LIVE TV
କୁକୁର ଓ ମାଲିକ ମଧ୍ୟରେ ଥିବା ନିବିଡ଼ ବନ୍ଧୁତାର ନିଦର୍ଶନ । ନିଜ ଜୀବନର ଏକ ଅଂଶ ପାଲିଟିଥିବା କୁକରର ଅବର୍ତ୍ତମାନରେ ତା ପାଇଁ ପ୍ରତିମୂର୍ତ୍ତି ତିଆରି କଲେ ମାଲିକ । ତାମିଲନାଡୁର ୮୨ ବର୍ଷ ବୟସ୍କ ବ୍ୟକ୍ତି ମୁଥୁ ନିଜ ସ୍ୱର୍ଗତ ପୋଷା କୁକୁର ଟମ ସ୍ମୃତିରେ ଏକ ମାର୍ବଲ ପ୍ରତିମୂର୍ତ୍ତି ନିର୍ମାଣ କରିଛନ୍ତି । ଏଥିପାଇଁ ସେ ୮୦,୦୦୦ ଟଙ୍କା ଖର୍ଚ୍ଚ କରିଛନ୍ତି ବୋଲି ଜଣାପଡ଼ିଛି ।
ମନାମଦୁରେ ନିବାସୀ ମୁଥୁ ଜଣେ ଅବସରପ୍ରାପ୍ତ ସରକାରୀ କର୍ମଚାରୀ । ପୋଷା କୁକୁର ଟମ୍ ସହିତ ତାଙ୍କ ସମ୍ପର୍କ ଖୁବ ନିଆରା । ଟମ୍ ଥିଲା ଏକ ଲାବ୍ରାଡୋର ପ୍ରଜାତିର କୁକୁର । ୨୦୧୦ରୁ ଘରେ ଏକ ସଦସ୍ୟ ପରି ରହୁଥିଲା ଟମ୍ । ପୋଷା କୁକୁର ନୁହେଁ, ପୁଅ ପରି ତାକୁ ସ୍ନେହ କରୁଥିଲେ ଘର ଲୋକ । ହେଲେ ଅସୁସ୍ଥତା କାରଣରୁ ୨୦୨୧ରେ ତା’ର ମୃତ୍ୟୁ ହୋଇଯାଇଛି । ଟମର ଅଚାନକ୍ ମୃତ୍ୟୁ ପରେ ଦୁଃଖରେ ଭାଙ୍ଗିପଡ଼ିଥିଲେ ମୁଥୁ ।
ତା’ପରେ ଟମର ସ୍ମୃତିରେ ଚାଷ ଜମିରେ ଏକ ପ୍ରତିମୂର୍ତ୍ତି ନିର୍ମାଣ କରିଛନ୍ତି ମୁଥୁ । ଚଳିତ ବର୍ଷ ଜାନୁଆରୀରେ ସ୍ଥାପିତ ହୋଇଛି ମାର୍ବଲ ପ୍ରତିମୂର୍ତ୍ତି । ଗୃହପାଳିତ ପଶୁ ସହିତ ମାଲିକଙ୍କ ସମ୍ପର୍କକୁ ସବୁଦିନ ପାଇଁ ସ୍ମରଣୀୟ କରିବାକୁ ସେ ଏପରି କରିଥିବା କଥା କହିଛନ୍ତି । ତେବେ ସେ ପ୍ରତିଦିନ କୁକୁରର ମୂର୍ତ୍ତିକୁ ଖାଇବା ମଧ୍ୟ ଦିଅନ୍ତି । ସେହିପରି ପର୍ବପର୍ବାଣୀରେ ଟମ୍ର ପ୍ରିୟ ଖାଦ୍ୟ ପରଷାଯାଇଥାଏ ।
Tamil Nadu | Muthu, an 82-year-old man has built a statue in memory of his dog, Tom in Sivaganga's Manamadurai.
— ANI (@ANI) April 5, 2022
"I have affection for my dog more than for my child. Tom was with me since 2010 but he died in 2021. My grandparents and father all were dog lovers," he said pic.twitter.com/TGl1FFSBaY
ମୁଥୁଙ୍କ ଭଣଜା ମନୋଜ କୁମାର କହିଛନ୍ତି, ଲାବ୍ରାଡୋର ପ୍ରଜାତିର କୁକୁର ଟମଙ୍କୁ ୧୧ ବର୍ଷ ପୂର୍ବେ ତାଙ୍କ ଭାଇ ଅରୁଣ କୁମାର କିଣିଥିଲେ । ତେବେ ଛଅ ମାସ ପର୍ଯ୍ୟନ୍ତ କୁକୁରର ଯତ୍ନ ନେଇଥିଲେ, ପରେ ତାର ଦେଖାଶୁଣା କରିବାକୁ ଅକ୍ଷମ ହେବାରୁ କାକା ମୁଥୁଙ୍କୁ କୁକୁରକୁ ଦେଇ ଦେଇଥିଲେ । ଜେଜେବାପା ଏବଂ ବାପା ସମସ୍ତେ କୁକୁର ପ୍ରେମୀ ଥିଲେ ବୋଲି ସେ କହିଛନ୍ତି।"
