ପ୍ରଥମେ କାଳୀ ଆଉ ଏବେ ଶିବ-ପାର୍ବତୀ ପିଉଛନ୍ତି ସିଗାରେଟ୍‌ !

ଡକ୍ୟୁମେଣ୍ଟାରୀ 'କାଳୀ'ର ପୋଷ୍ଟର୍‌କୁ ନେଇ ବିବାଦ ନଥମୁଣୁ ପୁଣି ଆଉ ଏକ ଫଟୋ ସାମ୍ନାକୁ ଆସିଛି । ଯାହା ଆଧ୍ୟାତ୍ମିକ ଭାବନାକୁ ଆଘାତ ଦେଇଛି । ଡକ୍ୟୁମେଣ୍ଟାରୀ ଫିଲ୍ମର ନିର୍ଦ୍ଦେଶକ ଲୀନା ମଣିମେକଲାଇ ନିଜ ସୋସିଆଲ୍‌ ମିଡିଆରେ ଏକ ବିବାଦୀୟ ପୋଷ୍ଟ କରିଛନ୍ତି । ଯେଉଁଥିରେ ଶିବ-ପାର୍ବତୀଙ୍କୁ ସିଗାରେଟ୍‌ ପିଉଥିବା ଦେଖିବାକୁ ମିଳିଛି ।

ଲୀନା ନିଜ ଟ୍ୱିଟର ଆକାଉଣ୍ଟରେ ଏହି ଫଟୋ ଶେୟାର କରିଛନ୍ତି । ଯେଉଁଥିରେ ‘ଶିବ-ପାର୍ବତୀ’ ଚରିତ୍ରରେ ଥିବା ବ୍ୟକ୍ତିଙ୍କୁ ସିଗାରେଟ୍ ଟାଣୁଥିବାର ଦେଖିବାକୁ ମିଳିଛି । ଫଟୋଟିକୁ ଶେୟାର କରିବା ସହ ସେ ଲେଖିଛନ୍ତି ଯେ, ‘ ଆଉ କେଉଁଠି’("Elsewhere….")। ତେବେ ତାଙ୍କର ଏହି ଟ୍ୱିଟ୍‌କୁ ସୋସିଆଲ୍‌ ମିଡିଆର ଅନେକ ୟୁଜର୍ସ ବିରୋଧ କରିଛନ୍ତି ।

ନିକଟରେ ଭାରତୀୟ ଚଳଚ୍ଚିତ୍ର ନିର୍ମାତା ଲୀନା ମଣିମେକାଲାଇଙ୍କ ଏକ ଡକ୍ୟୁମେଣ୍ଟାରୀ 'କାଳୀ'ର ପୋଷ୍ଟର୍‌ ରିଲିଜ୍‌ ହୋଇଥିଲା। ଏହି ପୋଷ୍ଟର୍‌ ଦେଖି ହିନ୍ଦୁ ଧର୍ମ ସହ ଜଡିତ ଲୋକଙ୍କ ଭାବନା କ୍ଷତିଗ୍ରସ୍ତ ହେବାରୁ ଏନେଇ ସୋସିଆଲ୍‌ ମିଡିଆରେ ବିବାଦ ଉପୁଜିଥିଲା । ଏହି ପୋଷ୍ଟର୍‌ରେ ମା’ କାଳୀ ସିଗାରେଟ୍‌ ଟାଣୁଥିବା ଦେଖାଯିବା ସହିତ ମା’ଙ୍କ ବେଶଭୁଷାରେ ଗୋଟିଏ ହାତରେ ତ୍ରୀଶୁଳ ଏବଂ ଆଉ ଗୋଟିଏ ହାତରେ LGBTQ ସମ୍ପ୍ରଦାୟର ପତାକା ଦେଖାଯାଉଛି। ଏହାକୁ ଦେଖି ସୋସିଆଲ୍‌ ମିଡିଆ ବ୍ୟବହାରକାରୀମାନେ ବହୁତ କ୍ରୋଧ ପ୍ରକାଶ କରିଛନ୍ତି। ଏଥିରେ ମା’ କାଳୀଙ୍କୁ ଅପମାନିତ କରାଯାଇଛି ବୋଲି ୟୁଜର୍ସମାନେ ମତ ଦେଇଥିଲେ । ତେବେ ଦେବୀଙ୍କୁ ଏକ ଆପତ୍ତିଜନକ ସ୍ଥିତିରେ ଦେଖାଇବା ଯୋଗୁଁ ବର୍ତ୍ତମାନ ପର୍ଯ୍ୟନ୍ତ ସୋସିଆଲ୍ ମିଡିଆ ବ୍ୟବହାରକାରୀମାନେ ଲୀନାଙ୍କୁ ବିରୋଧ କରୁଛନ୍ତି।