍ଟ କଲେକ୍ଟର ମନୀଷା ମୀନା, ଜିଏମ୍ ଉଦ୍ୟୋଗୀ ଶିଳ୍ପା ଗୋଖରୁ ମଧ୍ୟ ଉପସ୍ଥିତ ରହିଥିଲେ ।
ସେଠାରେ ଥିବା ଛାତ୍ରୀମାନେ କଲେକ୍ଟରଙ୍କୁ ନା ନା ପ୍ରଶ୍ନ ପଚାରିଥିଲେ ଯେ, ଆପଣ କିପରି ଭାବେ ଏହି ପଦବୀରେ ପହଞ୍ଚିଲେ, ଆପଣଙ୍କୁ ଏନେଇ କିପରି ସଂଘର୍ଷ କରିବାକୁ ପଡିଥିଲା, ପରିବାର ପକ୍ଷରୁ କେତେ ସମର୍ଥନ ମିଳିଥିଲା ଇତ୍ୟାଦି । ସେମାନଙ୍କ ମଧ୍ୟରୁ କିଛି ଜଣ, ସ୍କୁଲ ମାନଙ୍କରେ ଶୌଚାଳୟର ଫାଟକ ନଥିବା ଯୋଗୁଁ ବାଳିକା ମାନଙ୍କର ଗୋପନୀୟତା ଉଲଙ୍ଘନ ହେଉଥିବା ପ୍ରସଙ୍ଗ ମଧ୍ୟ ଉଠାଇଥିଲେ ।
