ଭିଜିଲାନ୍ସ ଜାଲରେ ବିଦ୍ୟୁତ ବିଭାଗ କାର୍ଯ୍ୟନିର୍ବାହୀ ଯନ୍ତ୍ରୀ; ଏକକାଳୀନ ୫ଟି ସ୍ଥାନରେ ଚଢ଼ାଉ

ଭିଜିଲାନ୍ସ ଜାଲରେ ପଡିଲେ ବିଦ୍ୟୁତ ବିଭାଗ କାର୍ଯ୍ୟନିର୍ବାହୀ ଯନ୍ତ୍ରୀ । ଆୟ ବହିର୍ଭୁତ ସଂପତ୍ତି ଠୁଳ ଅଭିଯୋଗରେ ତାଙ୍କ ଘରେ ଓ ଅଫିସରେ ଭିଜିଲାନ୍ସର ଏକ ବଡ଼ ଟିମ୍ ଚଢ଼ାଉ କରୁଛି । ଇଂଜିନିୟର ଜଣକ ବ୍ରହ୍ମପୁର ରୁରାଲ୍ ଓ୍ୱାର୍କସ୍ ଇଲେକ୍ଟ୍ରିକାଲ ଡିଭିଜନରେ କାମ କରୁଥିବା ଜଗନ୍ନାଥ ସେଠୀ ବୋଲି ଜଣାପଡିଛି ।

ଖୋର୍ଦ୍ଧା ଓ ଗଂଜାମ ଜିଲ୍ଲାର ୫ଟି ସ୍ଥାନରେ ଏହି ଚଢ଼ାଉ ଚାଲିଛି । ବ୍ରହ୍ମପୁର ଗଜପତି ନଗରରେ ଥିବା ୪ ମହଲା କୋଠା, ୧୧ ନମ୍ବର ଲେନ୍ରେ ଥିବା ୫ ମହଲା ବିଶିଷ୍ଟ କୋଠା, ଭୁବନେଶ୍ୱର ଏମ୍ସ ନଗରରେ ଥିବା ୪ ମହଲା କୋଠା, ଆମ୍ବପୁଆରେ ଥିବା ଅଫିସ ଏବଂ ଛତ୍ରପୁର ପୁଟ୍ଟବଗଡ଼ରେ ଜଗନ୍ନାଥଙ୍କ ପୈତୃକ ବାସଭବନରେ ଏହି ରେଡ୍ ଚାଲିଛି  । 

ସୂଚନା ଅନୁସାରେ, ଭିଜିଲାନ୍ସ ଚଢ଼ାଉ ବେଳେ ଘରର ମୁଖ୍ୟ ଦ୍ୱାର ନଖୋଲିବାରୁ କବାଟ ଭାଂଗି ଘର ଭିଜିଲାନ୍ସ ଟିମ୍ ଭିତରକୁ ପଶିଥିଲା । ବ୍ରହ୍ମପୁର ବିଦ୍ୟୁତ ବିଭାଗ କାର୍ଯ୍ୟନିର୍ବାହୀ ଯନ୍ତ୍ରୀ ଜଗନ୍ନାଥ ସେଠୀଙ୍କ ଭୁବନେଶ୍ୱର ଘର ମୁଖ୍ୟ ଦ୍ୱାର ଭାଂଗି ଭିଜିଲାନ୍ସ ପକ୍ଷରୁ ରେଡ୍ କରିଛିରାଯାଇଛି । ଭିଜିଲାନ୍ସକୁ କାର୍ଯ୍ୟନିର୍ବାହୀ ଯନ୍ତ୍ରୀ ଓ ତାଙ୍କ ପୁଅଙ୍କ ଅସହଯୋଗ କରିବାରୁ ଭିଜିଲାନ୍ସ ଟିମ୍ ଜୋର ଜବରଦସ୍ତ ଭିତରକୁ ପଶିଥିଲା । ସର୍ଚ୍ଚ ଓ୍ୱାରେଣ୍ଟ ଦେଖାଇବା ସତ୍ତ୍ୱେ ଉଭୟ ଭିଜିଲାନ୍ସ ଟିମ୍‌କୁ ଘର ଭିତରକୁ ଛାଡ଼ିନଥିଲେ ।  ଦୁଇ ଜଣଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଭିଜିଲାନ୍ସ ପକ୍ଷରୁ ସୂଚନା ଦିଆଯାଇଛି ।

ଭିଜିଲାନ୍ସ ରେଡ୍ ବେଳେ ଲକ୍ଷାଧିକ ଟଙ୍କାର କ୍ୟାସ ଜବତ ହୋଇଛି। କେବଳ ଏତିକି ନୁହେଁ ବେଡ୍‌ର ଶେଜ ତଳେ ବିଡ଼ା ବିଡ଼ା ଟଙ୍କା ଲୁଚାଇ ରଖିଥିଲେ ଜଗନ୍ନାଥ ସେଠୀ ।ତାଙ୍କର ବ୍ରହ୍ମପୁର ଘରୁ ପ୍ରାୟ ୧୭ ଲକ୍ଷ ଟଙ୍କା ଜବତ ହୋଇଛି । ବ୍ରହ୍ମପୁର, ଛତ୍ରପୁର ଏବଂ ଭୁବନେଶ୍ୱର ସମେତ ଏକକାଳୀନ ୫ଟି ସ୍ଥାନରେ ରେଡ୍ ଚାଲିଛି ।