କଲେଜ କ୍ୟାମ୍ପସରେ ସୁସ୍ୱାଦୁ ଖାଦ୍ୟର ପସରା

ଭଳିକି ଭଳି ସୁସ୍ୱାଦୁ ଖାଦ୍ୟର ପସରା ଷ୍ଟଲ ମାନଙ୍କରେ ଲାଗିଛି ଲେକଙ୍କ ଭିଡ଼ ଚିକେନ ପକୋଡା, ମଞ୍ଚୁରିଆନ୍, ସାଣ୍ଡଓ୍ୱିସ୍, ଚିକେନ ବିରିୟାନି, ଭଳିକି ଭଳି ସୁଆଦିଆ ଖାଦ୍ୟ ପରସୁଛନ୍ତି ଛାତ୍ରଛାତ୍ରୀ । ସେହିପରି ପାରମ୍ପରିକ ପୋଡପିଠା, ଚକୁଳିପିଠା,ରସାବଳୀ,ଆରିଷା, କାକରାଠାରୁ ଲସି, ଲେମ୍ବୁ ସରବତ ପର୍ଯ୍ୟନ୍ତ ବିଭିନ୍ନ ପ୍ରକାର ଖାଦ୍ୟର ସମ୍ଭାର । କଟକ ଜିଲ୍ଲା ଅସୁରେଶ୍ୱରର ଶୁଭଦ୍ରା ମହତାବ ମହାବିଦ୍ୟାଳୟରେ ପ୍ରଥମ କରି ‌ଆୟୋଜିତ ହୋଇଛି ଖାଦ୍ୟ ମେଳା। କଲେଜର ଛାତ୍ରଛାତ୍ରୀମାନେ ନିଜେ ଏହି ସମସ୍ତ ଖାଦ୍ୟକୁ ତିଆରି କରି ଷ୍ଟଲ ମାଧ୍ୟମରେ ବିକ୍ରି କରି ବେଶ ଆନନ୍ଦିତ ।

ଏହି ଖାଦ୍ୟ ମେଳାର ଉଦ୍ଦେଶ୍ୟ ହେଉଛି ପିଲାମାଙ୍କ ଭିତରେ ଦେଶୀ ଖାଦ୍ୟ ତିଆରି କଳା, ପରସିବା କଳା ଓ ଖାଦ୍ୟ ପ୍ରତି ଆଦର ଶିଖାଇବା ଦିନକୁ ଦିନ ବେକାରି ସମସ୍ୟା ବୃଦ୍ଧି ପାଉଥିବାବେଳେ ପ୍ରତିଟି ପିଲା କିଭଳି ଆତ୍ମନିର୍ଭରଶୀଳ ହୋଇପାରିବେ, ତଥା ଚାକିରି ନଥିଲେ ବି ବେକାର ନବସି ଅନ୍ୟ ପନ୍ଥା ଆପଣାଇ ସ୍ୱାବଲମ୍ବି ହେବେ ସେଥିପାଇଁ ଏ ମେଳାର ‌ଆୟୋଜନ ବୋଲି କହିଛନ୍ତି କଲେଜର ଅଧ୍ୟକ୍ଷ ।

ପାଠପଢା ସାଙ୍ଗକୁ ଯୁବପିଢି କିଭଳି ବିଭିନ୍ନ କଳାକୌଶଳ ଶିଖି ଜଣେ ଜଣେ ସଫଳ ଉଦ୍ୟୋଗୀ ବନି ପାରିବେ ସେଥିପ୍ରତି କଲେଜ କତ୍ତୃପକ୍ଷଙ୍କ ଏ ପଦକ୍ଷେପ ବେଶ୍ ସ୍ୱାଗତଯୋଗ୍ୟ ।