୧୦ ବର୍ଷ ବାଳକର ଓଜନ ୨୦୦ କେଜି!

ଜାକର୍ତ୍ତା: ଓଜନ ବୃଦ୍ଧି ହେଉଛି ଆଜିର ସମୟର ସବୁଠାରୁ ବଡ ସମସ୍ୟା। ବୟସ ବଢିବା ସହିତ ପ୍ରାୟ ପ୍ରତ୍ୟେକ ବ୍ୟକ୍ତି ଏହାର ଶିକାର ହୁଅନ୍ତି। କିନ୍ତୁ ଭାବନ୍ତୁ ଯଦି ପିଲାଟି ଅଳ୍ପ ବୟସରେ ଭାରୀ ଓଜନର ଶିକାର ହୁଏ, ତେବେ ତା’ ପାଇଁ ଅନେକ ସମସ୍ୟା। ଯଦି ଛୋଟ ପିଲା ଟିକେ ଗୋଲଗାଲ ହୋଇଥାନ୍ତି ତେବେ ଏହାକୁ ସୁନ୍ଦର ବୋଲି ଅନେକ କୁହନ୍ତି। କିନ୍ତୁ ଯଦି ଏହି ଓଜନ ସୀମା ଅତିକ୍ରମ କରେ ତେବେ ଏହା ଚିନ୍ତାର ବିଷୟ ପାଲଟିଯାଏ। ଏବେ ଏପରି ଏକ ଖବର ଆସିଛି ଯେଉଁଠାରେ ଏକ ଛୋଟ ପିଲା ନିଜ ଓଜନ କାରଣରୁ ଚର୍ଚ୍ଚାରେ ରହିଛି।

ଭାରୀ ଓଜନ ଯୋଗୁଁ ରେକର୍ଡ:

ଇଣ୍ଡୋନେସିଆର ପଶ୍ଚିମ ଜାଭାସ୍ଥିତ ଏକ ଛୋଟ ଗାଁର ଜଣେ ବାଳକ ୫ ବର୍ଷ ପୂର୍ବେ ଚର୍ଚ୍ଚାକୁ ଆସିଥିଲେ। ସେତେବେଳେ ସେ ୯ ବର୍ଷର ହୋଇଥିବା ବେଳେ ତାଙ୍କ ଓଜନ ୧୨୭ କିଲୋଗ୍ରାମରୁ ଅଧିକ ଥିଲା। ଆର୍ଯ୍ୟ ପରମାନା ନାମକ ଏହି ପିଲାଟି ୧୪ ବର୍ଷ ବୟସରେ ଅବିଶ୍ୱସନୀୟ ୩୦ ତାଲିକାରେ ୧୩ ତମ ସ୍ଥାନ ଅଧିକାର କରିଛି। ବର୍ତ୍ତମାନ ଏହି ବାଳକଟିର ଓଜନ ୮୨ କିଲୋଗ୍ରାମ। କିନ୍ତୁ ଏହି ପିଲାଟି ଯେତେବେଳେ ୧୧ ବର୍ଷର ଥିଲା ତା’ର ଓଜନ ୧୯୧ କେଜି ଥିଲା। ସେତେବେଳେ ସେ ସବୁଠାରୁ ଓଜନ ମଣିଷ ତାଲିକାର ତୃତୀୟ ସ୍ଥାନରେ ରହିଥିଲା।

ମୋଟା କାରଣରୁ କୁଣ୍ଡରେ ଗାଧୋଉଥିଲେ:

ଏକ ରିପୋର୍ଟ ଅନୁଯାୟୀ, ସେ ଏତେ ମୋଟା ଥିଲେ ଯେ ବାଥ୍‌ରୁମ୍‌ରେ ଗାଧୋଇବାରେ ସମସ୍ୟା ହେଉଥିଲା। ତେଣୁ ସେ ବାହାରେ ଏକ ବଡ କୁଣ୍ଡରେ ଗାଧୋଉଥିଲେ। ଆର୍ଯ୍ୟଙ୍କ ଶରୀର ଏପରି ଥିଲା ଯେ ଯଦି ସେ କିଛି ବାଟ ଚାଲିଯାଉଥିଲେ ତେବେ ସେ ଶ୍ୱାସରୁଦ୍ଧ ହୋଇଯାଉଥିଲେ। ସେଥିପାଇଁ ସେ ସ୍କୁଲ୍‌ ଯାଇପାରିଲେ ନାହିଁ। ପିଲାଟିର ପରିବାର ଲୋକ ମଧ୍ୟ ତା’ ପାଇଁ ପୋଷାକ କିଣି ପାରୁ ନଥିଲେ। ସେତେବେଳେ ସେ କେବଳ ଜଙ୍କ୍‌ ଫୁଡ୍‌ ଓ ନୁଡୁଲ୍ସ ଖାଉଥିଲେ, ସେଥିପାଇଁ ତାଙ୍କ ଶରୀରର ଆକୃତି ଏହିପରି ହୋଇଯାଇଥିଲା।

କେମିତି ହଟିଲା ଓଜନ:

ପରବର୍ତ୍ତୀ ସମୟରେ ନିୟନ୍ତ୍ରିତ ଖାଦ୍ୟ ଓ ନିୟମିତ ବ୍ୟାୟାମ ଏବଂ ଗ୍ୟାଷ୍ଟ୍ରିକ୍ ବ୍ୟାଣ୍ଡ ଅପରେସନ୍ ହେତୁ ଆର୍ଯ୍ୟ ୩ ବର୍ଷରେ ୧୦୪ କିଲୋଗ୍ରାମ ଓଜନ କମେଇଥିଲେ। ପିଲାଟି ଶରୀରରେ ଥିବା ଅତିରିକ୍ତ ଚର୍ମକୁ ବାହାର କରିବା ପାଇଁ ଅଧିକ ଅସ୍ତ୍ରୋପଚାର କରାଯାଇଥିଲା ​​ଏବଂ ମହାମାରୀ ପରେ ଅଧିକ ଚର୍ମ କାଟିବା ପାଇଁ ଅଧିକ ପ୍ରକ୍ରିୟା କରାଯିବ।

ସେ ଏବେ ଖେଳନ୍ତି ଆଉ ଗଛ ଚଢିପାରନ୍ତି:

ବର୍ତ୍ତମାନ ସେ ଦିନକୁ ୩ କିମି ଚାଲନ୍ତି, ବାସ୍କେଟବଲ୍ ଖେଳନ୍ତି ଏବଂ ଗଛ ଚଢି ପାରୁଛନ୍ତି। ସେ ମୋଟରସାଇକେଲ୍ ମଧ୍ୟ ଚଲେଇପାରନ୍ତି। ବିଶେଷ କଥା ହେଉଛି କରୋନା ଲକଡାଉନ୍ ପୂର୍ବରୁ ଆର୍ଯ୍ୟ ବିଦ୍ୟାଳୟକୁ ଯିବା ଆରମ୍ଭ କରିଥିଲେ। ସେ କୁହନ୍ତି ଯେ '୨୦୧୫ରେ, ମୋର ଆଶା ନଥିଲା ଯେ ମୁଁ ମୋ ଓଜନ କମେଇ ପାରିବି। ବର୍ତ୍ତମାନ ମୁଁ ଖୁବ୍ ଭଲ ଆଉ ବହୁତ ଅଲଗା ଅନୁଭବ କରୁଛି।

ସୂଚନାଯୋଗ୍ୟ ଯେ ୧୦ ବର୍ଷ ବୟସରେ ଆର୍ଯ୍ୟ ଫିଜି ପାନୀୟ ଏବଂ ନୁଡୁଲ୍ସରେ ଅଭ୍ୟସ୍ତ ଥିଲେ। ସେ କେବଳ ଭାତ, ମାଛ ତରକାରୀ, ଗୋମାଂସ, ପନିପରିବା ସୁପ୍ ଭଳି ଖାଦ୍ୟ ଖାଉଥିଲେ। ତାଙ୍କ ମା ରୋକାୟାହ ଓ ବାପା ତାଙ୍କ ଶରୀରର ଆକାରକୁ ନେଇ ଖୁବ୍ ଚିନ୍ତିତ ଥିଲେ। ସେ ତାଙ୍କ ଠାରୁ ଜଙ୍କ୍ ଫୁଡ୍ ଦୂରେଇବାରେ ସଫଳ ହୋଇଥିଲେ।