ସ୍କୁଲ୍‌ ପିଲାଙ୍କୁ ନିର୍ଘାତ ପିଟିବା ପରେ ଭୁଲ୍‌ ମାଗିଲେ ସାର୍‌

ସ୍କୁଲ ପିଲାଙ୍କୁ ସାର୍‌ଙ୍କ ନିର୍ଘାତ ମାଡ଼ । ଏମିତି ନିର୍ଦ୍ଦୟ ହୋଇ ପିଟିଛନ୍ତି ଯେ, ପିଲାଙ୍କ ଦେହରେ ଚିହ୍ନ ରହି ଯାଇଛି । ଏହାସହ ପିଲାଙ୍କ ନୋଳା ଫାଟି ଯାଇଛି । କଟକ ଜିଲ୍ଲା ନରସିଂହପୁର ଥାନା ନୂଆଗଡ଼ ୟୁପି ସ୍କୁଲରେ ଦେଖିବାକୁ ମିଳିଛି ଏଭଳି ଅଭାବନୀୟ ଘଟଣା । କିଛି ନ ଦେଖି ବାଡ଼ିରେ ଆଖିବୁଜା ପିଟିଥିବାର ଅଭିଯୋଗ କରିଛନ୍ତି ପିଲେ ।

ଅଭିଯୋଗ ଅନୁଯାୟୀ, ସାର୍ ମାଧବ ରାଉଳ ସ୍କୁଲରେ ଶୋଇଥିଲେ । ସେହି ସମୟରେ ପିଲମାନେ ଶୌଚ ଯିବା ପାଇଁ କୁଆଡ଼େ ଏହି ପିଲମାନେ ଅନୁମତି ମାଗିଥିଲେ । ସାର୍ ହଁ ବି କହିଥିଲେ । କିନ୍ତୁ ପିଲାମାନେ ଫେରିବା ପରେ ହଠାତ୍‌ ସାର୍‌ଙ୍କ ରାଗ ପଞ୍ଚମକୁ ଉଠିଥିଲା । ତା ପରେ ଜଣେ ପରେ ଜଣେ ଏମିତି ୫ ଜଣଙ୍କୁ ବାଡ଼ିରେ ନିର୍ଘାତ ପିଟିଥିଲେ ସାର୍‌ ।

ଏଥିପାଇଁ ଅବଶ୍ୟ ପରେ ସେ ଭୁଲ ମାଗିଛନ୍ତି । ଏହାର ପୁନରାବୃତ୍ତି ହେବନାହିଁ ବୋଲି କହିଛନ୍ତି । ଶିକ୍ଷକ ଜଣକ ପିଲାଙ୍କୁ ବାଡ଼ିରେ ପିଟିବା ଖବର ପାଇବା ପରେ ବିଇଓ ସ୍କୁଲକୁ ଆସି ତଦନ୍ତ କରିଛନ୍ତି । ସଂପୃକ୍ତ ଶିକ୍ଷକଙ୍କ ବିରୋଧରେ ଅଭିଭାବକମାନେ କଡ଼ା କାର୍ଯ୍ୟାନୁଷ୍ଠାନ ଦାବି କରିଥିବା ବେଳେ ତାଙ୍କଠାରୁ ଏକ ଅଣ୍ଡରଟେକିଂ ଲେଖାଇ ଏହାର ସମାଧାନ କରାଯାଇଥିବା ବିଇଓ କହିଛନ୍ତି ।