‘ମୁଁ ହାରିବା ଲୋକ ନୁହେଁ, ଥରେ ମୋ ବରା ଘୁଘୁନି ଖାଇକି ଦେଖ’

ଗ୍ୟାସ ଉପରେ ଗରମ ତେଲ ବସିଛି । ଆଉ ସେଥିରେ ବରା, ପକୁଡି ସହିତ ଗରମ ଗରମ ପିଆଜି ଛଣାଯାଉଛି । ଥାଳିରେ ଛଣା ହେଉ ହେଉ ରାଗୁଆ ଘୁଘୁନି ସାଙ୍ଗରେ ଧଡାଧଡ ଖାଇ ଚାଲିଛନ୍ତି ଗ୍ରାହକ । ଏମିତିକି କଢେଇରୁ ବାହାରିବା ପୂର୍ବରୁ ତେଲବାଝୀ ଖାଇବାକୁ ଲୋକଙ୍କର ଲାଗେ ଲାଇନ୍‌ । ଛଣାଛଣି ଯିଏ କରୁଛନ୍ତି ସେ ଜଣେ ଦିବ୍ୟାଙ୍ଗ । ପିଲାଟି ଦିନରୁ ଗୋଡ ଚଳୁନି ହେଲେ ହାର ମାନିନାହାନ୍ତି ବରଂ ଦୋକାନ କରି ଭଲ ଦୁଇ ପଇସା ରୋଜଗାର କରୁଛନ୍ତି ।

ବରା ପକୁଡି ଛାଣୁଥିବା ବ୍ୟକ୍ତି ଜଣକ ହେଉଛନ୍ତି ବାସୁଦେବ ସାହୁ । ଗାଁରେ ସମସ୍ତେ ଡାକନ୍ତି ବାସୁ ମଉସା । ଆଉ ୟାଙ୍କ ହାତରେ ଏମିତି ଯାଦୁ ଅଛି ଯେ ସୁଆଦିଆ ବରା, ପିଆଜି ଛାଣୁଛାଣୁ ଟେକି ନେଉଛନ୍ତି ଗ୍ରାହକ । ଗଜପତି ଜିଲ୍ଲା ମୋହନା ବ୍ଲକ ମେରାପଲ୍ଲୀ ଗାଁର ବାସୁଦେବ ସାହୁ ପିଲାଟି ଦିନରୁ ଦିବ୍ୟାଙ୍ଗ । ଗୋଡ ଦୁଇଟି ସମ୍ପୂର୍ଣ ଭାବେ ଅଚଳ ହୋଇ ଯାଇଛି । ଆଶା ବାଡି ଧରିଲେ ବି ଠିକ୍‌ରେ ଚାଲିପାରୁନାହାନ୍ତି ।

ବାପା ବହୁ କଷ୍ଟରେ ମାଟ୍ରିକ ଯାଏଁ ପାଠ ପଢ଼ାଇଲେ । ଆଉ ତା’ପରେ ନିଜ ଗୋଡରେ ନିଜେ ଛିଡା ହେବାକୁ ଚେଷ୍ଟା କଲେ ବାସୁ । ପ୍ରଥମେ ୧୦୦ ଟଙ୍କାରେ ଛୋଟିଆ ଚା’ ଜଳଖିଆ ଦୋକାନ ଆରମ୍ଭ କରିଥିଲେ । ସେତିକିରୁ ଯାହା ଯେତିକି ରୋଜଗାର ହୁଏ ସେତିକିରେ ନିଜେ ଚଳିବା ସହିତ ପରିବାର ଚଳାଉଥିଲେ ବାସୁ ।

ସମୟ ବଢିବା ସହିତ ବାସୁ ବି ନିଜ ଦୋକାନ ବଢାଇଲେ । ଖାଲି ଦୋକାନ ବଢାଇଲେ ତାହା ନୁହେଁ ବରଂ ଭଲ ଦୁଇ ପଇସା ରୋଜଗାର ବି କଲେ । ଏଇ ଜଳଖିଆ ଦୋକାନରୁ ଏବେ ଯେତିକି ରୋଜଗାର ହେଉଛି, ସେତିକିରେ ପିଲାଙ୍କୁ ପାଠ ପଢାଇବା ସହିତ ବଡ ପୁଅର ବାହାଘର ବି କରାଇ ସାରିଲେଣି । ବାସୁଙ୍କ ଜଳଖିଆର ଏତେ ଅଧିକ ଡିମାଣ୍ଡ ହେଲାଣି ଯେ, ସକାଳ ୬ଟାରୁ ଖୋଲୁଛି ଦୋକାନ ।

ସେପଟେ ବାସୁ କହିଛନ୍ତି, ପରିସ୍ଥିତି ସାମ୍ନାରେ ଆମେ ମୁଣ୍ଡ ନନୁଆଁଇ କେମିତି ଆଗକୁ ବଢିବା ସେଇ ଚିନ୍ତା କଲେ ନିଶ୍ଚୟ ରାସ୍ତା ଆସିବ ଆମେ ସଫଳ ହେବା । ଅନେକ ସମୟରେ ଦେଖାଯାଏ କାମ ମିଳୁନି କହି ସୁସ୍ଥ ମଣିଷ ମାଗିଯାଚିକି ଖାଏ ନହେଲେ ଆଉ କଣ କରେ । କିନ୍ତୁ ବାସୁ ଦିବ୍ୟାଙ୍ଗ ହେବା ପରେ ବି ସକାଳୁ ରାତି ପର୍ଯ୍ୟନ୍ତ ପରିଶ୍ରମ କରୁଛନ୍ତି, ଆଉ ଭଲ ଦୁଇ ପଇସା ରୋଜଗାର କରୁଛନ୍ତି । ଆଉ ସମାଜ ପାଇଁ ସାଜିଛନ୍ତି ପ୍ରେରଣା ।

(ରିପୋର୍ଟର- ଗଜପତି ମୋହନାରୁ ମିହିର ଜତି)