ସ୍କୁଲ୍‌ ବସ୍‌କୁ ୨ ଲକ୍ଷ, ଅଟୋକୁ ୨୭ ହଜାର ଟଙ୍କା ଫାଇନ୍‌

ସ୍କୁଲ୍‌ ବସ୍‌କୁ ୨ ଲକ୍ଷ ୩୩ ହଜାର ଟଙ୍କା ଫାଇନ୍। ଭୁବନେଶ୍ୱରରେ ଏକ ସ୍କୁଲ୍‌ ବସ୍‌କୁ ପରିବହନ ବିଭାଗ ୨ ଲକ୍ଷ ୩୩ ହଜାର ଟଙ୍କା ଜରିମାନା କରିଛି। ଭୁବନେଶ୍ୱର ଡମଣା ଛକରେ ଯାଞ୍ଚ ବେଳେ ଆରଟିଓ-୨ ଏହି ଫାଇନ୍‌ କାଟିଛି। ଏହାସହ ପରିବହନ ବିଭାଗ ଏହି ବସ୍‌କୁ ଜବତ କରିଛି। 

ବସ୍‌ର ପରମିଟ୍, ବୀମା, ପଲ୍ୟୁସନ୍ ବାବଦରେ ଫାଇନ୍ କଟାଯାଇଛି। ଟିକସ ବକେୟା ଅଭିଯୋଗରେ ୨ ଲକ୍ଷ ୫ ହଜାର, ପଲ୍ୟୁସନ୍‌ ପାଇଁ ୧୦ ହଜାର ଓ ପରମିଟ୍ ପାଇଁ ୧୦ ହଜାର ଟଙ୍କା ଫାଇନ୍ କଟାଯାଇଥିବା ଜଣାପଡ଼ିଛି। 

ସେହିପରି ରାଜଧାନୀରେ ଏକ ଅଟୋକୁ ମଧ୍ୟ ୨୭ ହଜାର ଟଙ୍କାର ଚାଲାଣ କାଟିଛି ଆରଟିଓ-୨। ଏକ କୋଚିଂ ସେଣ୍ଟର ପିଲାଙ୍କୁ ନେଇ ଯାଉଥିବା ଅଟୋକୁ ଭୁବନେଶ୍ୱର ଟ୍ରାଇଡେଣ୍ଟ ହୋଟେଲ ନିକଟରେ ଅଟକାଇ ଆରଟିଓ ଅଧିକାରୀ ଏହି ଚାଲାଣ କାଟିଛନ୍ତି। ବିନା ଡ୍ରାଇଭିଂ ଲାଇସେନ୍ସ, ପରମିଟ୍, ଇନ୍‌ସ୍ୟୁରାନ୍ସ ଓ ଫିଟ୍‌ନେସ୍‌ରେ ଛାତ୍ରଛାତ୍ରୀଙ୍କୁ ନେଇ ଯାଉଥିବାରୁ ଆରଟିଓ-୨ ଏହି ଚାଲାଣ କାଟିଛି। 

ସୂଚନାଥାଉ କି, ଗତକାଲି କୋରାପୁଟରେ ପୋଲିସ ଓ ପରିବହନ ବିଭାଗ ପକ୍ଷରୁ ଧରପଗଡ଼ ବେଳେ ପିଲାଙ୍କୁ ନେଇ ଯାଉଥିବା ସ୍କୁଲ ବସ୍‌କୁ ଜରିମାନା କରାଯାଇଥିଲା। ଫିଟନେସ୍ ଯାଞ୍ଚ ବେଳେ ସ୍କୁଲ ବସ୍‌କୁ ପରିବହନ ବିଭାଗ ୪ ଲକ୍ଷ ଟଙ୍କା ଜରିମାନା କରିଥିଲା।