ଗାଡି ଉଦଳାରେ, ହେଲେ ଚାଲାଣ କଟିଲା ମାଲକାନଗିରିରେ। ଘଟଣାକୁ ନେଇ ମୟୂରଭଞ୍ଜ ଜିଲ୍ଲା ଉଦଳା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। କପ୍ତିପଦା ପୋଷ୍ଟ ଅଫିସରେ ଚାକିରି କରିଥିବା ଭୀମସେନ ସେନାପତିଙ୍କର ଏକ ହିରୋ ଗ୍ଲାମର ବାଇକ ରହିଛି। ଗତକାଲି ସେ ଘରେ ଥିବା ବେଳେ ତାଙ୍କ ଗାଡ଼ି ନମ୍ବରରେ ୫୦୦ ଟଙ୍କାର ଚାଲାଣ କଟାଯାଇଥିବା SMS ଆସିଥିଲା, ଯାହା ଦେଖିବା ପରେ ସେ ତାଜୁବ୍ ହୋଇଯାଇଥିଲେ।
ମାଲକାନଗିରି ଟ୍ରାଫିକ୍ ପୋଲିସ୍ ତାଙ୍କ ଗାଡ଼ି ନମ୍ବରରେ ଏହି ଚାଲାଣ କାଟିଥିବା ଭୀମସେନ ଅଭିଯୋଗ କରିଛନ୍ତି। ଉକ୍ତ ଗାଡ଼ିଟି ତାଙ୍କ ପାଖରେ ଥିଲା ଏବଂ ସେ ଉଦଳାରେ ଥିଲେ। ହେଲେ ତାଙ୍କ ପାଖକୁ ୫୦୦ ଟଙ୍କାର ଚାଲାଣ କଟାଯାଇଥିବା SMS ଆସିଥିଲା।
ବାହାନ ୱେବସାଇଟରୁଭୀମସେନଙ୍କ ପାଖକୁ ଆସିଥିବା ମେସେଜର ଯାଞ୍ଚ ପରେ ପୁରା ଘଟଣା ସାମ୍ନାକୁ ଆସିଥିଲା। ଅଭିଜିତ୍ ବିଶ୍ୱାସ ନାମକ ଜଣେ ଯୁବକ ବିନା ଡ୍ରାଇଭିଙ୍ଗ ଲାଇସେନ୍ସରେ ଗାଡି ଚଳାଉଥିବାରୁ ତାଙ୍କ ନାଁରେ ଉକ୍ତ ଗାଡ଼ି ନମ୍ବରରେ ଚାଲାଣ କଟିଥିବା ୱେବସାଇଟରୁ ତଥ୍ୟ ମିଳିଛି। ସବୁଠାରୁ ବଡ଼ କଥା, ଗାଡ଼ିର ମାଲିକ, ଗାଡି ସହ ଉଦଳାରେ ଥିବାବେଳେ କିପରି ମାଲକାନଗିରିରୁ ଚାଲାଣ କଟିଲା, ଏନେଇ ଅସନ୍ତୋଷ ଜାହିର କରିବା ସହ ତଦନ୍ତ କରିବା ପାଇଁ ଭୀମସେନ ଦାବି କରିଛନ୍ତି।
ଖବର ଲେଖାଯିବା ସୁଦ୍ଧା ଘଟଣାକୁ ନେଇ RTO କିମ୍ବା ମାଲକାନଗିରି ଟ୍ରାଫିକ୍ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନି।