କାଶ୍ମୀରରୁ ପାକିସ୍ତାନକୁ ପୁଣି ଧମକ ଦେଲେ ରାଜନାଥ, କହିଲେ ପରିଣାମ ଭୋଗିବାକୁ ପଡ଼ିବ

କାଶ୍ମୀର ମାଟିରୁ ପାକିସ୍ତାନକୁ ଚେତାବନୀ ଦେଇ ବର୍ଷିଲେ ପ୍ରତିରକ୍ଷାମନ୍ତ୍ରୀ ରାଜନାଥ ସିଂହ । କହିଲେ, ପାକିସ୍ତାନ ଆତଙ୍କବାଦକୁ ପ୍ରୋତ୍ସାହନ ଦେଉଛି । ଭାରତ ବିରୋଧରେ ଆତଙ୍କୀଙ୍କୁ ବ୍ୟବହାର କରୁଛି । ଇସଲାମାବାଦକୁ ଏହାର ପରିଣାମ ଭୋଗିବାକୁ ପଡିବ । ପାକ୍ ଅଧିକୃତ କାଶ୍ମୀରରେ ଲୋକଙ୍କ ପ୍ରତି ବଢୁଥିବା ଆକ୍ରୋଶକୁ ବି କଡ଼ା ଭାଷାରେ ନିନ୍ଦା କରି ପଡ଼ୋଶୀ ଦେଶକୁ ଚତାବନୀ ଦେଇଛନ୍ତି ପ୍ରତିରକ୍ଷା ମନ୍ତ୍ରୀ ।

କାଶ୍ମୀରରେ ସୌର୍ଯ୍ୟ ଦିବସ ଅବସରରେ ଆୟୋଜିତ କାର୍ଯ୍ୟକ୍ରମରେ ଯୋଗଦେଇ ରାଜନାଥ କହିଛନ୍ତି, ଗିଲଗିଟ୍-ବାଲଟିସ୍ତାନ ବିନା ଜମ୍ମୁ-କାଶ୍ମୀରର ବିକାଶ ଅଧୁରା । ଜମ୍ମୁ-କାଶ୍ମୀର ଓ ଲଦାଖର ବିକାଶର ଯାତ୍ରା ଆରମ୍ଭ ହୋଇସାରିଛି । ଗିଲଗିଟ୍-ବାଲଟିସ୍ତାନ ଯାଏଁ ପହଞ୍ଚିବା ପରେ ହିଁ ଭାରତର ଏହି ଯାତ୍ରା ସଫଳ ହେବ ଏବଂ ଲକ୍ଷ୍ୟ ପୂରଣ ହେବ । ୧୯୪୭ ମସିହା ଆଜିର ଦିନରେ ଶ୍ରୀନଗରରେ ଲାଣ୍ଡିଂ କରିଥିଲା ଭାରତୀୟ ବାୟୁସେନା । ଏହି ଦିନକୁ ସୌର୍ଯ୍ୟ ଦିବସ ଭାବେ ପାଳନ କରାଯାଉଛି ।

ଏହାସହ ସେ ଆହୁରି କହିଛନ୍ତି, ଯେ ପାକିସ୍ତାନ ସାଧାରଣ ଲୋକଙ୍କ ଉପରେ ଯେଉଁ ଅତ୍ୟାଚାର କରୁଛି, ଏହାର ପରିଣାମ ମଧ୍ୟ ତାକୁ ଭୋଗିବାକୁ ପଡ଼ିବ । ରାଜନାଥ କହିଛନ୍ତି ଯେ ଆତଙ୍କବାଦର କୌଣସି ଧର୍ମ ନାହିଁ । ପାକିସ୍ତାନ ଆତଙ୍କବାଦୀଙ୍କ ଆଶ୍ରୟସ୍ଥଳୀ ପାଲଟିଛି । ସେହିପରି ଜମ୍ମୁ କଶ୍ମୀରରେ ଧାରା ୩୭୦ ଉଚ୍ଛେଦ ପରେ ସେମାନେ ସମ୍ମୁଖୀନ ହେଉଥିବା ଭେଦଭାବକୁ ସମାପ୍ତ କରାଯାଇଛି ।