ଜୈବ ବିବିଧତାର ସଂରକ୍ଷଣ ସହ ସାତକୋଶିଆ ବ୍ୟାଘ୍ର ପ୍ରକଳ୍ପର ଭବିଷ୍ୟତକୁ ଦୃଷ୍ଟିରେ ରଖି ଅଭୟାରଣ୍ୟ ଭିତରେ ଥିବା କଟରଙ୍ଗ ଗ୍ରାମବାସୀ ନିଜ ଭିଟାମାଟି ତ୍ୟାଗ କରି ବିସ୍ଥାପିତ ହେବାକୁ ଯାଉଛନ୍ତି । ତେବେ ସେମାନଙ୍କ ମଧ୍ୟରୁ ଅନେକ ପରିବାର କିନ୍ତୁ ବିସ୍ଥାପନ ପ୍ୟାକେଜରୁ ବଞ୍ଚିତ ହୋଇଥିବା ଅଭିଯୋଗ କରି ବନଖଣ୍ଡ ଅଧିକାରୀ, ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରିଛନ୍ତି । ଅଭୟାରଣ୍ୟରୁ ସ୍ଥାନାନ୍ତର ପାଇଁ କେନ୍ଦ୍ର ଜାତୀୟ ବ୍ୟାଘ୍ର ସଂରକ୍ଷଣ କର୍ତ୍ତୃପକ୍ଷ ଏବଂ ରାଜ୍ୟ ସରକାରଙ୍କ ମାର୍ଗଦର୍ଶିକା ଓ ନିୟମାବଳୀକୁ ବନ ବିଭାଗ ଆଦୌ ଅନୁସରଣ କରି ନଥିବା ଅଭିଯୋଗ ହୋଇଛି ।
ସାତକୋଶିଆ ଅଭୟାରଣ୍ୟ ଭିତରେ ଥିବା କଟରଙ୍ଗ ଗ୍ରାମବାସୀ । ନିଜ ଭିଟାମାଟି ତ୍ୟାଗ କରି ବିସ୍ଥାପିତ ହେବାକୁ ଯାଉଛନ୍ତି କିନ୍ତୁ ଅଭିଯୋଗ, ୨୦ଟି ପରିବାର ବିସ୍ଥାପନ ପ୍ୟାକେଜରୁ ବଞ୍ଚିତ କରାଯାଇଛି । ବ୍ୟାଘ୍ର ପ୍ରକଳ୍ପ ପାଇଁ ସେମାନେ ବେଘର ହେବାକୁ ଯାଉଛନ୍ତି । ବିସ୍ଥାପିତ ହେବାର ଦୁଃଖଠୁ କିନ୍ତୁ ସରକାରୀ ଅବହେଳା ଅଧିକ ଯନ୍ତ୍ରଣା ଦେଉଛି । ସରକାରୀ କଳର ଉଦାସୀନତା, ବାବୁମାନଙ୍କର ବେପରୁଆ ମନୋଭାବ ପାଇଁ ଏବେ ସର୍ବସ୍ୱ ହରାଇବାକୁ ଯାଉଥିବା ଅଭିଯୋଗ କରିଛନ୍ତି ।
ସ୍ଥାନାନ୍ତର ପ୍ରକ୍ରିୟାରେ ପଲ୍ଲୀସଭା ଓ ଗ୍ରାମ ସଭାର ଭୂମିକା ଗୁରୁତ୍ୱପୂର୍ଣ୍ଣ । ସ୍ୱଚ୍ଛତା ଭିତରେ ସମସ୍ତ ବିଷୟ ଆଲୋଚନା ହୋଇ ନିଷ୍ପତ୍ତି ଗ୍ରହଣ ହେବାର ବ୍ୟବସ୍ଥା ବି ରହିଛି । ହେଲେ ବନ ବିଭାଗ ତରବରିଆ ଭାବେ ତଥ୍ୟ ସଂଗ୍ରହ ସହ ସଠିକ୍ ଆଲୋଚନା ନକରି ପ୍ୟାକେଜରେ ନାମ ପଞ୍ଜିକୃତ କରିଥିବା ଅଭିଯୋଗ ହୋଇଛି । ସେପଟେ ବିସ୍ଥାପନ ପ୍ୟାକେଜରୁ ୨୦ ପରିବାର ବଞ୍ଚିତ ହୋଇଥିବାବେଳେ ଏହାକୁ ନେଇ ପରିବେଶବିତ ଓ ସାମାଜିକ କର୍ମୀ ଅସନ୍ତୋଷ ଜାହିର କରିଛନ୍ତି । ସାତକୋଶିଆ ବନ୍ୟପ୍ରାଣୀ ବନଖଣ୍ଡ ଅଧିକାରୀ ସମସ୍ୟା ବିଷୟରେ ଅବଗତ ଅଛନ୍ତି । ଏନେଇ ସେ ଜିଲ୍ଲାପାଳଙ୍କୁ ଅବଗତ କରାଇଥିବା କହିଛନ୍ତି ।