ରାଉରକେଲାକୁ ବନ୍ଦ ହୋଇଯିବ କି ଯାତ୍ରୀବାହୀ ବିମାନ ସେବା ? ହକି ବିଶ୍ୱକପ୍ ବେଳେ ୬ ମାସ ତଳର ବହୁ ଆଡମ୍ବର ଲଘୁକ୍ରିୟାରେ ପରିଣତ ହେବନି ତ ? ଏବେ ସ୍ଥାନୀୟ ଲୋକେ ଏମିତି ଆଶଙ୍କା କଲେଣି। କାରଣ ବର୍ଷା ଋତୁ ଆରମ୍ଭରୁ ରାଉରକେଲା ବିମାନବନ୍ଦରରେ ବାରମ୍ବାର ବିମାନସେବା ବାତିଲ୍ ହେଉଥିବାବେଳେ ଗତ ସପ୍ତାହେ ହେଲା ଭୁବନେଶ୍ୱରରୁ ରାଉରକେଲାକୁ ବିମାନ ସେବାରେ ଦେଖାଦେଇଛି ସାଂଘାତିକ ଅନିୟମିତତା। ଆରମ୍ଭରୁ ୭୦ ପ୍ରତିଶତ ଯାତ୍ରୀ ଯାତାୟାତ କରୁଥିଲେ, ଏବେ ସେହି ସଂଖ୍ୟା ୩୦ ପ୍ରତିଶତକୁ ଖସିଆସିଛି। ବାରମ୍ବାର ବିମାନ ବାତିଲ ହେଉଥିବାରୁ ଏଭଳି ସ୍ଥିତି ଉପୁଜିଥିବା କୁହାଯାଉଛି।
ହକି ବିଶ୍ୱକପକୁ ଦେଖି ଗତ ଜାନୁୟାରୀ ୫ରେ ଉଡାନ୍ ସ୍କିମରେ ରାଉରକେଲା ସହରକୁ ପ୍ରଥମ କରି ଆରମ୍ଭ ହୋଇଥିଲା ଯାତ୍ରୀବାହୀ ବିମାନ ସେବା। କିନ୍ତୁ ଗତ ସପ୍ତାହେ ହେଲା କ୍ରମାଗତ ଭାବେ ବାତିଲ୍ ହେବାରେ ଲାଗିଛି ବିମାନ। ରାତିରେ ବିମାନ ଅବତରଣ ସୁବିଧା ନଥିବାରୁ ଏବଂ ଇନ୍ଷ୍ଟ୍ରୁମେଣ୍ଟ ଲାଣ୍ଡିଂ ସିଷ୍ଟମ ତଥା ILS ଭଳି ଭିତ୍ତିଭୂମି ବିକଶିତ ହୋଇନଥିବାରୁ ବିମାନ ସେବାର ଭବିଷ୍ୟତକୁ ନେଇ ଦେଖାଦେଇଛି ଆଶଙ୍କା।
Also Read
କେବଳ ରାଉରକେଲା ନୁହଁ, କୋରାପୁଟ ଜିଲ୍ଲା ଜୟପୁରକୁ ବି ଉଡ଼ାନ୍ ଯୋଜନା ଅନ୍ତର୍ଗତ ବିମାନସେବା ପ୍ରଭାବିତ ହୋଇଛି। ସପ୍ତାହକୁ କେବଳ ୩ ଦିନ ଚାଲୁଛି ଚଳିତ ମାସ ୧ ତାରିଖରୁ । ଆସନ୍ତା ୨୩ ତାରିଖ ପରେ ନିୟମିତ ଚାଲିବ ବୋଲି ଜୟପୁର ବିମାନବନ୍ଦର କର୍ତ୍ତୃପକ୍ଷଙ୍କ ସୂତ୍ରରୁ ଜଣାପଡ଼ିଛି । ରାଉରକେଲା ଓ ଜୟପୁର ବିମାନବନ୍ଦରରେ ବିମାନସେବାରେ ଏଭଳି ଅନିୟମିତତାକୁ ଦେଖି ଭିତ୍ତିଭୂମିର ବିକାଶ ପାଇଁ ରାଜ୍ୟ ବାଣିଜ୍ୟ ଓ ପରିବହନ ସଚିବ ଉଷା ପାଢୀ ଏୟାରପୋର୍ଟ ଅଥରିଟି ଅଫ୍ ଇଣ୍ଡିଆକୁ ଚିଠି ଲେଖିଛନ୍ତି । ଚିଠିରେ ଦର୍ଶାଇଛନ୍ତି, ଉଭୟ ରାଉରକେଲା ଓ ଜୟପୁର ବିମାନବନ୍ଦର ପାଇଁ ଏକ ବିସ୍ତୃତ ମାଷ୍ଟର ପ୍ଲାନ୍ ସମେତ, ଆବଶ୍ୟକୀୟ ଜମି ଏବଂ ନାଇଟ୍ ଲ୍ୟାଣ୍ଡି ଫାସିଲିଟି ସକାଶେ ଏକ ଡିଟେଲ୍ ପ୍ରୋଜେକ୍ଟ ରିପୋର୍ଟ-DPR ପ୍ରସ୍ତୁତ କରାଯାଉ। ତେବେ ଏନେଇ ଏୟାରପୋର୍ଟ ଅଥରିଟି ଅଫ୍ ଇଣ୍ଡିଆ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନି।