ବଡଦାଣ୍ଡରେ କାମ କରୁନାହିଁ ଟ୍ୟାପ୍‌, ପାଣି ଟୋପାଏ ପାଇଁ ଡହଳବିକଳ ପର୍ଯ୍ୟଟକ

ଟ୍ୟାପ୍ ଅଛି, ହେଲେ ବାହାରୁନି ପାଣି । ଦୀର୍ଘ ଦିନ ହେଲା ଅଚଳ ପଡ଼ିଛି ପୁରୀ ବଡ଼ଦାଣ୍ଡର ଟ୍ୟାପ୍‌ । ବିଶୁଦ୍ଧ ପାଣି ଯୋଗାଇବା ଉଦ୍ଦେଶ୍ୟରେ ଗତ ଜୁଲାଇ ୨୬ ତାରିଖରେ ଦେଶର ପ୍ରଥମ ସହର ଭାବେ ପୁରୀରେ ଆରମ୍ଭ ହୋଇଥିଲା ଡ୍ରିଙ୍କ୍ ଫ୍ରମ୍ ଟ୍ୟାପ୍ ଯୋଜନା । ହେଲେ ତାହା ଏବେ ଅଚଳ ଅବସ୍ଥାରେ ପଡିରହିଛି ।

ଯୋଜନା ଉଦ୍‌ଘାଟନର ୬ ମାସ ପୂରିନଥିବା ବେଳେ ଅଧିକାଂଶ ସ୍ଥାନରୁ ଗାଏବ୍ ହୋଇଗଲାଣି ଟ୍ୟାପ୍ କିଛି ସ୍ଥାନରେ ଟ୍ୟାପ୍‌ରୁ ବହୁ ଧିରେ ଧିରେ ପାଣି ବାହାରୁଥିବା ବେଳେ ମରାମତି ହେଉନଥିବା ଲୋକେ ଅଭିଯୋଗ କରିଛନ୍ତି । ସେହିପରି କିଛି ସ୍ଥାନରେ ପାଣି ବାହାରୁଥିଲେ ମଧ୍ୟ ବଡ଼ଦାଣ୍ଡରେ ପଡ଼ିଥିବା କ୍ୟାବିନ୍ ଆଢ଼ୁଆଳରେ ଏହା ରହିଯାଉଛି ଫଳରେ ଏହାର ସୁବିଧା ପାଇବାରୁ ପର୍ଯ୍ୟଟକମାନେ ବଞ୍ଚିତ ହେଉଛନ୍ତି ।

ସୂଚନା ଅନୁସାରେ, ପ୍ରତି ବର୍ଷ ପୁରୀକୁ ପ୍ରାୟ ୨ କୋଟି ପର୍ଯ୍ୟଟକ ଆସୁଥିବା ବେଳେ ସେମାନେ ପାଣି ବୋତଲ କିଣି ବ୍ୟବହାର କରୁଥିବାରୁ ଟନ୍ ଟନ୍ ପ୍ଲାଷ୍ଟିକ ବର୍ଜ୍ୟ ସୃଷ୍ଟି ହୋଇଥାଏ ପ୍ଲାଷ୍ଟିକ୍ ଆବର୍ଜନାରୁ ସହରକୁ ମୁକୁଳାଇବା ଲକ୍ଷ୍ୟରେ ବଡ଼ଦାଣ୍ଡରେ ଏହି ଟ୍ୟାପ୍ ବ୍ୟବସ୍ଥା କରାଯାଇଥିଲା । ପର୍ଯ୍ୟଟକମାନେ ପାଣି ବୋତଲ ନକିଣି ଯେପରି ଟ୍ୟାପ୍‌ରୁ ବିଶୁଦ୍ଧ ପାଣି ପାଇବା ଉଦ୍ଦେଶ୍ୟରେ ବଡ଼ଦାଣ୍ଡରେ ଉଭୟ ପାର୍ଶ୍ୱରେ ୪୦୦ ଡ୍ରିଙ୍କ୍ ଫ୍ରମ୍ ଟ୍ୟାପ୍ ଲାଗିଥିଲା ।

ଏହି ଟ୍ୟାପ୍‌ର ଏଭଳି ସ୍ଥିତି ଦେଖି ପର୍ଯ୍ୟଟକମାନେ ଟ୍ୟାପ୍‌ ବଦଳରେ ଏବେ ପାଣି ବୋତଲ କିଣି ପିଇବାକୁ ବାଧ୍ୟ ହେଉଛନ୍ତି । ଏନେଇ ପୁରୀ ଜିଲ୍ଲାପାଳ ସମର୍ଥ ବର୍ମା କହିଛନ୍ତି ଯେ, ବର୍ତ୍ତମାନ ବଡ଼ଦାଣ୍ଡରେ ୧୨୦ଟି ପଏଣ୍ଟ ସଚଳ ଥିବାବେଳେ, କିଛି ପୁରୁଣା ଟ୍ୟାପ୍ ଖରାପ ଅଛି, ସେଗୁଡିକ ମରାମତି କରାଯାଉଛି ।

ଡ୍ରିଙ୍କ୍ ଫ୍ରମ୍ ଟ୍ୟାପ ଯୋଜନା ହେବା ପରେ ସରକାର ଭାବିଥିଲେ ପ୍ଲାଷ୍ଟିକ୍ ମୁକ୍ତ ହେବ ପୁରୀ ସହର, ପର୍ଯ୍ୟଟକ ପାଇବେ ବିଶୁଦ୍ଧ ପାଣି । ହେଲେ ଟ୍ୟାପ୍‌ ରକ୍ଷଣାବେକ୍ଷଣ ଅଭାବରୁ ଏହାର ପ୍ରକୃତ ଉଦ୍ଦେଶ୍ୟ ସାଧିତ ହେବା ନେଇ ସାଧାରଣରେ ଆଶଙ୍କା ପ୍ରକାଶ ପାଇଛି ।