ନେତା ଓ ପ୍ରଶାସକଙ୍କ ମଧ୍ୟରେ ବିବାଦ ! ଅଳିଆ ଉଠାଇଲେନି ସଫେଇ କର୍ମଚାରୀ

ନଗଳପାଳଙ୍କ ସହ ନିର୍ବାହୀ ଅଧିକାରୀଙ୍କର ତିକ୍ତତାର ଫଳ ଭୋଗୁଛନ୍ତି ତାଳଚେରବାସୀ । ଉଭୟଙ୍କ ମଧ୍ୟ ଥିବା ମତାନ୍ତର ପାଇଁ ନଷ୍ଟ ହେଉଛି ସହରର ପରିମଳ ବ୍ୟବସ୍ଥା । ସ୍ଥିତି ଏମିତି ହୋଇଥିଲା ଯେ, ଗଣେଶ ପୂଜା ଭିଡ ଭିତରେ ପଚାସଢା ଗନ୍ଧରେ ବୁଲିବାକୁ ବାଧ୍ୟ ହୋଇଥିଲେ ସହରବାସୀ। କାରଣ ବକେୟା ଦରମା ଓ ବୋନସ ଦାବିରେ ଆନ୍ଦୋଳନ କରିଥିଲେ ସଫେଇ କର୍ମଚାରୀ । ଆଉ ଆନ୍ଦୋଳନର ମାତ୍ରା ଏମିତି ଥିଲା ଯେ ପୂରା ଅଂଚଳରେ ପଡି ରହିଥିଲା କୁଢ କୁଢ ଅଳିଆ ।

ସହରର ରାସ୍ତା ଉପରେ ପଡି ରହିଛି କୁଢ କୁଢ ଅଳିଆ । ଗାଈ ଗୋରୁ, ବୁଲା କୁକୁର ସେସବୁ ଖାଇବା ସହ ଇଆଡେ ସିଆଡେ ପିଙ୍ଗା ଫୋପଡା କରୁଛନ୍ତି । ତାଳଚେର ପୌର ପରିଷଦରେ ଠିକା କର୍ମଚାରୀ ଭାବରେ ୧୩୨ ଜଣ ସଫେଇ କର୍ମଚାରୀ କାମ କରୁଛନ୍ତି । ହେଲେ ଗତ ଦୁଇ ମାସ ହେଲା ଏହି କର୍ମଚାରୀ ମାନେ ଦରମା ପାଇ ନଥିବା ସେମାନେ ଅଭିଯୋଗ କରିଛନ୍ତି ।

ଏମିତିକି ତାଳଚେର ର ଗଣପର୍ବ ଗଣେଶ ପୂଜା ବେଳେ ମଧ୍ୟ ଏମାନଙ୍କୁ ବୋନସ ଦିଆଯାଇନଥିବା କର୍ମଚାରୀମାନେ ଅଭିଯୋଗ କରିଛନ୍ତି। ଅଭିଯୋଗ ଏତିକିରେ ସରୁନି ବରଂ ଦୁଇ ବେଳା କାମ କରୁଥିବା ପରେ ବି ଗୋଟିଏ ବେଳା ହାଜିରା ପଡୁଥିବା କହିଛନ୍ତି ସଫେଇ କର୍ମଚାରୀ। ଏନେଇ ଅଭିଯୋଗ ପରେ ବି ସେମାନଙ୍କ କଥା କେହି ଶୁଣୁନାହାନ୍ତି ।

ଗୁରୁତ୍ୱପୂର୍ଣ୍ଣ କଥା ହେଲା ସଫେଇ କର୍ମଚାରୀ ଦୁଇ ବେଳା କାମ କରୁଥିବା ସହ ସେମାନଙ୍କ ହାଜିରା ସଠିକ୍‌ ଭାବରେ କାହିଁକି ପଡୁନାହିଁ ବୋଲି ସେମାନେ ପ୍ରଶ୍ନ କରିବା ସହ ଆନ୍ଦୋଳନ କରି ପୌର କାର୍ଯ୍ୟଳୟ ସମ୍ମୁଖରେ ଧାରଣା ଦେଇଥିଲେ।

ତେବେ ଏନେଇ ନଗରପାଳଙ୍କ କୌଣସି ପ୍ରତିକ୍ରିୟା ମିଳିପାରିନଥିବା ବେଳେ ପୌର ନିର୍ବାହୀ ଅଧିକାରୀ କ୍ୟାମେରା ସାମ୍ନାରେ କିଛି କହିବେନି ବୋଲି ମନା କରିଦେଇଛନ୍ତି । ହେଲେ ପୌର ନିର୍ବାହୀ ଅଧିକାରୀ ଓ ନଗରପାଳଙ୍କ ତିକ୍ତତା ଯୋଗୁଁ ହଇରାଣ ହେଉଛନ୍ତି ସଫେଇ କର୍ମଚାରୀ ଓ ଅଂଚଳବାସୀ । ତେବେ ଏ ସମସ୍ୟାର ସ୍ଥାୟୀ ସମାଧାନ ନହେଲେ ଆଗାମୀ ଦିନରେ ଆନ୍ଦୋଳନକୁ ଜୋରଦାର କରାଯିବ ବୋଲି କହିଛନ୍ତି ସଫେଇ କର୍ମଚାରୀ। 

(ରିପୋର୍ଟ- ମନୀଲ ମହାରଣା, ତାଳଚେର)