ଏୟାର ଲିଫ୍ଟ ହେଲେ ଡିଜିପି: ହେଲେ କାହିଁକି?

ଭୁବନେଶ୍ୱର: ଡିଜିପିଙ୍କ ହେଲିକପ୍ଟରରେ ଏୟାର ଲିଫ୍ଟ ହେଲେ। ଆହତ ଯବାନ ବୌଦ୍ଧ-କନ୍ଧମାଳ ସୀମାରେ ମାଓବାଦୀ ଓ ସୁରକ୍ଷାକର୍ମୀଙ୍କ ମଧ୍ୟରେ ପ୍ରାୟ ୮ ଘଣ୍ଟା ଧରି ଗୁଳିବିନିମୟ ହୋଇଥିଲା। ଯେଉଁଥିରେ ଗୁରତର ଆହତ ଦୁଇଜଣ ଏସ୍ଓଜି କମାଣ୍ଡୋଙ୍କୁ ନିଜ ହେଲିକପ୍ଟରରେ ଭୁବନେଶ୍ୱର ଆଣିଥିଲେ ଡିଜିପି ଅଭୟ। ଭୁବନେଶ୍ୱର ଏମ୍ସରେ ଏବେ ଦୁଇ ଯବାନଙ୍କ ଚିକିତ୍ସା ଚାଲିଛି। ତେବେ ଗୁଳିବିନିମୟରେ ମାଓବାଦୀଙ୍କ ପକ୍ଷରୁ ମଧ୍ୟ କିଛି ଆହତ ହୋଇଥିବା ସୂଚନା ମିଳିଛି।

Also Read

ଦିନକ ପରେ ବଡ଼ଦାଣ୍ଡକୁ ଚାଲି ଆସିବେ ମହାପ୍ରଭୁ: ସୁରକ୍ଷା ପାଇଁ ମୁତୟନ ହେବେ ୬୫ ପ୍ଲାଟୁନ୍‌ ଫୋର୍ସ

କାଠରେ ନିର୍ମାଣ ହୋଇଛି ଶ୍ରୀମନ୍ଦିର, ମୁଖ୍ୟମନ୍ତ୍ରୀଙ୍କୁ ଉପହାର ଦେବାକୁ ଇଚ୍ଛା ରଖିଛନ୍ତି କାରିଗର

ସୋସିଆଲ ମିଡ଼ିଆରେ ଭାଇରାଲ ଖବର ମିଛ, ଜୀବିତ ଅଛନ୍ତି କଣ୍ଠଶିଳ୍ପୀ ଅସୀମା ପଣ୍ଡା

ବୌଦ୍ଧ-କନ୍ଧମାଳ ସୀମାରେ ହୋଇଥିଲା ଏନକାଉଣ୍ଟର। ରକ୍ତମୁଖା ମାଓବାଦୀଙ୍କ ସହ ସୁରକ୍ଷାକର୍ମୀଙ୍କ ମଧ୍ୟରେ ଚାଲିଥିଲା ଗୁଳିବିନିମୟ। ୮ ଘଣ୍ଟା ଧରି ଘମାଘୋଟ ଲଢ଼େଇ ହୋଇଥିଲା। ଡିଜିପିଙ୍କ ହେଲିକପ୍ଟରରେ ଏୟାର ଲିଫ୍ଟିଂ ହେଲେ ଆହତ ଯବାନ। ପୂରା ଘଟଣାଟି ଏମିତି ଥିଲା। କନ୍ଧମାଳ ଗୋଚ୍ଛାପଡ଼ା ଥାନା ଉମା ଜଙ୍ଗଲରେ କମ୍ବିଂ ଅପରେସନରେ ଯାଇଥିବା ସୁରକ୍ଷାକର୍ମୀଙ୍କ ଉପରକୁ ହଠାତ୍ ଆଖିବୁଜା ଗୁଳି ଚଳାଇଥିଲେ ଲାଲ୍ସେନା ଆଉ ଜବାବୀ କାର୍ଯ୍ୟାନୁଷ୍ଠାନ ବେଳେ ଗୁଳିବାଜି ଗୁରୁତର ଆହତ ହୋଇଥିଲେ ଏସ୍ଓଜିର ଦୁଇ କମାଣ୍ଡୋ। ସିଆରପିଏଫ୍‌ ଯବାନ ମାନେ ତୁରନ୍ତ ଉଭୟଙ୍କୁ ସୀମାରେ ଥିବା ବୌଦ୍ଧ ଜିଲ୍ଲାର ପାଦେଲପଡ଼ାକୁ ଆଣିଥିଲେ।

ତେବେ ଉଭୟଙ୍କୁ ଏୟାରଲିଫ୍ଟ କରିବା ପାଇଁ ଆସିବାକୁ ଥିବା ଭାରତୀୟ ବାୟୁସେନାର ଏକ ହେଲିକପ୍ଟର ଖରାପ ପାଗ ଯୋଗୁଁ ଆଗକୁ ବଢ଼ି ନପାରି ଛତିଶଗଡ଼ ମହାସମୁନ୍ଦରୁ ଫେରିଯାଇଥିଲା। ହେଲେ ସୌଭାଗ୍ୟକୁ ଏତିକି ବେଳେ ହେଲିକ୍ପଟର ଯୋଗେ କୋରାପୁଟ୍-ମାଲକାନଗିରି ଗସ୍ତରେ ଯାଉଥିବା ଡିଜିପି ଅଭୟଙ୍କ ପାଖେ ଏ ଖବର ପହଞ୍ଚିଯାଇଥିଲା। ଆଉ ସେ ତୁରନ୍ତ ଗସ୍ତ ବାତିଲ କରି ସୁନାବେଡ଼ାରୁ ସିଧା ପାଦେଲପଡ଼ା ପହଞ୍ଚିଥିଲେ। ଉଭୟଙ୍କୁ ନିଜ ହେଲିକପ୍ଟରରେ ଏୟାର ଲିଫ୍ଟ କରି ଭୁବନେଶ୍ୱର ନେଇ ଆସିଥିଲେ।

ଆହତ ଏସ୍ଓଜି ଯବାନଙ୍କ ଭିତରୁ ଜଣଙ୍କ ଛାତିରେ ଗୁଳି ବାଜିଥିଲା ବେଳେ ଅନ୍ୟ ଜଣଙ୍କ ହାତରେ ଗୁଳିବାଜିଛି। ଦୁଇ ଜଣଙ୍କୁ ଭୁବନେଶ୍ୱର ଏମ୍ସରେ ଭର୍ତ୍ତି କରାଯିବା ପରେ ଏକ ସ୍ୱତନ୍ତ୍ର ଟିମ୍ ସହାୟତାରେ ଉଭୟଙ୍କ ଚିକିତ୍ସା ଚାଲିଛି।

ଅପରେସନରେ ମାଓବାଦୀଙ୍କ ପକ୍ଷରୁ ମଧ୍ୟ କିଛି ଆହତ ହୋଇଥିବାର ସୂଚନା ଥିବା ପୋଲିସ୍ କହିଛି। ତେବେ ଗତ ମାସ ୨୨ ତାରିଖରେ ଗୋଛାପଡ଼ା ଥାନାଞ୍ଚଳର କୁମ୍ଭହାରୁ ଗାଁରେ ପୋଲିସ୍ ଓ ମାଓବାଦୀଙ୍କ ମଧ୍ୟରେ ଗୁଳିବିନିମୟ ପରେ ଘଟଣାସ୍ଥଳରୁ ବିପୁଳ ପରିମାଣର ଅସ୍ତ୍ରଶସ୍ତ୍ର ଓ ମାଓ ବ୍ୟବହୃତ ସାମଗ୍ରୀ ମିଳିଥିଲା। ଆଉ ଏବେ ପୁଣି ଉମା ଜଙ୍ଗଲରେ ମାଓ ଗତିବିଧି ପରେ ଆକ୍ଟିଭ୍‌ ମୋଡରେ ପୋଲିସ୍। ଆଇଜି ଅପରେସନଙ୍କ ସୂଚନା ଅନୁଯାୟୀ, ସଂପୃକ୍ତ ଅଞ୍ଚଳରେ ମାଓବାଦୀଙ୍କ କେକେବିଏନ୍ ଓ ବିବିଏନ୍ ଡିଭିଜନ୍ ସକ୍ରିୟ ଥିବାରୁ ଆଗକୁ ଅପରେସନକୁ ଆହୁରି ଜୋରଦାର କରାଯିବ।