ଘର ତିଆରି ପାଇଁ ମିଳିଥିଲା ଟଙ୍କା। ହେଲେ ସଂସାର ଉଜାଡି ଦେଲା ପ୍ରଧାନମନ୍ତ୍ରୀ ଆବାସ ଟଙ୍କା। ଆବାସ ଯୋଜନାର ପ୍ରଥମ କିସ୍ତି ପାଇବା ପରେ ୧୧ଜଣ ମହିଳା ସେମାନଙ୍କର ସ୍ୱାମୀଙ୍କୁ ଛାଡି ପ୍ରେମିକଙ୍କ ସହ ଫେରାର୍ ହୋଇଯାଇଥିବା ଅଭିଯୋଗ ହୋଇଛି। ଉତ୍ତରପ୍ରଦେଶ ମହାରାଜଗଞ୍ଜ ନିଚଲୈଲାର ଏହି ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଏହି ଘଟଣା ଜଣାପଡିବା ପରେ ସ୍ଥାନୀୟ ପ୍ରଶାସନ ତଦନ୍ତ ଆରମ୍ଭ କରିଛି।
୨୦୨୩-୨୪ ଆର୍ଥିକ ବର୍ଷ ପାଇଁ ୧୦୮ଟି ଗାଁର ୨୩୫୦ ହିତାଧିକାରୀ ଚୟନ କରାଯାଇଥିଲା। ହିତାଧିକାରୀଙ୍କ ମଧ୍ୟରେ କିଛି ମହିଳା ମଧ୍ୟଥିଲେ। ପ୍ରଧାନମନ୍ତ୍ରୀ ଆବାସ ଯୋଜନାର ପ୍ରଥମ କିସ୍ତି ବାବଦରେ ୪୦ହଜାର ଟଙ୍କା ମିଳିଥିଲା। ତେବେ ଏହି ଟଙ୍କା ନେଇ ୧୧ଜଣ ମହିଳା ନିଜ ସ୍ୱାମୀ ଓ ସଂସାର ଛାଡି ଫେରାର ହୋଇଯାଇଥିବା ପୋଲିସ ନିକଟରେ ଅଭିଯୋଗ ହୋଇଛି। ଏନେଇ ସେମାନଙ୍କର ପରିବାର ଲୋକ ମଧ୍ୟ ଚିନ୍ତାରେ ପଡିଛନ୍ତି।
Also Read
ଜଣେ ହିତାଧିକାରୀ ମହିଳାଙ୍କ ଶାଶୂ କହିଛନ୍ତି ଯେ ବୋହୂ ଅନ୍ୟ କାହା ସହ ପଳାଇ ଗଲା। ତା ନାଁରେ ଆକାଉଣ୍ଟକୁ ଟଙ୍କା ଆସିଛି। ମୋ ପୁଅ ବି ଘରେ ନାହିଁ। ଆମେ କେଉଁଠାରୁ ଟଙ୍କା ଆଣିଦେବୁ? ଅନ୍ୟ ଜଣେ ହିତାଧିକାରୀ ମହିଳାଙ୍କ ଶ୍ୱଶୁର କହିଛନ୍ତି ଯେ ପ୍ରଧାନମନ୍ତ୍ରୀଙ୍କ ବାସଭବନ ବୋହୂ ନାଁରେ ଆସିଥିଲା। ଗୋଟିଏ କିସ୍ତି ଆସିଲା, କିନ୍ତୁ ବୋହୂ ଟଙ୍କା ଉଠାଇ ଫେରାର୍ ହୋଇଗଲା। ବର୍ତ୍ତମାନ ଅଧିକାରୀମାନେ ଯାଞ୍ଚ ପାଇଁ ଆସୁଛନ୍ତି। ଆମେ ଗରିବ ଲୋକ। କେଉଁଠାରୁ ଟଙ୍କା ପାଇବୁ ଯେ ଘର କରିବୁ ବୋଲି କହିଛନ୍ତି।ଏନେଇ ମହିଳାଙ୍କ ସ୍ୱାମୀ ଥାନାର ଦ୍ୱାରସ୍ଥ ହୋଇଛନ୍ତି। ପ୍ରଥମ କିସ୍ତି ପରେ ଦ୍ୱିତୀୟ କିସ୍ତି ବାବଦ ଅର୍ଥ ସେମାନଙ୍କ ଆକାଉଣ୍ଟକୁ ନ ପଠାଇବାକୁ ସେମାନେ ଜିଲ୍ଲା ପ୍ରଶାସନକୁ ନିବେଦନ କରିଛନ୍ତି।
ଏହି ପରିପ୍ରେକ୍ଷୀରେ ମହାରାଜଗଞ୍ଜର ଜିଲ୍ଲା ମାଜିଷ୍ଟ୍ରେଟ୍ କହିଛନ୍ତି ଯେ ଯେଉଁମାନେ ଘର ନିର୍ମାଣରେ ଟଙ୍କା ବ୍ୟବହାର କରିନାହାଁନ୍ତି ସେମାନଙ୍କ ସଂପର୍କରେ ବିଡିଏଙ୍କୁ ଯାଞ୍ଚ ନିର୍ଦ୍ଦେଶ ଦେଇଛନ୍ତି। ଏହିପରି ହିତାଧିକାରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ। ତୁରନ୍ତ ସେମାନଙ୍କଠାରୁ ସରକାରୀ ଅର୍ଥ ଫେରାଇ ଆଣିବାକୁ ପ୍ରୟାସ କରାଯିବ ବୋଲି ସେ କହିଛନ୍ତି।
PMAY ଯୋଜନା ଅଧୀନରେ ଗରିବ ଏବଂ ମଧ୍ୟବିତ୍ତ ପରିବାର ସ୍ଥାୟୀ ଘର ନିର୍ମାଣ ପାଇଁ ସରକାରଙ୍କଠାରୁ ସହାୟତା ପାଇଥାଆନ୍ତି । ପରିବାରର ଆୟ ଉପରେ ନିର୍ଭର କରି ସରକାର ୨.୫ ଲକ୍ଷ ଟଙ୍କା ପର୍ଯ୍ୟନ୍ତ ସବସିଡି ମଧ୍ୟ ପ୍ରଦାନ କରୁଛନ୍ତି। ତେବେ ଏଥିରେ କିଛି ଅସୁବିଧା ହେଲେ ଅଧିକାରୀମାନେ ହିତାଧିକାରୀଙ୍କଠାରୁ ଟଙ୍କା ଫେରସ୍ତ ମାଗିପାରିବେ।